प्रेरीत 27
27
पावल रोमला काःल्क्योक
1ङीःक्या इटाली देशला डोकोः लाःती हाकीमगीइ ठीवा चेमीःजीक खुङगीइ पावलला राःङ्सा कैदीक्या ङीमु क्याःल्बुइ थेक्याइ कप्तान युलीयसकीइ लाःक्पाला पोःर्तेर्सी। 2एड्रामीटेनोस क्याःसालाःम्ले एशीयाइ इलाकाक्याइ माःङ्बुरा बन्दरगाहक्या पेःदी डोडेन जहाजला ङीःक्या जादी काःल्सी। माकेडोनीयाइ थेसलोनीके क्याःसालाःम्ले ओःङ्क्योक अरीस्तार्खस ङीः ङीमुरा एःके।
3ङार्तो च्योःङ्रा ङीः सीदोन क्याःसाला लेप्सी। ओः ठाउँला कप्तान युलीयसकीइ पावलला च्याःम्बु पेःदी राःङगीइ रोःक्या साःला फ्रेती खुङला कोःकेन तामक्या लेःङ्जे तेर्सी। 4ओःलाःम्ले ङीःक्या फीर्च्या लाःम स्युःसी। इःनाङ जहाजकीइ तोःङ्लाःम्ले ल्हाबा चाल्तीक्योक सोङ्गारा ल्हाबा काजेला ङीःक्या साइप्रस टापुइ सुःरी सुःर पेःदी काःल्सी। 5कीलीकीया ओःले पामफीलीया क्षेत्रइ सुःरला एःक्योक चाङ्बु तार्तीदी ङीः लुकीया क्षेत्रइ माइरा क्याःसाला लेप्सी। 6ओःलाःम्ले कप्तान युलीयसकीइ इटाली देशला डोजे छोल्क्योक अलेक्जेन्ड्रीयाइ जहाज फ्रेसी ओःले खुङगीइ ङीःला ओःखोलारा जाच्युसी।
7ङीःइ माःङ्बुरा ङीःमाथुप कोःलेले जहाज चलाइतीसी ओःले क्नीडस क्याःसाला लेप्सी। ल्हाबाइ ङीःला ओःलाःम्ले तोःङ्ला डोजे मातेर। ओः सोङ्गारा, ङीः क्रेट टापुइ आड लेःङ्देरा सालमोने लाःकेन ठाउँगीइ सुःरलाःम्ले काःल्सी। 8ङीः टापुइ सुःररी सुःर पेःदी काःल्सी ओःले माःङ्बुरा काःबु पेःदी लासीया क्याःसाइ थामाला एःक्योक जेबु बन्दरगाह लाःकेन ठाउँला लेप्सी।
9ङीःक्याइ ओःला लेप्चेला माःङ्बुरा तीःजी क्युर्सीःङ्दी एःके, ओःले ल्हाबालुजुप क्याःप्केन तीःजी थामालारा ओःङ्देरा पेःक्योक सोङ्गारा ओःलाःम्ले तोःङ्ला डोजे उःइ लागी खतरा एःके। ओः सोङ्गारा, पावलगीइ खुङक्याला एःन्डु लाःसी, 10“रोःक्या, उःक्या दीलाःम्ले तोःङ्ला काःल्सी लाःना उःइ क्युःक्याला ओःले जहाजला माःङ्बुरा नोक्सान डोडो ओःले उःक्याङ सीडोराराःरा नेसी।” 11इःनाङ पावलगीइ लाःक्योक तामला भन्दाङ जहाज चलाइ तीगेन्दी ओःले जहाजकीइ तोःप्ताइ लाःक्योक तामला कप्तानगीइ सेम तेर्सी। 12ख्यारीइ दावा ताङ्जेला ओः बन्दरगाह याःबु म्याःके। ओः सोङ्गारा, माःङ्बु च्योःङ्रा मीःक्या काःन्डुलेङ फोनीक्सला लेप्ती ख्यारीइ दावा बीताइतीगेन सेम पेःसी। क्रेट टापुला एःक्योक ओः फोनीक्स बन्दरगाहदी ल्हो-नुःप ओःले च्याःङ-नुःपछ्योले लोःदी एःके।
चाङ्बुला ल्हाबालुजुप ओःङ्क्योक
13ल्होलाःम्ले कोःलेले ल्हाबा क्याःप्काला स्युःसी, ओःले थाम्जेर मीःक्याइ ताः खुङक्या डोजे खुउए लाःती टेःम्बा साल्सी। ओः सोङ्गारा, खुङक्याइ लाङ्गार तेङ्सी ओःले जहाजला क्रेट टापुइ सुःर सुःरलाःम्ले खेर्सी। 14इःनाङ इःक्पु चीग तीङ्लारा टापुलाःम्ले च्याःङ-स्यार लाःकेन छ्योम्बो ल्हाबालुजुप ओःङ्सी। 15ओःखोइ जहाजला क्याःप्सी ओःले ङीःक्याइ जहाजला ल्हाबालुजुपछ्योले खेर्चे माःखु, ओः सोङ्गारा, ङीःइ जहाजला काःछ्योले डोनाङ डोज्युक लाःती पोःर्तेर्सी। 16ङीःक्या क्लौडा लाःकेन छ्यामे टापुला लेप्मीःजीक टापुइ ल्हाबालुजुपला तीबी चीग कातेर्सी। ओःला ङीःइ जहाजकीइ तीङछ्योले ताःम्दी ज्याक्योक टुःला काःबु पेःदी जोगाइतीसी। 17ओःखोला टीःती जहाज नाःङ्ला लुमीःजीक खुङक्याइ जहाजला वाःलेपेःदी थाक्पाक्याइ राःम्बुले ताःम्सी। लीबीयाइ सुःरछ्योले काःलाङ पेःमा नाःङ्ला जहाज स्युःडो ना लाःती खुङक्याला जीबा काःल्सी, ओः सोङ्गारा, जहाज कोःलेले काःल्ज्युक लाःती खुङक्याइ लङ्गर#२७:१७ लङ्गर लङ्गर लाःक्योकदी जहाजला ताःम्क्योक छ्योम्बो पेःर्का इःङे। छ्योम्बो ल्हाबा ओःङ्गासुना छ्युइ हादीइ जहाजला छुरफार मालोज्युक लाःती जहाज चलाइतीगेन मीःइ ओः लङ्गरला चाङ्बुला पाप्तेर्कुए। चाङ्बुला पाप्तेर्सी ओःले जहाजला ल्हाबाइ भरलारा पोःर्तेसी। 18ओः जीबा लाःङ्जे च्योःङ्रा ल्हाबालुजुप चाल्तीदीरा तेःसी, ओः सोङ्गारा, ङार्तो च्योःङ्रा खुङक्याइ जहाजला एःक्योक क्युःक्या चाङ्बुला क्युर्तेर्सी। 19नाङ च्योःङ्रा खुङक्याइ जहाज चालाइतीजेला कोःकेन क्युःक्याङ क्युर्तेर्सी। 20माःङ्बुरा ङीःमाथुप ङीःइ नाः ङीःमा थोङ्बा नाः कार्माक्यारा थोङ्बा। ल्हाबालुजुप छ्योम्बोले चाल्तीदीरा तेःसी ओःले ङीःक्या सेन्गुस्वाँ लाःकेन रेःवाङ तोर्सी।
21मीःक्याइ साःप्च्या माःसाक्योक माःङ्बुरा ङीःमा काःल्सीःङ्दी एःके। ओःले पावलगीइ थाम्जेरकीइ तोःङ्ला लाःङ्दी लाःसी, “आतानोःक्या, ख्याक्याइ ङाःइ ताम कोःकोःन्दी एःके ओःले क्रेटलाःम्ले ओःङ्मेःकोःन्दी एःके, ओःले उःइ एःन्डुबा तुःक्पु ज्योर्चे म्याःके ओःले उःक्याइ क्युःक्याङ नाश मेःन्डोजे एःके। 22इःनाङ ताः ङाः ख्याक्याला वासी पेःगे, साहस पेःदो। ख्याक्या नाःङ्ला सुइदीङ जुबुदी मीसीगेन एः, इःनाङ जहाजदी नष्ट ओःङेन एः। 23चीलेलाःना काःखो कोन्ज्योइदी ङाः इःङे ओःले काःखो कोन्ज्योला ङाःइ मेःबा पेःउबा, ओःखोरा कोन्ज्योइ स्वर्गदुत चीग तीःरीङ कुःङ्मु ङाः साःला ओःङ्सी 24ओःले लाःसी, ‘पावल, माःजी! ख्यो रोमी क्याःल्बुइ तोःङ्ला लाःङ्राकोःउए ओःले ख्याइ पेःगासुना कोन्ज्योइ ख्या ङीमु डोगेन थाम्जेरकीइ जुबु सेन्च्युदी एः।’ 25ओः सोङ्गारा, ङाःइ आतानोःक्या, साहस पेःदो चीलेलाःना ङाः कोन्ज्योला सेमल्हुक लुगे, ङाःला काःन्डुबा लाःपा ओःन्डुबारा ओःङेन एः। 26इःनाङ ताः उःइ जहाज टापुइ च्यार्का तोःला फोगेन एः।”
जहाज चाराप चुरुप काःल्योक
27एःन्डुले एड्रीयास चाङ्बुला ङीःइ जहाजला ल्हाबालुजुपकीइ फुल्क्योककाङ ङीःमा च्युप्सी काःल्सीःङ्दी एःके। नुःप फेला जहाज चालाइतीगेनक्याइ खुङक्या साला लेप्चे चाल्क्योक च्योःङ्रा नेसी। 28ओः सोङ्गारा, खुङक्याइ छ्युइ ओःपतीःङ ताःप्काला स्युःसी। ताःप्कासुना ठु खाल सीःजे ओःपतीःङ फ्रेसी। तीबी चीग फार्ला लेप्मीःजीक फीर्च्या ताःप्कासुना ठु खाल सुम जे ओःपतीःङ फ्रेसी। 29छ्यु ओःपतीःङ म्याःक्योक सोङ्गारा जहाज च्यार्का तोःला फोगे की लाःती खुङक्याला जीबा लाःङ्सी। ओः सोङ्गारा, जहाजकीइ तीङछ्योइ सीःथाल लङ्गर खुङक्याइ पाप्तेर्सी ओःले नाःम लाःङ्ज्युक लाःती प्रार्थना पेःसी। 30ओःले जहाजकीइ तोःङ्गीइ लङ्गर पाप्केन नीहुँ पेःदी छ्योङ्जेला चालाइतीगेनक्याइ टुःला जहाजलाःम्ले पाप्सी। 31इःनाङ पावलगीइ कप्तान ओःले थेक्याला लाःसी, “दी जहाज चालाइतीगेनक्या छ्योङ्सी लाःना उःक्या सुङ मेसेन्ङेन एः।” 32ओः सोङ्गारा, थेक्याइ टुःला ताःम्क्योक थाक्पाक्या तुप्तेर्सी ओःले टुःला छ्युलारा पोःर्तेर्सी।
33नाःम लाःङ्जेरा छोल्गासुना, पावलगीइ मीःक्याला चीङ साःगेन स्याःक्या सोः लाःती वासी पेःसी, “जीबाइ पेःगासुना ख्याक्याइ चीङ माःसाःबारा तेःक्योक ङीःमा च्युप्सी काःल्सीःङ्सी। 34ताः ख्याक्याला ङाःइ वासी एः, चीङ साःगेन स्याःक्या सोः चीलेलाःना सेन्जेइ लागी नी साःराकोःउए। माःजी, उःक्या सुलाङ चीङ मेःयोङेन एः।” 35एःजे लाःती पावलगीइ खुरा लेःङ्सी ओःले थाम्जेरकीइ तोःङ्ला कोन्ज्योला थुजीछे तेर्सी ओःले च्यादीमारा साःगाला स्युःसी। 36राःङ्सा मीःक्याइ साहस ज्योर्सी ओःले चीङ साःगेन स्याःक्या साःसी। 37ओः जहाजला ङीःक्या मेःन्दा क्याः ङी रा खाल सुम रा च्युप्टुःक मीःक्या एःके। 38थाम्जेरकीइ डाङेन पेःदी साःमीःजीक जहाजला याःङ्दी जोजेला खुङक्याइ थाम्जेर न्याः चाङ्बुला क्युर्तेर्सी।
39नाःम लाःङ्मीःजीक जहाज चालाइतीगेनक्याइ चाङ्बुइ सुःरकीइ साला ङोःसेमाःखु। इःनाङ खुङक्याइ खाडी चीग ओःले चाङ्बुइ सुःरला पेःमा एःक्योक ठाउँ चीग थोङ्सी ओःले खुङक्याइ जहाजला ओःछ्योलेरा खेर्केन ठीवा चेसी। 40खुङक्याइ लङ्गरक्या तुप्तेर्सी ओःले चाङ्बुलारा पोःर्तेर्सी। ओः तेःकासुरा खुङक्याइ पतवारक्याला ताःम्दी ज्याक्योक थाक्पाक्याङ सीतेर्सी ओःले तोःङ्छ्योइ पाल लाःङ्दी ल्हाबाछ्योले लोतेर्सी ओःले जहाजला चाङ्बुइ सुःरछ्योले खेर्सी। 41इःनाङ जहाज पेःमाला फोदी ओःलारा भासीइतीसी। जहाजकीइ तोःङ्गीइ बो योःङ्रामीःखुगेन पेःदी ओःलारा अड्कीइतीसी, ओःले तीङगीइ बोदी छ्युइ छालगीइ फोगारा छ्यागाला स्युःसी।
42कैदीक्यादी पौडी चादी चाङ्बुइ सुःरला डोडो ओःले छ्योङ्डो लाःती थेक्याइ थाम्जेर कैदीक्याला सेकेन तेःदाम पेःसी। 43इःनाङ कप्तानगीइ पावलला सेन्च्युगेन सेम पेःदी एःके, ओः सोङ्गारा, खुङगीइ सुलाङ सेचे मातेर। बरु खुङगीइ पौडी चाखुगेनक्यादी तोःङ्लारा जहाजलाःम्ले फीर्ती पौडी चादी चाङ्बुइ सुःरला सुङ लाःती आज्ञा तेर्सी, 44ओःले खुङगीइ राःङ्साक्यादी पाङ्लेकक्याला ओःले जहजगीइ छ्याक्योक टुक्राक्याला जुम्दी फार्केनला सुङ लाःसी। एःन्डुले ङीःक्या थाम्जेर याःबु पेःदी चाङ्बुइ सुःरला लेप्सी।
Currently Selected:
प्रेरीत 27: SYW
Highlight
Share
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
