रोमी 7
7
याःर्काइ पेदाम
1आतानोःक्या ओःले आजीनोःमोक्या, ङाः दी ताम ख्याक्या छ्येइ ठीम सेगेनक्याला लाःतेरा एः। ची ख्याक्याइ छोर्ती म्याःपा, मीः सेसेनथुप चीग्रा खोला छ्येइ ठीमगीइ ताःम्क्योक ओःङ्गुए? 2उदाहरणगीइ लागी, याःर्का क्याःप्क्योक पेःन्पीःजा राःङगीइ ख्योबो मासीथुप खुङला याःर्काइ ठीमगीइ ताःम्क्योक ओःङ्गुए, इःनाङ ख्योबो सीसी लाःना मोः याःर्काइ ठीमलाःम्ले खाफ्याउए। 3ओः सोङ्गारा, मोः राःङगीइ ख्योबो एःकासुना एःकासुनाराङ राःङ्सा ख्य्वापीःजा ङीमु याःर्का क्याःप्कुए लाःना मोःइ व्यभीचार पेःउए। इःनाङ मोःइ ख्योबो सीसी लाःना मोः ओः याःर्काइ ठीमलाःम्ले खाफ्याउए, ओःले मोः राःङ्सा ख्य्वापीःजा ङीमु याःर्का क्याःप्सी लाःना, मोःइ व्यभीचार पेःक्योक मेःयुङ एः। 4ओः सोङ्गारा, ङाःइ आतानोःक्या ओःले आजीनोःमोक्या, ख्याक्याङ ख्रीष्ट ङीमुरा छ्येइ ठीमला सीसीःङ्दी एः, ओःले सीक्योकलाःम्ले सोम्बो लोःगेन ख्रीष्ट ङीमुरा ख्याक्या चीग काःल्दी एः। ओः सोङ्गारा, ताः उःक्याइ कोन्ज्योइ लागी याःबु लेःगाक्या पेःदी ब्रुम्दोक्या कोःङ्च्युजे खुउए। 5तीःजी चीगला उः राःङगीइ जुबुइ सेम थेक्योक लेःगाक्या पेःदेरा मीःजी ताङ्गुके, ओःले छ्येइ ठीमगीइ उःइ जुबुइ अङ्गक्याला ताःरुङ माःरीक्पा लेःगाक्या पेःजेला सेम पेःच्युसी। ओःले उःइ माःरीक्पा लेःगाइ पेःगासुना उःक्या सीकोःसी। 6इःनाङ ताः उःक्या छ्येइ ठीमगीइ लागी सीसीःङ्क्योक सोङ्गारा उःक्या छ्येइ ठीमलाःम्ले ताःम्साङा काःल्सीःङ्दी एः, ओःले ताः उःक्या ओःखोइ आङ्ज्या वाःला म्याः। ताः उःक्याइ नीङ्बा छ्येइ ठीमगीइ लाःक्योक च्योःङ्राले कोन्ज्योला मेःबा मेःबेए, इःनाङ सेम्बा पेःदी चाङ्मा लालाःम्ले खुङला मेःबा पेःउए।
छ्येइ ठीम ओःले लाःयो
7ओःन्डु इःङे लाःना ताः उः ची लाःका ले? ची छ्येइ ठीम लाःयो इःङे ले? दीखो इःङ्रा मीःङे! छ्येइ ठीम म्याःक्योक इःना नी ङाःइ लाःयो ची इःङे लाःती सेजेरा म्याःके, चीलेलाःना “ख्योइ मीफामु माःबे” लाःती छ्येइ ठीमगीइ माःलाःप्क्योक इःना, मीफामु पेःजेदी लाःयो इःङे लाःती ङाःइ मेःछोर्चे एःके। 8छ्येइ ठीमलाःम्ले मीफामु पेःजे लाःक्योकदी लाःयो इःङे लाःती छोर्मीःजीक ङाःइ तोःङ्गीइ नीङ्बा मीःजीइ थाम्जेर खालगीइ मीफामु पेःजे सेम पेःसी। छ्येइ ठीम म्याःक्योक इःना, लाःयोइदी उःइ जुबुला चीङ आङ्ज्या ओःङ्जे म्याःके। 9तीःजी चीगला ङाःइ छ्येइ ठीम मासेबारा मीःजी ताङ्दी तेःकुके, इःनाङ छ्येइ ठीमगीइ ताम ङाःइ सेमीःजीक ङाःइ लाःयो पेःदी दु लाःती ङाःइ छोर्सी, ओःले ङाः लाःयोइ पेःगासुना सीकोःन्दु लाःतीङ छोर्सी। 10मीःली ख्योङ्कोःन छ्येइ ठीमगीइ नी ङाःइ लागी सीबु का ख्योङ्सी। 11चीलेलाःना लाःयोइ आज्ञालाःम्ले मौका ज्योर्ती ङाःला स्योप क्युःर्सी, ओःले ङाःला ओःखोरालाःम्ले सेसी। 12इःनाङ छ्येइ ठीम ताःरुङाङ चाङ्मा एः, ओःले आज्ञा चाङ्मा, ताःक्पा ओःले याःबु एः। 13ओःन्डु एःना, ची याःबु छ्येइ ठीमगीइ ङाःला सीबुला क्याल्बा ले? ओःन्डुबा मीःङे, याःबु छ्येइ ठीमलाःम्ले लाःयोइ का ङाःला सीबुला क्याल्क्योक इःङे। ओःले छ्येइ ठीमला तसी लाःना लाःयो नी तेःन्दामरा क्युक टोःजे च्योःङ्रा माःरीक्पा ताम इःङे लाःती उःइ थोङ्जे खुउए।
छ्येइ ठीमगीइ उःइ लाःयो तेङ्तेर्कुए
14छ्येइ ठीम चाङ्मा लालाःम्ले ओःङ्क्योक इःङे लाःती नी उःइ छोर्तीरा एः, इःनाङ ङाः नी मीः चीग्रा इःङे, ओःले ङाः ताःक्पुला चोङ्क्योक लाबु च्योःङ्रा, ङाः लाःयोइ लाबु काःल्दी एः। 15ङाःइ ची पेःदेरा एःपा, ओःखो ङाः राःङगीइरा मेसेए। चीलेलाःना ङाःइ सेम पेःक्योक लेःगाक्या ङाः मेःबेए, इःनाङ ङाःइ क्युक्ट्वा पेःक्योक माःइबा लेःगाक्यादी ङाःइ पेःउए। 16ओःन्डुरा पेःदी, ङाःइ पेःगेन लेःगाक्या माःइबा एः लाःती ङाःइ छोर्ती एः लाःना, छ्येइ ठीम याःबु एः लाःती ङाः छ्येइ ठीम ङीमु डीक्क्योक ओःङ्गुए। 17ओः सोङ्गारा, ताः दीखो पेःगेन्दी ङाः मीःङे, इःनाङ ङाः नाःङ्ला तेःकेन लाःयोइ का दी पेःक्योक इःङे। 18चीलेलाःना ङाः लाःयोइ काःङ्क्योक मीः सोङ्गारा, ङाःइ सेमला चीङ याःबु तामक्या म्याः लाःती ङाःइ सेदी एः। चीलेलाःना याःबु लेःगाक्या पेःगेन सेम नी ङाः ङीमु एः, इःनाङ ओःक्या पेःगेन ल्हे ङाः ङीमु म्याः। 19चीलेलाःना ङाःइ सेम पेःक्योक लेःगाक्या ङाः मेःबेए, इःनाङ ङाःइ सेम माःबेक्योक माःरीक्पा लेःगाक्या ङाः पेःदीरा तेःकुए। 20ताः ङाः मेःबे लाःतीङ ओः लेःगाक्यारा ङाःइ पेःउए लाःना, ओः लेःगाक्या पेःगेन्दी ङाः मीःङे, इःनाङ ङाः नाःङ्ला तेःकेन लाःयो इःङे।
21ओः सोङ्गारा, ङाःइ याःबु लेःगा पेःजे छोल्सुना छोल्सुनाङ, माःइबा लेःगा पेःगेन सेम ङाः ङीमुरा दु लाःती ङाःइ छोर्सी। एःन्डुले दी ठीमगीइ ङाःइ मीःजीला लेःगा पेःक्योक ङाःइ फ्रेसी। 22ङाः राःङगीइ सेम नाःङ मीःजीकरा कोन्ज्योइ छ्येइ ठीमला केःदाङ एः। 23इःनाङ ङाःइ जुबुला राःङ्सारा ठीमगीइ लेःगा पेःक्योक ङाःइ थोङ्गुए, ओःले ओःखोइ ङाःइ नावाला एःक्योक ठीमला टाः पेःउए, ओःले ओःखोइ ङाःला ङाःइ जुबुला तेःकेन लाःयोइ ठीमगीइ लाबु जोउए। 24नीउच्य्वाः, ङाः काःन्डुबा तुःक्स्या मीः! दी सीबुइ आङ्ज्याला एःक्योक जुबुमीःजीक ङाःला सुइ थार्च्युडो ले? 25ङाः कोन्ज्योला थुजीछे तेर्के, चीलेलाःना खुङगीइरा ङाःला उःइ प्रभु येशु ख्रीष्टलाःम्ले थार्च्युउए!
ओः सोङ्गारा, ङाः राःङगीइ सेमगीइ नी कोन्ज्योइ छ्येइ ठीमला ङीःन्गुए, इःनाङ ङाःइ जुबुला लाःयोइ ठीम एःक्योक सोङ्गारा, लाःयोइ ङाःइ जुबुखाला आङ्ज्या पेःउए।
Currently Selected:
रोमी 7: SYW
Highlight
Share
Compare
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
