प्रेरीत 26
26
1ओः तीङ्ला अग्रीपासकीइ पावलला लाःसी, “ताः ख्याला राःङगीइ पक्षला लाःकेन अनुमती एः।” ओःले पावलगीइयाङ लाःक्पा फेल्दी राःङला सेन्च्युजेला एःन्डुले लाःकाला स्युःसी, 2“क्याःल्बु अग्रीपास, यहुदीक्याइ ङाःला माःताक्पा च्याःङ्क्योक थाम्जेर तामक्याइ बारेला ङाःइ तीःरीङ राःङगीइ ताम ख्याइ तोःङ्ला लाःचे ज्योर्कासुना ङाः राःङलारा सोदी ज्योर्क्योक टेःम्बा साल्दी एः। 3ख्याला यहुदीक्याइ ठीमक्या ओःले तर्कवीतर्क पेःगेन तामगीइ बारेला याःबु पेःदी टेःम्बा एःकारा ङाः राःङला ताःरुङ भाग्यमानी नेती एः। ओः सोङ्गारा, ताः ख्या ङीमु वासी पेःगे, ङाःइ ताम याःबु पेःदी कोःतेर।
4ङाः छ्यामेमीःजीकरा यहुदी रीमठीमनाःङ्ला राःङगीइ देशलारा ओःले यरुशलेम क्याःसाला छार्क्योक इःङे। ओः सोङ्गारा, यहुदीक्याइ ङाःला पीःजा एःकासुना मीःजीकरा याःबु पेःदी ङोःसेउए। 5खुङक्याइ तोःङ्मीःजीकरा छोर्ती एः, ङाः उःइ धर्मइ फारीसी लाःकेन कट्टर छोबाइ मीः काःल्दी मीःजी ताङ्गुके। खुङक्याला सेम थेसी लाःना दी ताम खुङक्या राःङगीइयाङ लाःचे खुउए। 6कोन्ज्योइ उःइ फाफामुक्याला पेःक्योक ताःम्ज्याला ङाःइ रेःवा पेःक्योक सोङ्गारा तीःरीङ ङाः एःन्डुले ख्याक्याइ तोःङ्ला ठीम पेःसाला लाःङ्कोःती एः। 7दी ताःम्ज्या ज्योर्केन रेःवा पेःदी उःइ चीङ्ङी कुलक्याइ ङीःमारी टाःङ्मा कोन्ज्योला राःङगीइ सेम नाःङ्ले आराधना पेःउए। आदरणीय क्याःल्बु, ओःखोरा रेःवाइ लागी दी यहुदीक्याइ ङाःला तीःरीङ माःताक्पा च्याःङ्दी एः। 8ख्याक्या चीले कोन्ज्योइ सीक्योकक्याला सेन्च्युउए लाःकेन तामला सेमल्हुक लुजे मीःखुबा?
9इःङ्जे नी, ङाःइयाङ खुबाथुप नासरतकीइ येशुइ वीरोध पेःको लाःती टेःम्बा साल्दी एःके। 10यरुशलेमला ङाःइ ओःन्डुबारा वीरोध पेःसी। ङाःइ छेस्यो पुजाहारीक्यालाःम्ले आङ्ज्या ज्योर्ती प्रभु येशुला सेमल्हुक लुगेन्दी माःङ्बुरा मीःक्याला चेङाङला काच्युसी ओःले खुङक्याला सेकेन लेःगालाङ ङाः ङीःन्सी। 11माःङ्बुरा खेप ङाः जोम्साखीमक्याला काःल्दी तुःक्पु तेर्सी ओःले येशुला सेमल्हुक लुजे पोःर्च्युसी। ङाःला सीःताङगीइ मार्थुम खील्क्योक सोङ्गारा ङाः राःङ्सा देशक्याइ क्याःसाक्यालाङ काःल्दी खुङक्याला तुःक्पु तेर्सी।
राःङ परीवर्तन काःल्योक बारेला पावलगीइ ताम
(प्रेरीत ९:१-१९; २२:६-१६)
12ङीःमा चीग छेस्यो पुजाहारीक्याइ आङ्ज्या ओःले आज्ञा ज्योर्तीमाराङ ङाः दमस्कस क्याःसाछ्योले डोदेरा एःके। 13आदरणीय क्याःल्बु, ओः ङीःमुइ ङीःमा फेला लाःमला डोदेरा पेःगासुना ङीःमाइ ज्योती भन्दाङ चम्कीलो ज्योती चीग नाम्सार्गालाःम्ले ओःङ्दी ङाःखाला ओःले ङाः ङीमुरा काःल्क्योक ङाःइ रोःक्याखाला चम्कीइतीसी। 14ङीःक्या थाम्जेर साला रीःल्सी ओःले हीब्रु तामले एःन्डु लाःक्योक ङाःइ कोःसी, ‘शाऊल, ए शाऊल, ख्योइ ङाःला चीले सताइतीउबा? नोम्बो टीःला टोःक्टेइ क्याःप्सुना ख्योलारा सुःक्याःप्कोए।’ 15ओःले ङाःइ लाःसी, ‘ए प्रभु, ख्या सु इःङे?’ प्रभुइ ङाःला लाःसी, ‘ख्योइ सताइतीक्योक ङाः येशु इःङे। 16ताः लोःङ, ख्योला ङाःइ लाबु ओःले ङाःइ पाङ्बु तेर्केन मीः जोजेला ङाः ख्यो साःला थोङ्क्योक इःङे। ख्योइ ङाःइ बारेला थोङ्क्योक ताम ओःले तीङ्ला ङाः राःङ्रा ख्यो साःला थोङ्गासुना ख्योइ थोङेन तामक्या राःङ्सा मीःक्याला लाःकोःउए। 17ङाः ख्योला यहुदीक्या ओःले राःङ्सा क्युःपाइ मीःक्या ङीक्कारलाःम्ले थार्च्युगे। ङाः ख्योला खुङक्या साःला ताङ्तेर्के, 18ओःले ख्योइ खुङक्याइ मी फ्यादी खुङक्याला नाक्जुकलाःम्ले साङ्बुला ओःले शैतानगीइ ल्हेलाःम्ले कोन्ज्योला ख्योङ्कोःउए। ओःन्डुले खुङक्याइ लाःयो क्षमा ज्योर्केन एः ओःले ङाःखाला सेमल्हुक लुक्योक सोङ्गारा, कोन्ज्यो राःङगीइरा दाम्क्योक मीःक्या ङीमु तेःचे ज्योर्केन एः।’
19क्याःल्बु अग्रीपास, नाःम्खालीङलाःम्ले थोङ्क्योक दर्शनला ङाःइ माःङीन्बाइ तेःचे माःखु। 20तोःङ्ला दमस्कसला ओःले यरुशलेमला, ओः तीङ्ला इस्राएल देश काःङ्रा ओःले राःङ्सा क्युःपाइ मीःक्या साःला ङाः काःल्दी खुङक्याला स्याबा पेःदी लाःयो पोःर्तो ओःले कोन्ज्योछ्योले लोःदो लाःती लेःङ्गो टाःम्सी, ओःले याःबु लेःगाक्या पेःदी खुङक्याइ तेःन्दामरा स्याबा पेःक्योक ताम तेङ्तेर लाःती लोप्सी। 21ओः सोङ्गारा, यहुदीक्याइ ङाःला कोन्ज्योइ मन्दीरला जुम्सी ओःले सेचे छोल्सी। 22इःनाङ तीःरीङगीइ ङीःमाथुप कोन्ज्योइ ङाःला रोः पेःदी एः, ओः सोङ्गारा, छ्यामेक्या ओःले छ्योम्बोक्या ङीक्कारला पाङ्बु तेर्तेरा ङाः दीला लाःङ्दी एः। कोन्ज्योइ लेःङ्गो तेर्केनक्याइ ओःले मोशाइ तीङ्ला ची ओःङेन एःपा लाःती एःके ओः बाहेक माःङ्बु राःङ्सा चीङ ताम ङाःइ लाःती म्याः। 23खुङक्याइ एःन्डु लाःती एःके, ‘थार्च्युगेन ख्रीष्टकीइ तुःक्पु खुर्राकोःउए, ओःले सीक्योकलाःम्ले सोम्बो ओःङेनक्या नाःङ्ला थाम्जेर भन्दा तोःङ्गीइदी ओःङेन एः ओःले खुङगीइ यहुदीक्याला ओःले राःङ्सा क्युःपाक्याला थार्च्युगेन ज्योतीइ बारेला प्रचार पेःगेन एः।’#यशैया ४२:६; ४९:६”
24पावलगीइ लाःक्योक दी ताम कोःदी फेस्तसकीइ खुङला केताङ्दी लाःसी, “पावल, ख्यो ङ्योदु! ख्योइ माःङ्बुरा तामक्या टोःक्योक सोङ्गारा ख्योला ङ्योबाक जोसी!” 25पावलगीइ लाःसी, “आदरणीय फेस्तस, ङाः ङ्योक्योक मीःङे, ङाः तेःन्दामगीइ तामक्या लाःतेरा एः। 26क्याःल्बु अग्रीपासकीइ दीखो थाम्जेर ताम छोर्ती एः, ओःले ङाः दी तामक्या खुङला माःजीबा पेःदी लाःखुँ। दी काःन्दीङ तामक्या खुङलाःम्ले इःप्ती म्याः, चीलेलाःना दीखो ताम माःछोर्पा पेःदी पेःक्योक मीःङे। 27क्याःल्बु अग्रीपास, ची ख्याइ कोन्ज्योइ लेःङ्गो तेर्केनक्याखाला सेमल्हुक लुउबा? ङाःला टेःम्बा एः ख्याइ ल्हुक लुउए।” 28अग्रीपासकीइ पावलला लाःसी, “ची ख्योइ ङाःला याःम्बा चीगलारा ख्रीष्टीयान जोगेन सेम पेःउबा?” 29पावलगीइ लाःसी, “ताःसेरा डोनाङ ओःले तीङ्ला डोनाङ, दी च्याल्दाक्या बाहेक, ख्या चीग्रा मीःङे तीःरीङ दीला ङाःइ ताम कोःदेरा एःक्योक थाम्जेर मीःक्या ङाः च्योःङ्रारा प्रभुला सेमल्हुक लुगेन्दी काःल्ज्युक लाःती ङाः कोन्ज्योला प्रार्थना पेःगे।”
30ओःले क्याःल्बु अग्रीपास, हाकीम फेस्तस, बरनीकी ओःले राःङ्सा थाम्जेर मीःक्या लाःङ्सी। 31खुङक्या थाम्जेर पाङ्ला थेङ्मीःजीक खुङक्या नाःङ्ला एःन्डु लाःतेर ताम लाःसी, “दीखो मीःला चेङाङला काकोन्दी ओःले मृत्युदण्ड तेर्कोःन्दी चीङ लेःगा पेःदी मीःन्दु।” 32ओःले अग्रीपासकीइ फेस्तसला लाःसी, “दीखो मीःइ रोमी क्याःल्बु साःला अपील माःबेक्योक एःना नी पोर्तेनाङ ओःङ्जे एःके!”
Currently Selected:
प्रेरीत 26: SYW
Highlight
Share
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
