प्रेरीत 25

पावलगीइ फेस्तसला अपील पेःक्योक

1फेस्तस हाकीम काःल्मीःजीक राःङगीइ लेःगा पेःजेला खुङ यहुदीया क्षेत्रला ओःङ्क्योक ङीःमा सुम तीङ्ला कैसरीयालाःम्‍ले यरुशलेम काःल्सी। 2ओःला छेस्यो पुजाहारीक्याइ ओःले यहुदीक्याइ तोःङ क्याःप्केन मीःक्याइ पावलगीइ वीरुद्धला उजुर लुसी, 3ओःले पावलला यरुशलेम ताङ्‍तेर लाःती खुङक्याइ फेस्तसला वासी पेःसी चीलेलाःना खुङक्याइ पावलला लाःमला ओःङ्देरा पेःगासुना सेकेन तेःदाम पेःदी एःके। 4इःनाङ फेस्तसकीइ खुङक्याला एःन्डुबा लेःन तेर्सी, “पावलला कैसरीयालारा कादी ज्यादी एः ओःले ङाःङ गेबुरा ओःला डोदेरा एः। 5ख्याक्याइ छेस्यो मीःक्यारा ङाः ङीमु कैसरीयाला डोज्युक, ओःले ओःखो मीःइ चीङ माःइबा पेःदी एः लाःना माःताक्पा च्याःङ्ज्युक।”

6खुङक्याइ कील्‍ला फेस्तस ङीःमा केः च्युःजे यरुशलेमला तेःमीःजीक खुङ कैसरीयाला लोःसी। ङार्तो च्योःङ्‍रा खुङ ठीम पेःसाला तेःती पावलला खेर्च्यो लाःती हुकुम तेर्सी। 7पावल लेप्मीःजीक यरुशलेमलाःम्‍ले ओःङ्क्योक यहुदीक्या खुङगीइ छुरफारले तेःसी ओःले खुङला छ्‍योम्बो छ्‍योम्बो माःङ्बुरा माःताक्पाक्या च्याःङ्सी। इःनाङ खुङक्याइ काःन्दीङ माःताक्पाइ दास्यी तेर्चे माखु। 8पावलगीइ खुङक्याला लेःन लोदी लाःसी, “ङाःइ यहुदीक्याइ ठीमगीइ वीरुद्धला, कोन्ज्योइ मन्दीरकीइ वीरुद्धला, कैसर क्याःल्बुइ वीरुद्धला चीङ माःइबा पेःदी म्याः।”

9यहुदीक्याला केःदाङ जोगेन सेमगीइ फेस्तसकीइ पावलला लाःसी, “ङाः ख्योला यरुशलेम ताङ्तेर्के ओःले दी तामगीइ बारेला ङाः ख्याइ ठीम ओःलारा पेःगे, मेःयोङे ले?” 10इःनाङ पावलगीइ लाःसी, “ङाः कैसर क्याःल्बुइ ठीम पेःसाइ तोःङ्ला लाःङ्दी एः, दीलारा ङाःइ ठीम ओःङ्‍कोःउए। ङाःइ यहुदीक्याइ वीरुद्धला चीङ माःइबा पेःदी म्याः लाःती ख्या राःङगीइरा याःबुले छोर्ती एः। 11ङाःइ मृत्युदण्ड ज्योर्केन चीङ लेःगा पेःदी दु लाःना ङाः सीजेला इन्कार मेःबे। इःनाङ यहुदीक्याइ च्याःङ्क्योक काःन्दीङ माःताक्पा तेःन्दाम म्याः लाःना, ङाःला सुइयाङ खुङक्याइ लाःक्पाला तेर्चे मीःखुए। ङाः क्याःल्बुइ तोःङ्लारा अपील पेःगे।”

12ओःले फेस्तसकीइ खुङला टेः तेर्केनक्या ङीमु टेः पेःमीःजीक एःन्डु लाःसी, “ख्याइ क्याःल्बु कैसर साःला डोगे लाःती वासी पेःक्योक सोङ्‍गारा ङाः ख्योला कैसर साःलारा ताङ्तेर्के।”

फेस्तसकीइ क्याःल्बु अग्रीपास ङीमु टेः पेःक्योक

13चीङ ङीःमा तीङ्ला क्याःल्बु अग्रीपास ओःले खुङगीइ नोःमो बरनीकी फेस्तसला तोःङ्ज्याङ पेःजेला कैसरीयाला लेप्सी। 14खुङक्या चीङ ङीःमा कैसरीयाला तेःमीःजीक फेस्तसकीइ खुङक्याला पावलगीइ बारेला ताम एःन्डुले लाःसी, “दीला फेलीक्सकीइ कादी ज्याक्योक मेःराङ चीग मीः एः। 15ङाः यरुशलेमला काःल्क्योक तीःजीला यहुदीक्याइ छेस्यो पुजाहारीक्या ओःले छेस्यो मीःक्याइ खुङगीइ वीरुद्धला उजुरी लुदी एःके ओःले खुङला दण्ड तेर्को लाःती वासी पेःसी। 16इःनाङ ङाःइ खुङक्याला लाःसी, ‘ङीःइ रोमी ठीमला सुलाङ माःताक्पा ठहराइमातीथुप दण्ड तेर्केन रीमठीम म्याः। माःताक्पा च्याःङ्क्योक मीःइ माःताक्पा च्याःङेन मीःइ तोःङ्ला राःङगीइ ताम ज्यागेन मौका ज्योर्कोःउए।’ 17खुङक्या दीला ओःङ्मीःजीक ङाःइ कुःल्बु माःबेबा पेःदी ङार्तो च्योःङ्‍रारा पावलला ठीम पेःसाला ख्योङेन आज्ञा तेर्सी। 18खुङगीइ वीरोधीक्या लाःङ्दी खुङला माःताक्पा च्याःङ्‍गाला स्युःसी, इःनाङ ङाःइ ठीवा चेक्योक चे छ्‍योम्बो माःताक्पादी खुङक्याइ माःच्याःङ। 19इःनाङ खुङक्याइ माःताक्पा च्याःङ्क्योक ताम नी खुङक्या राःङगीइ धर्म ओःले तोःङ्लारा सीसीःङ्क्योक येशु लाःकेन मीःइ बारेला चीग्रा दु। पावलगीइदी येशुला सोम्बोरा एः लाःक्योक दुबा। 20दी तामगीइ बारेला काःन्डुले टीःगेन्दी लाःती ङाःइ सेदी म्याःके। ओः सोङ्‍गारा, ङाः पावलला ‘यरुशलेमला काःल्दी ख्योइ ठीम ओःलारा पेःना ओःङे की?’ लाःती टीःसी। 21इःनाङ पावलगीइ खुङगीइ ठीम रोमी क्याःल्बुइ पेःज्युक लाःती वासी पेःसी ओःले ङाःइ खुङला क्याःल्बु साःला माताङथुप खुङला याःबुले सुराक्षा तेर्ती दीलारा ज्यागेन आज्ञा तेर्ती एः।”

22ओःले अग्रीपासकीइ फेस्तसला लाःसी, “दीखो मीःइ ताम ङाः राःङगीइरा कोःजे सेम थेसी।” ओःले फेस्तसकीइ लाःसी, “खुङगीइ ताम ख्याइ ङार्तो कोःगेन एः।”

पावल अग्रीपासकीइ तोःङ्ला

23ङार्तो च्योःङ्‍रा अग्रीपास ओःले बरनीकी छ्‍योम्बो रवाफ ङीमु सेनापतीक्या ओःले क्याःसाइ तोङ्क्याःप्केन मीःक्या ङीमु मीःक्या जोम्साला स्युःसी। ओःले फेस्तसकीइ आज्ञा तेर्मीःजीक पावलला जोम्साला ख्योङ्सी। 24फेस्तसकीइ लाःसी, “क्याःल्बु अग्रीपास ओःले दीला एःक्योक थाम्जेर मीःक्या, ख्याक्या थाम्जेरकीइ दीखो मीःला थोङ्दी एः। दीखो मीःला थाम्जेर यहुदीक्याइ यरुशलेमला ओःले दीलाङ सेराःकोःउए लाःती के तेङ्देरा एः। 25इःनाङ ङाःइ दीखो मीःला मृत्युदण्ड तेर्कोन्दी चीङ माःताक्पा माःफ्रे। इःनाङ खुङ राःङगीइरा रोमी क्याःल्बु साःला डोजेला अपील पेःक्योक सोङ्‍गारा ङाःइ खुङला रोमला ताङेन ठीवा चेसी। 26इःनाङ ङाःइ खुङगीइ बारेला क्याःल्बुला इःगी प्रुःगासुना ची प्रुःगेन्दी ङाःइ सेदी म्याः। ओः सोङ्‍गारा, ङाःइ खुङला ख्याक्याइ तोःङ्ला ओःले खास पेःदी ख्या क्याःल्बु अग्रीपासकीइ तोःङ्ला ख्योङ्दी एः, ओःले ख्याक्याइ दीखोइ जाँच पेःमीःजीक लाःना ङाःइ प्रुःगेन ताम चीङ ज्योर्कुस्वाँ। 27चीलेलाःना कैदीइ च्याःङ्क्योक माःताक्पाक्या मातेङ्बारा खुङला ताङ्जे ङाःला याःबु माने।”

Currently Selected:

प्रेरीत 25: SYW

Highlight

Copy