रोमी 10
10
1ङाःइ आतानोःक्या ओःले आजीनोःमोक्या, कोन्ज्योइ इस्राएलीक्याला थार्च्युज्युक लाःती ङाःइदी छ्योम्बो सेम एः। ओः सोङ्गारा, खुङक्या थार्च्युक लाःती ङाः कोन्ज्यो ङीमु प्रार्थना पेःउए। 2खुङक्याइ कोन्ज्योला सेम नाःङ मीःजीकरा मेःबा पेःजे छोल्गुए लाःती ङाः पाङ्बु तेर्के, इःनाङ खुङक्याइ तेःन्दामले कोन्ज्योला मेःबा पेःगेन ताम सेदी म्याः। 3कोन्ज्योइ मीःक्याला खुङगीइ तोःङ्ला ताःक्पा जोगेन लाःमगीइ बारेला खुङक्याइ मासे। इःनाङ खुङक्या छ्येइ ठीमला ङीःन्दी कोन्ज्योइ तोःङ्ला ताःक्पा ओःङ्जे छोल्सी। ओःन्डु पेःदी खुङक्याइ कोन्ज्योइ तोःङ्ला ताःक्पा ओःङेन लाःमला पोःर्ती एः। 4चीलेलाःना सेमल्हुक लुगेनक्या थाम्जेरला कोन्ज्योइ तोःङ्ला ताःक्पा ओःङ्जे खुज्युक लाःतीरा ख्रीष्टकीइ छ्येइ ठीम सीःङ्च्युसी।
थाम्जेरकीइ लागी थार्पा
5छ्येइ ठीम ङीःन्दी ताःक्पा ओःङेन बारेला मोशाइ एःन्डुबा प्रुःदी एः, “छ्येइ ठीम ङीःङेन मीः ओःलाःम्लेरा सेन्ङेन एः।”#लेबी १८:५ 6सेमल्हुकलाःम्ले कोन्ज्योइ तोःङ्ला ताःक्पा थोङेन बारेला छ्येइ पेज्याला एःन्डु लाःती एः, “ख्याइ सेम सेमलारा एःन्डु माःलाःप, ‘याःरला नाःम्खालीङला सु डोगेन्दी?’#व्यवस्था ३०:१२ (ङाःइ लाःचे छोल्क्योकदी ख्रीष्टला माःर्ला ख्योङ्जेला याःरला नाःम्खालीङला सु डोगेन्दी?)” 7ओःले राःङगीइ सेम सेमलारा एःन्डुङ माःलाःप, “सीक्योक्या एःसाला सु डोगेन्दी?”#व्यवस्था ३०:१३ (ङाःइ लाःचे छोल्क्योकदी ख्रीष्टला सीक्योक्या एःसाले याःरला ख्योङ्जेला सीक्योक्या ओःला सु डोगेन्दी?) 8इःनाङ दीखोइ ची लाःकुबा? “लेःङ्गो ख्याक्याइ थामालारा एः, ख्याक्याइ खाला ओःले सेमला एः।”#व्यवस्था ३०:१४ दीखोरा लेःङ्गो उःइ मीःक्याला सेमल्हुककीइ बारेला फेल्क्योक लेःङ्गो इःङे। 9ख्याइ येशुला प्रभु इःङे लाःती राःङगीइ खाइ ङीःन्सी लाःना ओःले कोन्ज्योइ खुङला सीक्योकलाःम्ले सोम्बो लोसी लाःती राःङगीइ सेमला सेमल्हुक लुसी लाःना, ख्या थार्केन एः। 10चीलेलाःना मीःइ सेमला सेमल्हुक लुदी चीग्रा कोन्ज्योइ तोःङ्ला ताःक्पा थोङ्जे खुउए ओःले खोइ सेमल्हुक लुक्योक ताम राःङगीइ खाइ ङीःन्दी थार्चे ज्योर्कुए। 11छ्येइ पेज्याइ एःन्डु लाःकुए, “ख्रीष्टला सेमल्हुक लुगेन्दी सुङ ङोःछाबु ओःङेन म्याः।”#यशैया २८:१६ 12चीलेलाःना कोन्ज्योइ तोःङ्ला यहुदी रा राःङ्सा क्युःपाइ मीःक्या थाम्जेर चीग्रा इःङे। प्रभुरा थाम्जेरकीइ प्रभु इःङे, ओःले खुङला सोल्गेनक्याला खुङगीइ बोल्बुले मोलाम तेर्कुए। 13चीलेलाःना छ्येइ पेज्याला एःन्डुले प्रुःदी एः, “प्रभुइ मीःनला सोल्गेन थाम्जेर मीःक्याइ थार्चे ज्योर्केन एः।”#योएल २:३२ 14इःनाङ ख्रीष्टला सेमल्हुक लुदी म्याः लाःना काःन्डुले खुङला सोल्गेन्दी? खुङगीइ बारेला खुङक्याइ नाःमाङ कोःदी म्याः लाःना खुङक्याइ काःन्डुले खुङला सेमल्हुक लुगेन्दी? ओःले खुङगीइ बारेला सुइयाङ लेःङ्गो लाःती म्याः लाःना काःन्डुले खुङक्याइ कोःगेन्दी? 15याःबु लेःङ्गो फेल्जेला सुलाङ माताङ लाःना खुङक्याइ काःन्डुले लेःङ्गो फेल्गेन्दी? छेइ पेज्याला एःन्डुबा प्रुःदी एः, “याःबु लेःङ्गो फेल्गेन मीःक्या ओःङ्गासुना काःजे याःबु ओःङ्गुए!”#यशैया ५२:७
16इःनाङ खुङक्या नाःङ्ला माःङ्बुइरा याःबु लेःङ्गो ङीःन्दी म्याः, चीलेलाःना यशैयाइ एःन्डु लाःती एः, “ए प्रभु, ङीःइ लाःक्योक लेःङ्गो सुइ सेमल्हुक लुबा ले?”#यशैया ५३:१ 17ओः सोङ्गारा, सेमल्हुकदी लेःङ्गो कोःदी ओःङ्गुए, ओःले लेःङ्गोदी ख्रीष्टकीइ बारेला लेःङ्गो लाःती ओःङ्गुए। 18ओःन्डु इःङे लाःना ची खुङक्याइ लेःङ्गो कोःजे ज्योर्ती म्याःपा ले? मीःङे, तेःन्दामरा खुङक्याइ कोःदी एः, चीलेलाःना छ्येइ पेज्याला एःन्डु लाःती एः,
“लेःङ्गो लाःकेन मीःक्याइ के जाम्बुलीङ काःङ्रा कोःदी एः,
ओःले खुङक्याइ लाःक्योक ताम जाम्बुलीङगीइ सुःर सुःरथुप लेप्सीःङ्दी एः।”#भजन १९:४
19ओःन्डु इःङे लाःना ची इस्राएलीक्याइ दी याःबु लेःङ्गो मासेबा ले? मीःङे, खुङक्याइ सेसी। तोःङ्लारा कोन्ज्योइ मोशालाःम्ले खुङक्याला एःन्डु लाःती एःके,
“क्युःपारा म्याःक्योक मीःक्याला दाम्दी,
ङाः ख्याक्याइ सेमला मीसेर पेःच्युगे,
ओःले चीङ मेसेगेन क्युःपालाःम्ले,
ङाः ख्योक्याला सीःताङ लाङे।”#व्यवस्था ३२:२१
20कोन्ज्योइ लाःक्योक ताम खुङगीइ लेःङ्गो तेर्केन यशैयाइ जीबारा माःबेबा एःन्डु लाःकुए,
“ङाःला छोल्रा मेःछोल्गेन मीःक्याइ ङाःला फ्रेती एः,
ओःले ङाःइ बारेला टीःरा मीःटीगेन मीःक्या साःला ङाःइ राःङला तेङ्सी।”#यशैया ६५:१
21इःनाङ इस्राएलगीइ बारेला कोन्ज्योइ एःन्डु लाःकुए,
“ङाःइ ताम मेःकोगेन्दी ओःले ङाःला टाःलाङ पेःगेन मीःक्याला केक्याःप्चेला
ङाःइ ङीःमा काःङ राःङगीइ लाःक्पा फेल्दी तेःसी।”#यशैया ६५:२
Currently Selected:
रोमी 10: SYW
Highlight
Share
Compare
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
