प्रेरीत 24
24
हाकीम फेलीक्सकीइ तोःङ्ला पावल
1ङीःमा ङा तीङ्ला चोइ पुजाहारी हननीया ओःले छेस्यो मीःक्या तर्तुल्लस लाःकेन वकीलला खेर्ती कैसरीयाला लेप्सी। खुङक्या थाम्जेर हाकीम फेलीक्स साःला काःल्दी पावलगीइ वीरुद्धला उजुर लुसी। 2पावलला नाःङ्ला केक्याःप्मीःजीक तर्तुल्लसकीइ खुङगीइ वीरुद्धला एःन्डुले माःताक्पा च्याःङ्गाला स्युःसी, “आदरणीय फेलीक्स, ख्या नावा साल्बु हाकीम इःङे ओःले ख्याइ पेःगासुना तेन्दुरा ङीःक्याला माःङ्बुरा कीपु काःल्दी एः। उःइ देशकीइ लागी ख्याइ माःङ्बुरा याःथाककीइ लेःगाक्या पेःच्युदी एः। 3ङीःइ दीखो तामला थाम्जेर ठाउँला तेन्दुरा ङीःन्दी एः ओःले ख्याइ पेःक्योक लेःगा टेःम्बा साल्गासुना ङीःइ ख्याला सेममीःजीक थुजीछे तेर्कुए। 4ङाः ख्याइदी माःङ्बुरा तीःजी मेःनेङ, ओः सोङ्गारा, ङीःइ वासी पेःक्योक तीबी चीग तामला याःबुले कोःतेर। 5दीखो मीः तुःक्पु तेर्केन खालगीइ मीः इःङे। दीखो मीःइ नासरी लाःकेन छोबाला तोःङ्क्याःप्केन चादी थाम्जेर ठाउँगीइ यहुदीक्याइ कील्ला हुल दङ्गा माचाइतीदेरा काःल्दी एः। 6दीखो मीःइ कोन्ज्योइ मन्दीराङ चीबु जोजे चाल्सी ओःले ङीःइ दीखोला जुम्सी। [ङीःक्याइ राःङगीइ ठीमलाःम्लेरा दीखोइ माःताक्पा तेङेन ठीवा चेती एःके। 7इःनाङ सेनापती लुसीयस ओःङ्दी जबरजस्ती दीखोला ङीःलाःम्ले फ्रोदी खेर्सी, 8ओःले खुङगीइ ङीःला ख्या साःला उजुर पेःदो लाःकेन आज्ञा तेर्सी।]#२४:८ काःजे ग्रीक तामगीइ तोःङ्गीइ छ्येइ पेज्याक्याला दीखो बोक्या म्याः। ख्या राःङगीइरा दीखोला टीःसी लाःना ङीःइ माःताक्पा च्याःङ्क्योक थाम्जेर ताम ख्याइ खोलाःम्लेरा छोर्केन एः।” 9ओःले राःङ्सा यहुदीक्याइयाङ माःताक्पा च्याःङ्क्योक ताम तेःन्दामरा इःङे लाःती लाःसी।
फेलीक्सकीइ तोःङ्ला पावलगीइ अपील
10ओःले हाकीमगीइ पावलला ताम लोःप लाःती लाःदाप पेःसी, ओःले पावलगीइ एःन्डु लाःसी, “ङाःला टेःम्बा एः, ख्या माःङ्बुरा लोःमीःजीक दी देशकीइ ठीम पेःगेन्दी इःङे, ओः सोङ्गारा, ङाः ख्याइ तोःङ्ला ङाःइ राःङगीइ बयान तेर्चे ज्योर्कासुना ङाः केःदाङ काःल्दी एः। 11ङाः यरुशलेमला कोन्ज्योइ आराधना पेःजेला काःल्क्योक ङीःमा चीङ्ङी भन्दा लाःक्पु काःल्दी म्याः लाःकेन ताम ख्याइ तेःमुरा पेःदी छोर्खुगेन एः। 12ङाःला माःताक्पा च्याःङेनक्याइ नाः ङाःला कोन्ज्योइ मन्दीरला, नाः जोम्साखीमक्याला नाः नी क्याःसाक्याला मीःक्या ङीमु टाःटे पेःक्योक ओःले खुङक्याला क्यादेरा पेःक्योक थोङ्बा। 13ओःले खुङक्याइ ङाःला माःताक्पा च्याःङ्क्योक तामक्यागीइ दास्यी चीगकाङ खुङक्या ङीमु म्याः। 14इःनाङ ङाः ख्याला लाःके, ङाःइ नी उःक्याइ फाफामुक्याइ मेःबा पेःक्योक कोन्ज्योइ मेःबा पेःदी एः। ङाःइ ब्य्राङ्क्योक प्रभुइ लाःमला दीखुङक्याइ माःरीक्पा लाःकुए। छ्येइ ठीमला एःक्योक थाम्जेर तामक्या ओःले कोन्ज्योइ लेःङ्गो तेर्केनक्याइ प्रुःक्योक पेज्याला एःक्योक थाम्जेर तामक्याला ङाः सेमल्हुक लुउए। 15खुङक्याइ च्योःङ्रारा ङाःइयाङ ताःक्पा रा माःताक्पा ङीक्कार मीःक्या सीक्योकलाःम्ले सोम्बो लोःउए लाःकेन रेःवा कोन्ज्योला ज्यादी एः। 16ओः सोङ्गारा, मीः ओःले कोन्ज्यो ङीक्कारकीइ तोःङ्ला ङाः राःङगीइ नावाला तेन्दुरा साङ्बु ज्याजे छोल्गे।
17माःङ्बुरा लोः तीङ्ला ङाः राःङगीइ यहुदी आतानोःक्याला चीङ डेबाक्या तेर्चेला ओःले कोन्ज्योला भेटी फुल्जेला यरुशलेमला लोःदी काःल्दी एःके। 18ङाःइ कोन्ज्योइ मन्दीरला राःङ चाङ्मा ओःङेन ठीम पेःसीःङ्दी एःकासुना दीखुङक्याइ ङाःला फ्रेसी। ओःला ङाः ङीमु मीःइ पोर्चोम म्याःके, ओःले होहल्लाङ पेःदी म्याःके। इःनाङ ओःला एशीया इलाकाइ चीङ यहुदीक्या एःके, 19ओःले खुङक्या ङीमु ङाःइ वीरुद्धला चीङ ताम एः लाःना खुङक्यारा ख्या साःला ओःङ्दी उजुर पेःकोःन्दी एःके। 20दी मीःक्याला ख्याइ टीःदो, ङाः यहुदीक्याइ छ्योम्बो छोबाला लाःङ्गासुना खुङक्याइ ङाःला ची तामला माःताक्पा फ्रेपा। 21खुङक्याइ ङाःला ताम चीगला चीग्रा माःताक्पा च्याःङ्खुडो, ओःखोदी ची इःङेलाना, ‘मीःक्या सीक्योकलाःम्ले सोम्बो लोःउए लाःकेन तामला ङाःइ सेमल्हुक लुक्योक सोङ्गारा दीला ङाःला माःताक्पा च्याःङ्देरा दु’ लाःती ङाःइ खुङक्याइ तोःङ्ला छ्योम्बो केले केताङ्दी एःके।”
22हाकीम फेलीक्सकीइ प्रभुइ लाःमगीइ बारेला याःबु पेःदी छोर्ती एःके, ओः सोङ्गारा, खुङगीइ ओः परीक्षाला सीःङ्च्युसी। खुङगीइ लाःसी, “ताः ख्याक्याइ उजुरी सेनापती लुसीयस ओःङ्मीःजीक चीग्रा ठीवा चेके।” 23ओःले फेलीक्सकीइ कप्तानला आज्ञा तेर्ती लाःसी “पावलला याःबु पेःदी सुराक्षा तेर्ती ज्यो, इःनाङ खुङला माःङ्बुरा चोक्पो माःबे ओःले खुङला कोःकेन क्युःक्या ख्योङेन रोःक्यालादी माका।”
फेलीक्स रा द्रुसील्लाइ तोःङ्ला पावल
24चीङ ङीःमा तीङ्ला फेलीक्स राःङगीइ पेःमे द्रुसील्लाला ङीमुरा ख्योङ्दी ओःङ्सी, खुङगीइ पेःमेदी यहुदी एःके। खुङगीइ पावलला केक्याःप्सी ओःले येशु ख्रीष्टला सेमल्हुक लुगेनगीइ बारेला पावललाःम्ले कोःसी। 25इःनाङ पावलगीइ ताम लाःतेरा डोगासुना मीःक्या काःन्डुले ताःक्पा ओःङेन्दीइ बारेला, राःङगीइ सेम वशला ज्यागेन बारेला ओःले कोन्ज्योइ ठीम पेःगेन ङीःमाइ बारेला लाःमीःजीक हाकीम फेलीक्स जीसी, ओःले खुङगीइ लाःसी, “ताःसेला दाङ्सी! ताः ख्यो सुङ। ङाःला फुर्सद एःकासुना ख्योला फीर्च्या केक्याःप्काला ताङे।” 26फेलीक्सकीइ पावललाःम्ले चीङ डेबा ज्योर्के की लाःती रेःवा ज्यादी एःके, ओः सोङ्गारा, खुङगीइ पावलला घरीघरी केक्याःप्ती ताम लाःकेन्दी पेःउके।
27लोः ङी तीङ्ला फेलीक्सकीइ ठाउँला पर्कीअस फेस्तस ओःलाइ हाकीम काःल्सी। इःनाङ यहुदीक्याला केःदाङ जोजेला फेलीक्सकीइ पावलला चेङाङलारा पोःर्तेर्सी।
Currently Selected:
प्रेरीत 24: SYW
Highlight
Share
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
