रोमी 6
6
लाःयोला सीबु, ख्रीष्टला मीःजी
1ओःन्डु इःङे लाःना ताः उःक्या ची लाःकेन्दी ले? कोन्ज्योइ उःक्याला ताःरुङ माःङ्बु अनुग्रह पेःउए लाःती ची उःक्या ताःरुङ लाःयोरा पेःदी तेःकेन्दी ले? 2मीःङे, ओःन्डु पेःजे मेःयुङे! ताःमीःजीक उःक्या लाःयोइ आङ्ज्याला म्याः, ओः सोङ्गारा, ताः उःक्याइ फीर्च्या लाःयो पेःदी तेःचे मेःयुङे। 3उःक्याइ येशु ख्रीष्टला बप्तीस्मा ज्योर्सुना खुङ ङीमुरा चीग काःल्दी सीसी लाःकेन ताम ख्याक्याइ छोर्तीरा एः। 4उःक्याङ बप्तीस्मालाःम्ले ख्रीष्ट ङीमुरा सीदी तीःप्ती एः। ओः सोङ्गारा, आबा कोन्ज्योइ राःङगीइ महीमाइ ल्हेलाःम्ले येशु ख्रीष्टला सीक्योकलाःम्ले सोम्बो लोक्योक च्योःङ्रारा उःक्याइयाङ ख्रीष्टकीइ च्योःङ्रारा सेम्बा मीःजी सेन्ङेन एः।
5चीलेलाःना खुङ सीगासुना उःक्याङ खुङ ङीमुरा चीग काःल्दी एः लाःना खुङ सीक्योकलाःम्ले सोम्बो लोःक्योक च्योःङ्रारा उःक्याङ सोम्बो ओःङेन एः। 6लाःयोइ क्याःल्खाप पेःक्योक मीःजी सीःङ्दा डोज्युक, ओःले ताःमीःजीक उःक्या लाःयोइ लाबु माःन्डोज्युक लाःती उःक्याइ तोःङ्गीइ मीःजी ख्रीष्ट ङीमुरा क्रुसला प्याङ्सीःङ्दी एः लाःती उःक्याइ छोर्ती एः। 7चीलेलाःना सीक्योक मीः लाःयोलाःम्ले थार्सीःङ्क्योक ओःङ्गुए। 8ओःले ताः उःक्या ख्रीष्ट ङीमुरा सीदी एः लाःना, उःक्या खुङ ङीमुरा सोम्बोङ लोःगेन एः लाःती उःक्याइ सेमल्हुक लुउए। 9चीलेलाःना उःइ दी ताम छोर्ती एः, ख्रीष्ट सीक्योकलाःम्ले सोम्बो लोःसी, ओःले खुङ फीर्च्या नाःमाङ मीसीगेन एः। ओःले सीबुइ ल्हेइ फीर्च्या खुङला आङ्ज्या पेःजे मीःखुए। 10लाःयोइ आङ्ज्याला क्याःल्जेला ख्रीष्ट तेन्दुइ लागी खेप चीग सीसी, ओःले ताः खुङ कोन्ज्योला महीमा तेर्चेला सेन्गुए। 11ओःन्डुरा पेःदी, ख्याक्याङ लाःयोइ पेःगासुना सीक्योक, ओःले ताः कोन्ज्योला महीमा पेःजेला येशु ख्रीष्ट ङीमुरा सोम्बो काःल्दी एः लाःती टेःम्बा साल्दो। 12ओः सोङ्गारा, दी सीदी डोगेन ख्याक्याइ जुबुला लाःयोला क्याःल्खाप पेःजे मातेर, ओःले ख्याक्याइ जुबुइ सेम थेक्योक माःइबा लेःगाक्या पेःजे मातेर। 13राःङगीइ जुबुइ अङ्गक्याला लाःयोइ लेःगाक्या पेःजेला क्याप माच्योल। इःनाङ सीक्योकलाःम्ले मीःजीला ख्योङ्क्योक मीःक्या च्योःङ्रा राःङला कोन्ज्योला क्याप च्योल्दो, ओःले राःङगीइ जुबुइ थाम्जेर अङ्गक्याला याःबु लेःगाक्या पेःजेला कोन्ज्योला तेर। 14लाःयोइ ख्याक्याखाला क्याःल्खाप पेःगेन म्याः, चीलेलाःना ख्याक्या छ्येइ ठीमगीइ आङ्ज्याला मीःङे, कोन्ज्योइ अनुग्रहइ आङ्ज्याला एः।
याःबु लेःगा पेःगेन लाबुक्या
15ताः ची पेःगा ले? ची उः छ्येइ ठीमगीइ आङ्ज्याला म्याः, इःनाङ कोन्ज्योइ अनुग्रहइ आङ्ज्याला एः लाःती लाःयो चीग्रा पेःगेन्दी ले? ओःन्डु मीःङे! 16ची ख्याक्याइ मेसेबा, ख्या काःखोइ आज्ञा ङीःन्गुबा ख्या ओःखोइ लाबु ओःङ्गुए। लाःयोइ आज्ञा ङीःन्सी लाःना ख्या सीगेन एः, इःनाङ ख्याक्याइ कोन्ज्योइ आज्ञा ङीःन्सी लाःना, ख्याक्या खुङगीइ तोःङ्ला ताःक्पा ओःङेन एः। 17ख्याक्या तोःङ्ला खेप चीग लाःयोइ लाबु एःके, इःनाङ ताःसे ख्याक्याइ लोप्क्योक खालेइ शीक्षाक्या सेम मीःजीकरा ङीःङेन्दी काःल्दी एः। दीखोइ लागी ङाः कोन्ज्योला थुजीछे तेर्के। 18ख्याक्या लाःयोलाःम्ले थार्ती एः, ओःले ताः याःबु लेःगा पेःजेला कोन्ज्योइ लाबु काःल्दी एः। 19ख्याक्याला दी ताम सेजेला काःबु काःल्क्योक सोङ्गारा, ख्याक्याइ सेजे खुज्युक लाःती ङाः ताःक्पु रा लाबुइ तामक्याइ उदाहरण तेर्ती ख्याक्याला दी तामक्या लाःतेरा एः। चीलेलाःना तीःजी चीगला ख्याक्याइ राःङगीइ जुबुइ अङ्गक्याला माचाङ्क्योक ओःले माःइबा लेःगाक्या पेःजेला लाबु च्योःङ्रा क्याप च्योल्दी एःके। ताः ख्याक्या चाङ्मा ओःङ्जेला राःङगीइ अङ्गक्याला कोन्ज्योइ लागी याःबु लेःगाक्या पेःगेन लाबु च्योःङ्रा पेःदी क्याप च्योल्दो। 20ख्याक्या लाःयोइ लाबु एःकासुना कोन्ज्योइ तोःङ्ला डीक्पु एःक्योक लेःगाक्या पेःजे मेःकोके। 21ओः सोङ्गारा, ख्याक्या ताःसे काःखो लेःगाक्याला ङोःछाबु पेःउबा, ओः लेःगाक्यारा तोःङ्ला पेःदी ख्याक्याइ ची खे ज्योर्पा ले? ओः लेःगाक्याइ नी ख्याक्याला सीच्युउए। 22इःनाङ ताः ख्याक्या लाःयोइ आङ्ज्यालाःम्ले थार्ती कोन्ज्योइ लाबु काःल्दी एः, ओःले ख्याक्याइ ज्योर्केन खेलाःम्ले ख्याक्या ताःरुङ माःङ्बु चाङ्मा ओःङ्गुए। दीखोइ ख्याक्याला नाःमाङ मीःसीःङेन मीःली तेर्कुए। 23चीलेलाःना लाःयो पेःगेन मीःक्याइ ज्योर्केन ला लाःक्योक खुङक्या सीकोःउए, इःनाङ कोन्ज्योइ एःन्दाराङ तेर्केन वरदान नाःमाङ मीःसीःङेन मीःली इःङे, ओःले ओः मीःली उःइ प्रभु येशु ख्रीष्टलाःम्ले ज्योर्कुए।
Currently Selected:
रोमी 6: SYW
Highlight
Share
Compare
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
