रोमी 11
11
इस्राएलीक्याखाला कोन्ज्योइ नीङच्य्वाः
1ओःन्डु इःङे लाःना ङाः टीःगे, ची कोन्ज्योइ राःङगीइ मीःक्या इस्राएलीक्याला पोःर्क्योक इःङे ले? मीःङे, चीलेलाःना ङाःङ अब्राहामगीइ छार्क्युफुर्क्यु इःङे, बेन्यामीन कुललाःम्ले केक्योक इस्राएली इःङे। 2कोन्ज्योइ तोःङ्लारा दाम्क्योक क्युःपाला खुङगीइ पोःर्ती म्याः। कोन्ज्योइ लेःङ्गो तेर्केन एलीयाइ बारेला छ्येइ पेज्याइ लाःक्योक ताम नी ख्याक्याइ छोर्तीरा एः। एलीयाइ इस्राएलीक्याइ वीरुद्धला कोन्ज्यो ङीमु एःन्डु लाःती एःके, 3“ए प्रभु, खुङक्याइ ख्याइ लेःङ्गो तेर्केनक्याला सेसी ओःले ख्याइ वेदीक्याला रोम्तेर्सी, ओःले सेन्दी तेःक्योकदी ङाः चीग्रा एः ओःले ङाःलाङ सेचेला खुङक्याइ छोल्देरा एः।”#१ क्याःल्बु १९:१०,१४ 4इःनाङ कोन्ज्योइ खोला ची लेःन तेर्पा? “बाल ल्हाइ तोःङ्ला पीमु माचुक्योक हाजार तीःन ख्य्वापीःजाक्याला ङाःइ लागी ज्यादी एः।”#१ क्याःल्बु १९:१८ 5एःन्डुलेरा ताःसेङ कोन्ज्योइ अनुग्रह पेःदी दाम्क्योक चीङ इस्राएलीक्या लीःती एः। 6दी नी कोन्ज्योइ अनुग्रहइ पेःदी काःल्क्योक इःङे, खुङक्याइ पेःक्योक लेःगाइ पेःदी मीःङे, मीःङे लाःना कोन्ज्योइ अनुग्रह पेःक्योक एःन्दाराङ डोजे एःके।
7ओःन्डु इःङे लाःना दीखोइ लेःन ची इःम्बा ले? इस्राएलीक्याइ राःङगीइ छोल्क्योक ताम माःज्योर, इःनाङ कोन्ज्योइ दाम्क्योक तीबी चीग इस्राएलीक्याइ चीग्रा ओःखो ज्योर्सी। राःङ्सा लीःक्योक इस्राएलीक्याइदी सेम ताःम्बु पेःदी तेःसी। 8छ्येइ पेज्याला एःन्डुबा प्रुःदी एः,
“कोन्ज्योइ खुङक्याला सीलोक च्योःङ्रा ला तेर्सी।
ओःले खुङक्याइ मीइ थोङ्जे मीःखुए
ओःले नाम्ज्योइ कोःजे मीःखुए,
ओःले ताःसेथुपाङ खुङक्या ओःन्डुबारा एः।”
9ओःन्डुलेरा दाऊद क्याःल्बुयाङ एःन्डु लाःती एः,
“खुङक्या डेन साःदेरा एःसुनारा जुम्ज्युक ओःले जीङ्थाकला लेप्च्युक,
ओःले खुङक्या रीःल्ज्युक ओःले दण्ड ज्योर्च्युक।
10खुङक्याइ मी माःथोङ्ज्युक लाःती स्याःर्नाक डोज्युक,
ओःले खुङक्याइ केपा तेन्दुइ लागी कुःदी डोज्युक।”#भजन ६९:२२-२३
11ओः सोङ्गारा, ङाः टीःगे, खुङक्या सीःङ्दा चेती डोजेइ लागीरा ङाःर्तोक क्याःप्ती रीःल्क्योक इःङे ले? ओःन्डु मीःङे। इस्राएलीक्याइ लाःयो पेःक्योक सोङ्गारा खुङक्याला मीसेर पेःच्युजेला, कोन्ज्योइ राःङ्सा क्युःपाइ मीःक्याला थार्च्युसी। 12इःनाङ यहुदीक्याइ लाःयो पेःक्योक सोङ्गारा जाम्बुलीङला मोलाम थोप्सी लाःना, ओःले खुङक्या तोर्क्योक सोङ्गारा राःङ्सा क्युःपाइ मीःक्याइ मोलाम ज्योर्सी लाःना, यहुदीक्याइ स्याबा पेःदी क्योन्ज्योछ्योले लोःगासुना ताःरुङ काःजे माःङ्बु मोलाम ओःङ्डो ठीवा साल्दो ले?
राःङ्सा क्युःपाइ मीःक्याइ थार्चे ज्योर्केन एः
13ताः ङाः ख्या राःङ्सा क्युःपाइ मीःक्याला लाःतेरा एः। ङाःला राःङ्सा क्युःपाइ मीःक्याइ लागी प्रेरीत ओःङ्जेला कोन्ज्योइ दाम्क्योक इःङे, ओः सोङ्गारा, ङाः दी मेःबा पेःगेन लेःगाला तेःन्दामरा सेःसा पेःदी लेःगा पेःगे। 14दी लेःगालाःम्ले ङाः राःङगीइ क्युःपाइ यहुदी मीःक्याङ ख्याक्या ङीमु मीसेर पेःदी सुङ कोन्ज्योछ्योले लोःदी थार्चे खुगे की लाःती ङाःइ रेःवा पेःदी एः। 15चीलेलाःना कोन्ज्योइ इस्राएली क्युःपाक्याला पोःर्सीःङ मीःजीक जाम्बुलीङगीइ मीः कोन्ज्यो ङीमु छ्योरी काःल्सी लाःना, कोन्ज्योइ खुङक्याला फीर्च्याङ राःङगीइदी जोगासुना नी ची खुङक्या सीबुलाःम्ले मीःली ज्योर्क्योक च्योःङ्रारा माःकाल्बा ले?
16खुरा जोजेला च्योप्क्योक चाम्बालाःम्ले चीङ बो तेङ्दी तोःङ्ला कोन्ज्योला भेटी तेर्सी लाःना ओः च्योप्क्योक चाम्बा थाम्जेर चाङ्मा ओःङ्गोए। तोःङ्बोइ चार्ङे कोन्ज्योइदी इःङे लाःना, थाम्जेर याःल्गाक्याङ कोन्ज्योइदीरा इःङे।#११:१६ चार्ङे लाःती अब्राहाम, इसहाक ओःले याकुब लाःक्योक इःङे। ओःले याःल्गाक्या लाःती खुङक्याइ छार्क्युफुर्क्युक्याला लाःक्योक इःङे। 17ओःन्डुलेरा याःबु जैतुनगीइ तोःङ्बोइ चीङ याःल्गाक्या छ्यादी काःल्क्योक च्योःङ्रारा चीङ यहुदीक्याङ कोन्ज्योला पोःर्ती काःल्सी। ख्याक्या राःङ्सा क्युःपाक्यादी रीःइ जैतुनगीइ तोःङ्बो इःङे, इःनाङ ताः ख्याक्या ओः छ्यादी काःल्क्योक याःल्गाक्याइ साटोला कलमी काःल्दी एः। ताः ख्याक्याइ ओः याःबु जैतुनगीइ चार्ङेलाःम्ले ल्हे ओःले मीःली ज्योर्केन एः। 18ओः सोङ्गारा, ओः छ्यादी काःल्योक याःल्गाक्या भन्दा उःक्या याःबु एः लाःती घमण्ड माःबे, चीलेलाःना चार्ङेला खुर्केन्दी नी ख्याक्या मीःङे इःनाङ चार्ङेइ का ख्याक्याला खुर्कोए।
19इःनाङ ख्याक्याइ एःन्डुङ लाःटो, “ङाः ओः तोःङ्बोला कलमी काःल्दी ताःम्जे खुगा लाःती ओः याःल्गाक्याला कोन्ज्योइ तुप्क्योक इःङे।” 20दी ताम तेःन्दामाङ इःङे, खुङक्याइ ख्रीष्टला सेमल्हुक मालुक्योक सोङ्गारा खुङक्याला तुप्क्योक इःङे, ओःले ख्याक्या खुङक्याइ ठाउँला एः चीलेलाःना ख्याक्याइ सेमल्हुक लुउए। दी तामला ख्याक्या घमण्ड माःबे, इःनाङ कोन्ज्योइ जीबा खुर्तो। 21चीलेलाःना कोन्ज्योइ तोःङ्मीःजीकरा एःक्योक याःल्गाक्याला नी माःपोःर लाःना ख्याक्यालाङ मेःपोःर्केन एः। 22ओः सोङ्गारा, कोन्ज्योइ च्याःम्बु ओःले खुङगीइ ताःम्बु सेमला ख्याक्याइ ठीवा साल्दो। सेमल्हुक लुजे पोःर्केनक्याला खुङगीइ सेम ताःम्बु पेःउए ओःले ख्याक्या खुङगीइ नीङच्य्वाः वाःला तेःसी लाःना ख्याक्याला नीङ च्योःउए। मीःङे लाःना ख्याक्यालाङ तुप्क्योक याःल्गा च्योःङ्रा क्युर्केन एः। 23इस्राएलीक्याइ सेमल्हुक लुगाला स्युःसी लाःना कोन्ज्योइ खुङक्याला कलमी पेःदी ताःम्ङेन एः। चीलेलाःना कोन्ज्योइ खुङक्याला फीर्च्याङ कलमी पेःदी ताःम्जे खुगेन एः। 24चीलेलाःना ख्याक्या राःङ्सा क्युःपाइ मीःक्या रीःइ जैतुनगीइ तोःङ्बो च्योःङ्रा एःनाङ कोन्ज्योइ ओः तोःङ्बोलाःम्ले याःल्गाक्या तुप्ती सीःङला चुक्योक जैतुनगीइ तोःङ्बो ङीमु मीःडीक्नाङ कोन्ज्योइ ओःखो ङीमु कलमी पेःदी ताःम्तेर्ती एः लाःना, दी सीःङ्ला चुक्योक तोःङ्बोइ याःल्गाक्याला फीर्च्या ओः जैतुनगीइ तोःङ्बोला कलमी पेःजेला कोन्ज्योला काःजे तेःमु ओःङ्डो ले?
थाम्जेरला कोन्ज्योइ नीङ च्योःउए
25आतानोःक्या ओःले आजीनोःमोक्या, ख्याक्याइ नाःङ तीःङगीइ ताम चीग छोर्च्युक लाःती ङाःइ सेम एः। ओःखो छोर्सी लाःना ख्याक्याइ राःङगीइ लागी देङेन मेतेङेन एः। दी नाःङ तीःङगीइ ताम एःन्डुबा एः, सेमल्हुक लुजेला ओःङ्कोःन चे राःङ्सा क्युःपाइ मीःक्या थाम्जेर ख्रीष्टला माःयुङ्थुप चीग्रा माःङ्बुरा इस्राएलीक्याइ सेम ताःम्बु ओःङेन एः। 26ओः तीङ्ला थाम्जेर इस्राएलीक्या थार्केन एः, दीखोइ बारेला छ्येइ पेज्याला एःन्डुले प्रुःदी एः
“थार्च्युगेन्दीदी सीयोनलाःम्ले ओःङेन एः,
खुङगीइ याकुबकीइ छार्क्युफुर्क्युक्याइ थाम्जेर तीःक्पाक्या क्युर्तेर्केन एः।”#यशैया ५९:२०-२१
27ओःले प्रभुइ लाःसी,
“खुङक्या ङीमु ङाःइ ताःम्ज्या दीखोरा इःङे,
ओःले ङाः खुङक्याइ लाःयोला ठुतेर्के।”#यशैया २७:९
28यहुदीक्या याःबु लेःङ्गोला सेमल्हुक मालुक्योक सोःङ्गारारा खुङक्या ख्याक्याइ तेःन्दाला कोन्ज्योइ टाःलाङक्या काःल्सी, इःनाङ कोन्ज्यो राःङगीइरा खुङक्याइ मेःमे फेबेक्याला दाम्क्योक सोङ्गारा कोन्ज्योइ खुङक्याला ताःरुङाङ च्याःम्बु पेःउए। 29चीलेलाःना कोन्ज्योइ राःङगीइ तेर्क्योक वरदानक्या नाःमाङ लोदी मेःखेर एः ओःले केक्याःप्क्योक्याला नाःमाङ मेःपोर एः। 30ख्या राःङ्सा क्युःपाइ मीःक्याङ तोःङ्ला तीःनाम चीगला कोन्ज्योइ आज्ञा मीःङीङेनक्या काःल्दी एःके, इःनाङ ताःसे इस्राएलीक्याइ कोन्ज्योइ आज्ञाक्या माःङीन्क्योक सोङ्गारा कोन्ज्योइ ख्याक्याला नीङ च्योःक्योक इःङे। 31ताःसे इस्राएलीक्या कोन्ज्योला मीःङीङेनक्या काःल्दी एः। इःनाङ काःन्डुले कोन्ज्योइ ख्याक्याला नीङ च्योःदी एःपा, ओःन्डुलेरा ङीःमा चीग खुङक्यालाङ कोन्ज्योइ नीङ च्योःगेन एः। 32थाम्जेर मीःक्याइ कोन्ज्योला माःङीःन्क्योक सोङ्गारा खुङगीइ खुङक्याला चेङाङला काक्योक च्योःङ्रा जोतेर्सी। खुङगीइ ओः खुङक्या थाम्जेरला नीङ च्योःजे खुज्युक लाःती दीखो पेःक्योक इःङे।
पावलगीइ कोन्ज्योला याःरला क्याक्योक
33ओहो! कोन्ज्योइ क्युः, रीःक्पा ओःले नावा काःजे छ्योम्बो! खुङगीइ सेमला ची एःपा लाःती सुइ सेजे खुउबा ले? ओःले खुङगीइ लाःम सुइ सेजे खुउबा ले?
34“चीलेलाःना प्रभुइ सेमला सुइ सेउबा?
ओःले खुङला सुइ टेःज्याङ तेर्चे खुउबा ले?”#यशैया ४०:१३
35“कोन्ज्योला सुइ ची तेर्चे खुदी एःपा,
ओःले कोन्ज्योइ खोला ओःखो लोकोःन्दी एःपा?”#अय्युब ४१:११
36चीलेलाःना खुङगीइरा थाम्जेर स्याःक्या जोक्योक इःङे, ओःले ओः थाम्जेर खुङगीइ पेःगासुनारा ओःङ्क्योक इःङे ओःले थाम्जेर खुङगीइ लागीरा इःङे। खुङगीइदी तेन्दुरा महीमा काःल्ज्युक! आमेन।
Currently Selected:
रोमी 11: SYW
Highlight
Share
Compare
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
