रोमी 9
9
कोन्ज्योइ दाम्क्योक क्युःपा
1ङाः ख्रीष्टकीइदी इःङे, ङाः स्योप मेःक्याःप। ङाःइ नावा ओःले चाङ्मा लाइयाङ दी तामगीइ पाङ्बु तेर्कुए। ओः सोङ्गारा, ङाःइ लाःचे छोल्क्योक ताम तेःन्दाम एः। 2ङाःइ च्याःम्बु इस्राएली मीःक्याइ लागी ङाःइ सेमला माःङ्बुरा तुःक्पु ओःले नाःमाङ मीःसीःङेन तुःङाल एः। 3चीलेलाःना ङाःइ क्युःपाइ इस्राएली मीःक्याइ थार्चे ज्योर्कुए लाःना, ङाःइ खाम्सी ज्योर्ती ओःले ख्रीष्टलाःम्ले खाफ्यादी तेःचेःलाङ ङाः तेःचे सेम पेःगे। 4खुङक्या इस्राएली मीःक्या इःङे ओःले कोन्ज्योइ खुङक्याला राःङगीइ पुःपोःमोक्या जोसी। कोन्ज्योइ राःङगीइ महीमा खुङक्याला तेङ्सी। खुङक्या ङीमु कोन्ज्योइ राःङगीइ ताःम्ज्याक्या ताःम्सी, खुङक्याला छ्येइ ठीम तेर्सी, ओःले आराधना पेःजेला लोप्सी। ओःले खुङक्याइ कोन्ज्योइ ताःम्ज्याक्या ज्योर्सी। 5इस्राएली मीःक्या नी राःङगीइ मीःन ताक्योक मेःमे फेबेक्या अब्राहाम, इसहाक रा याकुबकीइ छार्क्युफुर्क्युक्या इःङे, ओःले ख्रीष्टाङ दी क्युःपालारा केसी। खुङ नी थाम्जेरखाला क्याःल्खाप पेःगेन कोन्ज्यो इःङे। खुङला तेन्दुरा प्रशंसा काःल्ज्युक! आमेन।
6ङाःइ लाःचे छोल्क्योकदी कोन्ज्योइ इस्राएलीक्याला ताःम्क्योक ताःम्ज्याइ लेःगा माःबे लाःचे छोल्क्योक मीःङे, चीलेलाःना इस्राएली क्युःपालाःम्ले केक्योक लाःकासुनारा थाम्जेर मीःक्या कोन्ज्योइ मीःक्या ओःङ्गुए लाःकेन्दी म्याः। 7अब्राहामगीइ छार्क्युफुर्क्यु इःङे लाःसुनारा थाम्जेर अब्राहामगीइ तेःन्दाम पुःपोःमोक्या ओःङ्गुए लाःकेन्दी म्याः।#९:७ दी छार्क्युफुर्क्युक्या लाःती इश्माएलगीइ पुःपोःक्याला लाःक्योक इःङे। इश्माएलदी अब्राहामगीइ हागार लाःकेन पेःन्पीःजालाःम्ले केक्योक पुः एःके। इःनाङ छ्येइ पेज्याला प्रुःक्योक च्योःङ्रा, “ख्याइ पुः इसहाकलाःम्ले केक्योक छार्क्युफुर्क्युक्या चीग्रा ख्याइ तेःन्दाम पुःपोःमोक्या ओःङेन एः।”#उत्पत्ती २१:१२ 8दीखोइ लेःन लाःक्योकदी अब्राहामलाःम्ले केक्योक थाम्जेर कोन्ज्योइ छार्क्युफुर्क्यु मीःङे, इःनाङ कोन्ज्योइ ज्याक्योक ताःम्ज्या अनुसार केगेनक्या चीग्रा अब्राहामगीइ तेःन्दाम छार्क्युफुर्क्यु इःङे। 9चीलेलाःना कोन्ज्योइ एःन्डु लाःती ताःम्ज्या पेःदी एःके, “साङ्बी दी तीःजीला ङाः लोःदी ओःङे, ओःले साराइ पुः चीग केगेन एः।”#उत्पत्ती १८:१०
10ओःजे चीग्रा मीःङे, रीबेकाइयाङ उःइ मेःमे फेबे इसहाकलाःम्लेरा पुः ङी केसी। 11-13इःनाङ ओः जाउँले पुःक्या केजे तोःङ्लारा ओःले ओः ङीइ चीङ याःबु रा माःइबा लेःगा पेःजे तोःङ्लारा, कोन्ज्योइ ओः जाउँले पुःक्या नाःङ्ला मेःराङ चीगला दाम्सी ओःले रीबेकाला एःन्डु लाःसी, “आतादीइ नोःदीला मेःबा पेःगेन एः।”#उत्पत्ती २५:२३ कोन्ज्योइ लाःक्योक च्योःङ्रारा छ्येइ पेज्याला एःन्डुबा प्रुःदी एः, “ङाःइ याकुबला च्याःम्बु पेःसी, इःनाङ एसावला क्युक्टा पेःसी।”#मलाकी १:२-३ एःन्डुले कोन्ज्योइ मीःक्याला खुङक्याइ लेःगाला तादी मेःदामए, इःनाङ खुङला सेम थेक्योक च्योःङ्राले दाम्गुए लाःकेन ताम साङ्बुले थोङ्गुए।
14ओःन्डु इःङे लाःना ताः उः ची लाःका? ची कोन्ज्योइ याःबुले ठीम पेःजे मीःखुबा ले? मीःङे, ओःन्डुबा कोन्ज्योइ नाःमाङ मेःबेए! 15चीलेलाःना कोन्ज्योइ मोशाला लाःसी, “काःखोला ङाः नीङ च्योःजे सेम थेपा, ओःखोला ङाः नीङ च्योःगे, ओःले काःखोला ङाः च्याःम्बु पेःजे सेम थेपा, ओःखोला ङाः च्याःम्बु पेःगे।”#प्रस्थान ३३:१९ 16ओः सोङ्गारा, सुला नीङ च्योःकोः लाःकेन ताम कोन्ज्योइरा ठीवा चेकुए, उःइ नी ओःखो सेम पेःदी ओःले लेःगा पेःदीङ ज्योर्चे मीःखुए। 17छेइ पेःज्याइ मीश्रइ क्याःल्बु फारोइ बारेला एःन्डु लाःकुए, “ख्यालाःम्ले ङाःइ ल्हे तेङ्जेला ओःले थाम्जेर जाम्बुलीङला ङाःइ मीःन तोजेला ङाःइ ख्याला क्याःल्बु जोसी।”#प्रस्थान ९:१६ 18ओः सोङ्गारा, कोन्ज्योइ राःङला सेम थेक्योकक्याला खुङगीइ नीङ च्योःउए, ओःले खुङला सेम थेक्योकक्याइ सेम ताःम्बु जोतेर्कोए।
कोन्ज्योइ सीःताङ ओःले अनुग्रह
19ख्याक्या नाःङ्ला लाःलेइ लाःलेइगीइ एःन्डु लाःटो, “ओःन्डु इःङे लाःना, ओःले थाम्जेर तामक्या कोन्ज्योला सेम थेक्योक च्योःङ्राले ओःङ्गुए लाःना, चीले कोन्ज्योइ मीःक्याला माःताक्पा च्याःङ्गुबा ले?” 20इःनाङ ए मीःक्या, कोन्ज्यो ङीमु खाइ खा लोगेन्दी ख्यो सु इःङे? सेबीइ नेकीइ “ङाला चीले एःन्डुबा जोक्योक?” लाःती जोगेन मीःला टीःजे खुउबा ले? 21सेबीइ नेकी जोगेन मीःइ राःङगीइ च्योप्क्योक सेबीलाःम्ले राःङगीइ सेमगीइ जोनी तेःक्योक नेकी जोउए। चीग्रा सेबीइ फोल्दोङलाःम्ले खुङगीइ लाःलेइला छ्योम्बो लेःगाइ लागी लाःलेइला छीमी लेःगाइ लागी नेकी जोजे खुउए।
22ओःन्डुरा पेःदी, कोन्ज्यो ङीमु राःङगीइ सीःताङ ओःले ल्हे मीःक्याखाला तेङेन आङ्ज्या एः। इःनाङ खुङगीइ सीःङ्दा चेचेला तयार जोदी ज्याक्योक मीःक्या ङीमु खुङ माःङ्बुरा नादी तेःती एः। 23कोन्ज्योइ नीङ च्योःक्योक मीःक्याला राःङगीइ महीमा तेङ्जेला खुङगीइ एःन्डु पेःसी, ओःले खुङगीइ खुङक्याला तोःङ्मीःजीकरा दी महीमा तेङ्जेला तयार जोदी एःके। 24चीलेलाःना खुङगीइ केक्याःप्क्योक मीःक्या उःक्याङ इःङे। खुङगीइ इस्राएलीक्याला चीग्रा केमाःक्याःप इःनाङ राःङ्सा क्युःपाइ मीःक्यालाङ केक्याःप्सी। 25कोन्ज्योइ लेःङ्गो तेर्केन होशेइ पेज्याला कोन्ज्योइ राःङ्सा क्युःपाइ बारेला एःन्डु लाःती एः,
“खुङक्या तोःङ्ला ङाःइ मीःक्या म्याःके,
इःनाङ ताः ङाः खुङक्याला ङाःइ मीःक्या लाःती लाःके।
ओःले खुङक्याला तोःङ्ला ङाःइ च्याःम्बु पेःदी म्याःके,
इःनाङ ताः ङाः खुङक्याला च्याःम्बु पेःगे।”#होशे २:२३
26“ओःले ‘ख्याक्या ङाःइ मीःक्या मीःङे’ लाःती खुङक्याला लाःक्योक ठाउँलारा
‘ख्याक्या सोम्बो कोन्ज्योइ छार्क्युफुर्क्यु इःङे’ लाःती केक्याःप्के।”#होशे १:१०
27ओःले कोन्ज्योइ लेःङ्गो तेर्केन यशैयाइ इस्राएलीक्याइ बारेला एःन्डु लाःती एः,
“इस्राएलगीइ मीःक्या चाङ्बुइ पेःमा चेरा माःङ्बु एःनाङ
खुङक्या नाःङ्ला तीबी चीगला चीग्रा थार्च्युगेन एः।
28चीलेलाःना प्रभुइ जाम्बुलीङगीइ मीःक्याला गेबुरा दण्ड तेर्ती खुङगीइ राःङगीइ लेःगा छाङ्च्युगेन एः।”#यशैया १०:२२-२३
29यशैयाइ तोःङ्लारा एःन्डु लाःती एः,
“छ्योम्बो ल्हे एःक्योक प्रभु कोन्ज्योइ उःइ लागी चीङ छार्क्युफुर्क्यु लीःमाच्युक्योक एःना,
उः इस्राएलीक्या सदोम रा गमोराइ मीःक्या च्योःङ्रा सीःङ्दा डोजेके।”#यशैया १:९
इस्राएलीक्याइ सेमल्हुक मालुक्योक
30ओः सोङ्गारा, ङाःइ लाःचे छोल्क्योक ताम दीखोरा इःङे, छ्येइ ठीम ङीःन्जे मेःछोल्गेन राःङ्सा क्युःपाइ मीःक्याइ सेमल्हुक लुदी खुङक्या कोन्ज्योइ तोःङ्ला ताःक्पा ओःङ्जे खुसी। 31एःनाङ इस्राएलीक्याइ छ्येइ ठीम ङीःन्दी कोन्ज्योइ तोःङ्ला ताःक्पा ओःङ्जेला माःङ्बुरा छोल्सी इःनाङ खुङक्या ताःक्पा ओःङ्जे माःखु। 32चीले खुङक्या ताःक्पा ओःङ्जे माःखुबा ले? चीलेलाःना खुङक्याइ सेमल्हुक लुदी ताःक्पा ओःङ्जे माःछोल एःनाङ खुङक्याइ लेःगा चीग्रा पेःदी ताःक्पा ओःङ्जे छोल्सी। एःन्डुले येशु ख्रीष्ट खुङक्याइ लागी ङाःर्तोक क्याःप्केन तोः च्योःङ्रा काःल्सी। 33दीइ बारेला छ्येइ पेज्याला एःन्डुबा प्रुःदी एः,
“तादो, ङाः सीयोनला ङाःर्तोक क्याःप्केन तोः चीग ज्यागेन एः,
ओःले ओः तोःला माःङ्बुरा मीःक्या ङाःर्तोक फोदी रीःल्गेन एः,
इःनाङ खुङला सेमल्हुक लुगेन्दी सुङ ङोःछाबु मेःयोङेन एः।”#यशैया २८:१६
Currently Selected:
रोमी 9: SYW
Highlight
Share
Compare
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
