रोमी 8
8
चाङ्मा लालाःम्ले ज्योर्केन मीःली
1ओः सोङ्गारा, ताः येशु ख्रीष्टला एःक्योक थाम्जेर मीःक्याला कोन्ज्योइ दण्ड मेतेर्केन एः। 2चाङ्मा लाइ उः येशु ख्रीष्टला सेमल्हुक लुगेनक्याला सेम्बा मीःली तेर्सी, ओःले उःला लाःयो ओःले सीबुइ ल्हेलाःम्ले थार्च्युदी एः। 3छ्येइ ठीमगीइ उःक्याला थार्च्युमाःखु चीलेलाःना उःक्याइ जुबु लाःयोइ काःङ्क्योक सोङ्गारा उःक्याइ छ्येइ ठीम ङीःन्जे माःखु। इःनाङ छ्येइ ठीमगीइ पेःजे माःखुक्योक लेःगा कोन्ज्योइ पेःसी। मीःक्याइ पेःक्योक लाःयोइ लागी बली ओःङ्जेला कोन्ज्योइ राःङगीइ पुःला उः मीःक्याइ लाःयोइ काःङ्क्योक जुबु च्योःङ्रारा जुबुला ताङ्सी, ओःले उःक्याइ लाःयोला खुङगीइ जुबुलारा सीःङ्दा चेसी। 4छ्येइ ठीमगीइ लाःक्योक तामक्या थाम्जेर उःक्याखाला छाङ्ज्युक लाःती कोन्ज्योइ ओःन्डु पेःसी, चीलेलाःना ताः उःक्या उःइ जुबुइ सेम थेक्योक च्योःङ्रा पेःदी मीःङे, इःनाङ चाङ्मा लाइ सेम पेःक्योक च्योःङ्रा पेःदी मीःजी ताङ्गुए। 5जुबुइ सेम पेःक्योक तामक्या च्योःङ्राले मीःली ताङेनक्याइ राःङगीइ सेम जुबुइ तामक्याला तेर्कुए, इःनाङ चाङ्मा लाइ सेम पेःक्योक च्योःङ्राले मीःली ताङेनक्याइ नी चाङ्मा लाइ तामक्याला सेम तेर्कुए। 6जुबुइ सेम पेःक्योक तामक्याला चीग्रा सेम तेर्केन मीःक्या सीगेन एः, इःनाङ चाङ्मा लाइ सेम पेःक्योक तामक्याला सेम तेर्केन मीःक्याइ मीःली ओःले खाम्साङ्बु ज्योर्केन एः। 7चीलेलाःना जुबुइ सेम पेःक्योक तामक्याला सेम तेर्केन मीःक्याइ कोन्ज्योला टाःलाङ पेःउए, ओःले खुङक्याइ कोन्ज्योइ छ्येइ ठीमला मीःङीन एः ओःले तेःम्बारा ङीःन्जेङ मीःखुए। 8जुबुइ सेम पेःक्योक तामक्याइ आङ्ज्याला एःक्योक मीःक्याइ कोन्ज्योला केःदाङ जोजे मीःखुए।
9तेःन्दामरा कोन्ज्योइ ला ख्याक्या नाःङ्ला तेःती एः लाःना, ख्याक्या जुबुइ सेम पेःक्योक तामक्याइ आङ्ज्याला मेःयोङेन एः, इःनाङ ख्याक्या चाङ्मा लाइ आङ्ज्याला ओःङ्गुए। काःखोङ मीः ङीमु ख्रीष्टकीइ ला म्याः लाःना खुङ ख्रीष्टकीइदी मीःङे। 10इःनाङ ख्रीष्ट ख्याक्या नाःङ्ला तेःती एः लाःना, लाःयोइ पेःगासुना ख्याक्याइ जुबु सीनाङ, चाङ्मा लाइ ख्याक्याला मीःली तेर्केन एः चीलेलाःना कोन्ज्योइ ख्याक्याला ताःक्पा जोदी एः। 11येशुला सीक्योकलाःम्ले सोम्बो लोगेन कोन्ज्योइ ला ख्याक्या ङीमु एः लाःना, ख्रीष्टला सीक्योकलाःम्ले सोम्बो लोक्योक च्योःङ्रा ख्याक्याइ जुबु सीदी डोनाङ ख्याक्या नाःङ्ला एःक्योक खुङगीइ लालाःम्ले ख्याक्याला कोन्ज्योइ मीःली तेर्केन एः।
12ओः सोङ्गारा, आतानोःक्या ओःले आजीनोःमोक्या, उःक्याइ उःइ जुबुइ सेम पेःक्योक च्योःङ्रारा मीःजी सेन्कोः लाःती उःक्याला कर म्याः। 13चीलेलाःना ख्याक्या जुबुइ सेम पेःक्योक च्योःङ्राले मीःजी सेन्गुए लाःना ख्याक्या सीगेन एः, इःनाङ ख्याक्याइ लाःयोइ काःङ्क्योक लेःगाक्याला चाङ्मा लाःलाःम्ले सेसी लाःना ख्याक्या सेन्ङेन एः। 14चीलेलाःना कोन्ज्योइ चाङ्मा लाइ तेङ्क्योक लाःमला डोगेन मीःक्यारा कोन्ज्योइ पुःपोःमोक्या इःङे। 15चीलेलाःना ख्याक्याला लाबु जोदी जीबाला ज्यागेन ला ख्याक्याइ ज्योर्ती म्याः, बरु ख्याक्याला कोन्ज्योइ पुःपोःमोक्या जोगेन ला ज्योर्ती एः। ओःखोरा लालाःम्ले उःक्या कोन्ज्योला, “अब्बा#८:१५ अब्बा दी शब्द आरामीक तामलाःम्ले आःबा लाःक्योक इःङे।, आःबा!” लाःती केक्याःप्कुए। 16चाङ्मा लाइ राःङगीइरा उःक्या कोन्ज्योइ पुःपोःमोक्या इःङे लाःती उःक्याइ लाला पाङ्बु तेर्कुए। 17उःक्या कोन्ज्योइ पुःपोःमोक्या सोङ्गारा, उःक्या हकवालालाङ इःङे, कोन्ज्योइ हकवाला ओःले ख्रीष्ट ङीमुदी पीमा हकवाला इःङे। उःक्या ख्रीष्ट ङीमु तुःक्पु खुर्कुए लाःना खुङ ङीमुरा महीमा ज्योर्केन एः।
तीङ्ला ज्योर्केन महीमा
18ङाःइ तेःन्दामरा सेदी एः, ताःसे उःक्याइ खुर्क्योक तुःक्पुक्या नी कोन्ज्योइ उःक्याला तीङ्ला तेङ्तेर्केन महीमा ङीमु कार्चेला डीक्पु म्याः। 19कोन्ज्योइ राःङगीइ पुःपोःमोक्या तेङेन ङीःमा तजेला कोन्ज्योइ जोक्योक थाम्जेर स्याःक्याइ माःङ्बुरा छ्योम्बो रेःवा पेःदी कुःदी तेःती एः। 20चीलेलाःना कोन्ज्योइ जोक्योक थाम्जेर स्याःक्या लेःगारा म्याःक्योक काःल्दी एःके। एःन्डुबा राःङगीइ सेमगीइ काःल्दी म्याःके, इःनाङ कोन्ज्योइ सेम पेःक्योक सोङ्गारा एःन्डुबा काःल्सी। कोन्ज्योइ जोक्योक थाम्जेर स्याःक्याइ रेःवा पेःदीरा तेःच्युक लाःती खुङगीइ एःन्डु पेःदी एःके। 21ओःले ओः रेःवादी एःन्डुबा एःके, कोन्ज्योइ जोक्योक थाम्जेर स्याःक्या रुःल्दी डोगेन आङ्ज्यालाःम्ले थार्केन एः ओःले ओःक्याइ कोन्ज्योइ पुःपोःमोक्या ङीमुरा महीमा ओःले ताःम्साङा ज्योर्केन एः। 22उःक्याइ छोर्तीरा एः, कोन्ज्योइ जोक्योक थाम्जेर स्याःक्याइ पेःन्पीःजाइ पीःजामा नाःजाइ सुःक्याइ च्योःङ्रा ताःसेथुप खुम्बु तेङ्तेःती एः। 23जोक्योक स्याःक्याइ चीग्रा मीःङे, उःक्याङ नाःङ नाःङ्लारा खुम्बु तेङ्देरा एः। कोन्ज्योइ ताःम्ज्या पेःक्योक तामगीइ तोःङ्गीइ बो च्योःङ्रा पेःदी उःक्याइ चाङ्मा ला ज्योर्ती एः। ताः कोन्ज्योइ उःक्यालाङ खुङगीइ राःङगीइ पुःपोःमोक्या जोउए ओःले उःक्याइ जुबुला थाम्जेर माःइबा तामक्यालाःम्ले ताःम्साङा जोउए लाःती कुःतेःती एः। 24चीलेलाःना उःक्याला कोन्ज्योइ थार्च्युगासुना उःक्याला दीखो रेःवा तेर्ती एःके। रेःवा लाःक्योकदी उःक्याइ माःज्योर्क्योक तामक्याला कुःदी तेःचे इःङे, चीलेलाःना ज्योर्सीःङ्क्योक तामक्याला नी सुइ रेःवा पेःउबा ले? 25इःनाङ उःक्याइ माःज्योर्क्योक स्याःक्याला रेःवा पेःउए लाःना, उःक्या ओःखोइ लागी नादीमाराङ कुःदी तेःकुए।
26ओःन्डुरा पेःदी चाङ्मा लाइयाङ उःक्या कमजोरी एःक्योक तीःजीला रोः पेःउए। काःन्डुले प्रार्थना पेःकोन्दी इःङे ओःखो उःइ सेदीम्याःनाङ चाङ्मा ला राःङगीइरा उः मीःक्याइ तामगीइ लाःती लाःचे मीःखुगेन तामगीइ खुम्बु तेङ्दी उःइ लागी प्रार्थना पेःतेर्कोए। 27कोन्ज्योइ थाम्जेर मीःक्याइ सेमगीइ तामक्या सेउए, ओःले खुङगीइ चाङ्मा लाइ ची लाःतेरा एःपा ओः तामक्याङ सेउए, चीलेलाःना कोन्ज्योला सेम थेक्योक च्योःङ्राले चाङ्मा लाइ कोन्ज्योइ मीःक्याइ लागी प्रार्थना पेःतेर्कुए।
28कोन्ज्योला च्याःम्बु पेःगेन मीःक्याइ लागी थाम्जेर तामक्याला कोन्ज्योइ याःबु पेःउए ओःले खुङक्याला कोन्ज्योइ सेम पेःक्योक तेःदाम च्योःङ्राले केक्याःप्क्योक ओःङ्गुए लाःती उःइ छोर्ती एः। 29कोन्ज्योइ राःङगीइ मीःक्याला तोःङ्लाःम्लेरा ङोःसेसी, ओःले खुङक्याला राःङगीइ पुः च्योःङ्रारा ओःङ्ज्युक लाःती दाम्सी। एःन्डुले खुङगीइ पुःदी माःङ्बुरा आतानोःक्या ओःले आजीनोःमोक्या नाःङ्ला छेस्यो काःल्सी। 30काःखो काःखोला कोन्ज्योइ तोःङ्लाःम्लेरा दाम्बा, कोन्ज्योइ खुङक्याला केक्याःप्सीङ, ओःले काःखो काःखोला खुङगीइ केक्याःप्पा, खुङक्याला कोन्ज्योइ ताःक्पाङ जोसी, ओःले काःखो काःखोला कोन्ज्योइ ताःक्पा जोबा, खुङक्याला कोन्ज्योइ महीमाङ तेर्सी।
येशु ख्रीष्टला कोन्ज्योइ च्याःम्बु
31ओः सोङ्गारा, ताः दी तामक्याइ बारेला उःइ ची लाःका ले? कोन्ज्यो उःछ्योले एः लाःना उःला सुइ टाःलाङ पेःजे खुडो ले? 32खुङगीइ राःङगीइ चीग्रा चीग पुःला नी माःपोःर, इःनाङ उः थाम्जेरकीइ लागी तेर्सी। उःइ लागी कोन्ज्योइ राःङगीइ पुः नी तेर्कुए लाःना, ची खुङगीइ उःला थाम्जेर स्याःक्याङ मेतेर्टो ले? 33कोन्ज्योइ दाम्क्योक मीःक्याला सुइ माःताक्पा च्याःङ्जे खुडो ले? सुइयाङ मीःखुए, चीलेलाःना कोन्ज्यो राःङगीइरा खुङक्याला ताःक्पा जोदी एः। 34ताः खुङक्याला सुइ दण्ड तेर्चे खुडो ले? सुइयाङ मीःखुए। येशु ख्रीष्ट उःक्याइ लागी सीसी, ओःजे चीग्रा मीःङे खुङ सीक्योकलाःम्ले फीर्च्या सोम्बो लोःसी, ओःले ताःसे खुङ कोन्ज्योइ च्याःबु लाःक्पाछ्योले तेःती एः, ओःले खुङगीइ उःइ लागी कोन्ज्यो ङीमु वासी पेःतेर्कोए। 35ताः सुइ उःक्याला ख्रीष्टकीइ च्याःम्बुमीःजीक खाफ्याजे खुडो ले? ची तुःक्पु रा काःबुइ, ची मीःक्याइ तुःक्पु तेर्ती, ची मुःगीइ, ची उःइ जुबुला केःङ्जेला केःला म्याःक्योक सोङ्गारा, ची छ्योम्बो खतराला लेप्टो लाःती, ची तरवारकीइ? 36छ्येइ पेज्याला एःन्डुबा प्रुःदी एः,
“ख्याक्याइ पेःगासुना मीःक्याइ ङीःला ङीःमारी टाःङ्मा सेचे छोल्गुए,
ओःले ङीःक्या नी सेचेला डीक्पु जोज्याक्योक लुःकक्या च्योःङ्रा इःङे।”#भजन ४४:२२
37इःनाङ उःक्याला च्याःम्बु पेःगेन ख्रीष्टलाःम्ले उःक्याइ दी थाम्जेर तामक्याला क्याःल्दी एः। 38चीलेलाःना ङाःइ दी याःबु पेःदी छोर्ती एः, काःन्दीङ तामगीइ उःक्याला कोन्ज्योइ च्याःम्बुलाःम्ले खाफ्याजे मीःखुए। ओःखो सीबुइ एःनाङ एःच्युक मीःलीइ एःनाङ एःच्युक, स्वर्गदुतक्याइ एःनाङ एःच्युक शैतानगीइ एःनाङ एःच्युक, ताःसेइ तामक्याइ एःनाङ एःच्युक तीङ्ला ओःङेन तामक्याइ एःनाङ एःच्युक, ल्हेक्याइ एःनाङ एःच्युक, 39युःखाइ तामक्याइ एःनाङ एःच्युक वाःइ तामक्याइ एःनाङ एःच्युक, कोन्ज्योइ जोक्योक काःखोरा स्याःक्याइ एःनाङ एःच्युक, उःइ प्रभु येशु ख्रीष्टला एःक्योक कोन्ज्योइ च्याःम्बुमीःजीक उःला काःन्दीङ स्याःक्याइ खाफ्याजे मीःखुए।
Currently Selected:
रोमी 8: SYW
Highlight
Share
Compare
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
