रोमी 12
12
कोन्ज्योला मेःबा पेःगेन मीःली
1ङाःइ आतानोःक्या ओःले आजीनोःमोक्या, कोन्ज्योइ ख्याक्याला माःङ्बु नीङ च्योःदी एः। ओः सोङ्गारा, ख्याक्याइ राःङगीइ जुबुला कोन्ज्योइ तोःङ्ला चाङ्मा ओःले खुङला सेम थेकेन सोम्बो बली च्योःङ्रा पेःदी कोन्ज्योला क्याप च्योल्दो लाःती ङाः ख्याक्याला वासी पेःगे। ख्याक्याइ छ्याक छाल्कोःन तेःन्दामगीइ ताम दीखोरा इःङे। 2ख्याक्या दी जाम्बुलीङगीइ मीःक्याइ डोलुङ तेःलुङ तादी खुङक्या च्योःङ्रा ओःङ्जे माःछोल, इःनाङ ख्या राःङगीइ नावाला सेम्बा जोदी सेम नाःङ मीःजीकरा ख्याक्या राःङ्सा ओःङ्जे खुडो। ओःले ख्याक्याइ ओःन्डु पेःसी लाःना, कोन्ज्योला ची सेम थेकुबा, ची ताम याःबु एःपा, ची तामगीइ खुङला केःदाङ जोउबा, ओःले ची तामला खोट म्याःपा ओः तामक्या ख्याक्याइ सेजे खुगेन एः।
3कोन्ज्योइ ङाःला खुङगीइ लेःङ्गो लाःचेला तेर्क्योक अनुग्रहलाःम्ले ङाः ख्याक्याला लाःके, ख्याक्याइ राःङला काःजे छ्योम्बो टेःम्बा साल्कोःन्दी इःङे ओः भन्दा माःङ्बु टेःम्बा मासाल, इःनाङ कोन्ज्योइ ख्याक्याला काःजे सेमल्हुक तेर्ती एःपा ओःलाःम्ले राःङला याःबुले ठीवा साल्दो। 4उःइ जुबु चीगलारा माःङ्बुरा अङ्गक्या एः ओःले खुङक्याइ लेःगाक्या राःङ्सा राःङ्सारा एः। 5ओःन्डुरा पेःदी उःक्या माःङ्बुरा एःनाङ ख्रीष्टला उःक्या चीग्रा जुबुइदी इःङे ओःले उःक्या थाम्जेरकीइ चीगकीइ राःङ्साला मेःबा पेःउए। 6कोन्ज्योइ राःङगीइ अनुग्रहलाःम्ले उःला राःङ्सा राःङ्सारा वरदानक्या तेर्ती एः। ओः सोङ्गारा, उः दी वरदानक्यालाःम्ले कोन्ज्योइ लेःगाक्या पेःकोःउए। कोन्ज्योइ लेःङ्गो लाःकेन वरदान एः लाःना, राःङगीइदी काःजे सेमल्हुक एःपा ओःलाःम्ले लेःङ्गो लाःच्युक, 7मेःबा पेःगेन वरदान एः लाःना राःङ्साला मेःबा पेःज्युक, लोप्केन वरदान एः लाःना राःङ्साला लोप्च्युक, 8टेःदाम तेर्केन वरदान एः लाःना राःङ्साला टेःदाम तेर्च्युक, तेर्केन वरदान एः लाःना सेम नाःङ मीःजीकरा तेर्च्युक, तोःङ क्याःप्केन वरदान एः लाःना, ओःखोइ याःबु पेःदी तोःङ क्याःप्च्युक, नीङ च्योःगेन वरदान एः लाःना, खोइ केःदाङ पेःदी नीङ च्योःज्युक।
9ख्याक्याइ च्याःम्बु मीःक्याला तेङ्जेइ लागी मीःङे, इःनाङ ओः च्याःम्बु तेःन्दाम ओःङ्कोः। माःरीक्पा लेःगाक्याला क्युक्ट्वा पेःदो ओःले याःबु लेःगाक्या पेःदीरा तेः। 10सेमल्हुक लुगेन मीःक्या सोङ्गारा, चीगकीइ राःङ्साला आतानोःक्याला च्योःङ्रा च्याःम्बु पेःदो ओःले राःङला भन्दाङ माःङ्बु चीगकीइ राःङ्साला सेःसा पेःदो। 11छेर्सी माःबे, इःनाङ मेहनत पेःदी लेःगा पेःदो। लाला जोसीलो काःल्दी प्रभुइ मेःबा पेःदो। 12राःङगीइ रेःवाला केःदाङ पेःदो, तुःक्पुला धैर्य पेःदो, कोन्ज्योला प्रार्थना पेःदीरा तेः। 13कोन्ज्योइ मीःक्याला ताःसुक एःकासुना रोः पेःदो, ख्याक्याइ खीमला ओःङ्क्योक डोम्बोक्याला तोःङ्ज्याङ पेःदो। 14ख्याक्याला तुःक्पु तेर्केन मीःलाक्याला मोलाम तेर, खुङक्याला खाम्सी माःक्याःप, बरु खुङक्याला मोलाम तेर। 15केःदाङ पेःगेनक्या ङीमु केःदाङ पेःदो, ङुःगेनक्या ङीमु ङुःतेर। 16थाम्जेर ङीमु डीक्तो। ङाःरा इःम्बा माचा, बरु छ्यामे मीःक्या ङीमुङ डीक्ती तेः। ओःले ङाःरा सेबु माचा।
17मीःइ ख्योला माःइबा पेःसी लाःसुनारा खोला माःइबा माःबे। थाम्जेर मीःक्याइ तोःङ्ला ची याःबु एःपा ओःखोला सेम तेर। 18ख्याक्याइ खुबाथुप थाम्जेर ङीमु डीक्ती तेः। 19ङाःइ च्याःम्बु पेःक्योक रोःक्या, सुइयाङ ख्याक्याला माःइबा पेःसी लाःना ओःखोइ कीम्बा माःलेङ। इःनाङ दी लेःगा कोन्ज्योइ सीःताङला ज्यो। चीलेलाःना छ्येइ पेज्याला एःन्डुबा प्रुःदी एः, प्रभुइ लाःसी, “कीम्बा लेःङेन लेःगा ङाःइदी इःङे, ङाःरा कीम्बा लेःङे।” 20बरु, “ख्योइ टाःलाङ तोःपा तोदी एः लाःना खोला साःगेन स्याः तेर, खोला कोम्जे लाःङ्दी एः लाःना छ्यु थुङ्जे तेर।”#हीतोपदेश २५:२१-२२ एःन्डु पेःसी लाःना ख्योइ खोइ गोला मेःबुङ चीःगेन एः। 21माःरीक्पाइ ख्योला माःक्याःल्ज्युक, इःनाङ ख्योइ याःबु पेःदी माःरीक्पाला क्याःल्खुज्युक।
Currently Selected:
रोमी 12: SYW
Highlight
Share
Compare
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
