रोमी 5
5
सेमल्हुक लुदी ज्योर्केन केःदाङ
1उःक्याइ येशुला सेमल्हुक लुक्योक सोङ्गारा कोन्ज्योइ उःक्याला खुङगीइ तोःङ्ला ताःक्पा जोदी एः। ओः सोङ्गारा, उःइ प्रभु येशु ख्रीष्टकीइ पेःगासुना उःक्या कोन्ज्यो ङीमु डीक्ती एः। 2उःक्याइ ख्रीष्टला सेमल्हुक लुक्योक सोङ्गारा, कोन्ज्योइ उःक्याला अनुग्रह पेःदी एः, ओःले खुङगीइ उःक्याला नीङ च्योःक्योक ताम ताःसे उःक्याइ छोर्ती एः। ओःले कोन्ज्योइ छ्योम्बो महीमाला उःक्याङ खुङ ङीमुरा ओःङेन एः लाःकेन रेःवाला केःदाङ पेःउए। 3ओःजे चीग्रा मीःङे, तुःक्पुइ तीःजीलाङ उःक्या केःदाङ पेःउए चीलेलाःना तुःक्पुइ उःक्याला नाजे लोप्कुए लाःकेन ताम उःइ सेदी एः, 4ओःले तुःक्पु नाखुगेन ल्हेइ उःक्याला याःबु चेपाक्या एःक्योक मीःक्या जोउए, ओःले याःबु चेपाइ उःला रेःवाला राःम्बु जोउए। 5दी रेःवाइ उःला ङोःछाबु मेःजोए, चीलेलाःना कोन्ज्योइ उःला चाङ्मा ला तेर्ती एः ओःले ओः चाङ्मा लाइ उःइ सेमला कोन्ज्योइ च्याःम्बु ज्यातेर्ती एः।
6चीलेलाःना उःक्या राःङरा उःक्याइ लाःयोलाःम्ले थार्चे मीःखुगेन्दी एःकासुनारा, ख्रीष्ट उः लाःयो पेःगेनक्याइ लागी डीक्पु तीःजीला सीसी। 7ताःक्पा मीःइ लागी सीजेला तयार ओःङेन मीः नी फ्रेचेला काःबुरा ओःङ्डो, इःनाङ तेःन्दामरा याःबु मीःइ लागी सुङ सीजेलाङ आ क्याःप्चे खुडो। 8इःनाङ उःक्या लाःयो पेःगेन्दी एःकासुनारा, ख्रीष्टला उःइ लागी सीजेला ताङ्तेर्ती कोन्ज्योइ उःक्याला काःजे माःङ्बु च्याःम्बु पेःउए लाःकेन ताम तेङ्तेर्सी। 9एःन्डुले ख्रीष्टकीइ राःङगीइ ठालाःम्ले उःला कोन्ज्योइ तोःङ्ला ताःक्पा जोसी लाःना ताःरुङ माःङ्बु खुङगीइ उःला कोन्ज्योइ सीःताङलाःम्ले थार्च्युगेन एः। 10चीलेलाःना उः कोन्ज्योइ टाःलाङ एःकासुनारा खुङगीइ पुः उःइ लागी सीसी ओःले ख्रीष्टकीइ सीबुलाःम्ले कोन्ज्योइ उःला खुङ ङीमु डीक्च्युदी एः लाःना, ताः उः कोन्ज्यो ङीमु डीक्क्योक सोङ्गारा, तेःन्दामरा कोन्ज्योइ उःला ख्रीष्टकीइ मीःजीलाःम्ले सेन्च्युगेन एः। 11ओःजे चीग्रा मीःङे, उःक्या कोन्ज्योला केःदाङ पेःजे खुउए, चीलेलाःना ताः उःइ प्रभु येशु ख्रीष्टकीइ उःला कोन्ज्यो ङीमु डीक्च्युदी एः।
आदम रा ख्रीष्ट
12आदम मेःन्दा चीगलाःम्ले जाम्बुलीङला लाःयो ओःङ्सी, ओःले लाःयोलाःम्ले सीबु ओःङ्सी। एःन्डुले थाम्जेर मीःक्याइ लाःयो पेःक्योक सोङ्गारा थाम्जेर मीःक्या सीउए। 13छ्येइ ठीम तेर्चे तोःङ्लाङ जाम्बुलीङला लाःयो एःके, इःनाङ छ्येइ ठीम म्याःकासुना, लाःयोइ प्रुःदुक्पाङ म्याःके। 14इःनाङ आदमगीइ तीःजीमीःजीक मोशाइ तीःजी थुपकीइ थाम्जेर मीःक्या सीसी। खुङक्याइ आदमगीइ च्योःङ्रा कोन्ज्योइ आज्ञा माःङीःन्बा लाःयो नी पेःदी म्याःके, इःनाङ खुङक्या थाम्जेर सीसी।
ओः आदमदी तीङ्ला ओःङेन ख्रीष्ट च्योःङ्रा एःके। 15इःनाङ कोन्ज्योइ एःन्दाराङ तेर्क्योक वरदान नी आदमगीइ लाःयो च्योःङ्रा मीःङे। चीलेलाःना मेःराङ चीग मीःइ पेःक्योक लाःयोइ पेःगासुना थाम्जेर मीःक्या सीसी लाःना, ताःरुङ माःङ्बु कोन्ज्योइ अनुग्रह ओःले मेःराङ चीग मीः येशु ख्रीष्टकीइ नीङ च्योःदी एःन्दाराङ ओःङ्क्योक वरदान थाम्जेर मीःक्याइ लागी बोल्बु काःल्सी। 16कोन्ज्योइ तेर्क्योक वरदान आदमगीइ पेःक्योक लाःयो च्योःङ्रा मीःङे। चीलेलाःना आदमगीइ पेःक्योक लाःयो चीगकीइ पेःगासुना थाम्जेर मीःक्याइ दण्ड ज्योर्सी। इःनाङ कोन्ज्योइ तेर्क्योक वरदानगीइ मीःक्याइ पेःक्योक माःङ्बुरा लाःयोक्या फ्यातेर्ती एः ओःले खुङगीइ तोःङ्ला खुङक्याला ताःक्पा जोसी। 17दी तेःन्दामरा इःङे, मेःराङ चीग मीःइ पेःक्योक लाःयोइ पेःगासुना थाम्जेर मीःक्या सीकोःउए। ओःन्डुलेरा ताःरुङ माःङ्बु पेःदी येशु ख्रीष्ट मेःन्दा चीगकीइ पेःगासुना कोन्ज्योइ अनुग्रह पेःक्योक मीःक्याइ ओःले खुङगीइ तोःङ्ला ताःक्पा काःल्क्योक मीःक्याइ तेःन्दाम मीःली ज्योर्केन एः ओःले खुङलाःम्ले आङ्ज्या पेःगेन एः।
18ओः सोङ्गारा, लाःयो चीगकीइ पेःगासुना थाम्जेर मीःक्याइ दण्ड खुर्कोःसी, ओःन्डुरा पेःदी याःबु लेःगा चीगकीइ पेःगासुना थाम्जेर मीःक्या कोन्ज्योइ तोःङ्ला ताःक्पा काःल्सी ओःले मीःली ज्योर्केन्दी काःल्सी। 19चीलेलाःना आदम मेःराङ चीगकीइ कोन्ज्योला माःङीन्क्योक सोङ्गारा थाम्जेर मीःक्या लाःयो पेःगेन्दी काःल्सी, ओःन्डुरा पेःदी ख्रीष्ट मेःराङ चीगकीइ कोन्ज्योइ आज्ञा ङीःन्क्योक सोङ्गारा थाम्जेर मीःक्यारा खुङगीइ तोःङ्ला ताःक्पा ओःङ्जे खुगेन एः।
20मीःक्याइ काःजे माःङ्बु लाःयोक्या पेःदी दुबा लाःती छोर्च्युक लाःती कोन्ज्योइ छ्येइ ठीम तेर्सी। इःनाङ मीःक्याइ ताःरुङ लाःयो पेःदेरा काःल्सी, ओः भन्दाङ माःङ्बु कोन्ज्योइ मीःक्याला अनुग्रह पेःसी। 21ओः तीःनामला लाःयोइ मीःक्याखाला आङ्ज्या पेःसी ओःले थाम्जेर मीःक्या सीसी। ताःसे कोन्ज्योइ अनुग्रहइ मीःक्याखाला क्याःल्खाप पेःतेःती एः। दीखो अनुग्रहइ पेःगासुना मीःक्या कोन्ज्योइ तोःङ्ला ताःक्पा काःल्सी ओःले उःइ प्रभु येशु ख्रीष्टलाःम्ले नाःमाङ मीसीगेन मीःजी ज्योर्ती एः।
Currently Selected:
रोमी 5: SYW
Highlight
Share
Compare
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
