प्रेरीत 23
23
1पावलगीइ महासभाछ्योले याःबुले तादी लाःसी, “आतानोःक्या, तीःरीङगीइ ङीःमाथुप कोन्ज्योइ तोःङ्ला ङाःइ याःबु लेःगा पेःदी एः, ओःले ङाःला टेःम्बा एः, ङाः केमीःजीक ताःसेथुप चीङ माःरीक्पा पेःदी म्याः।” 2पावलगीइ दी ताम लाःक्योक कोःदी छ्योम्बो पुजाहारी हननीयाइ थामालारा लाःङ्क्योक मीःक्याला पावलगीइ खाला रोप्तो लाःती आज्ञा तेर्सी। 3इःनाङ पावलगीइ हननीयाला लाःसी, “ए माःरीक्पा सेम एःक्योक! ख्यालाङ कोन्ज्योइ रोप्केन एः। ख्या ओःला छ्येइ ठीमलाःम्ले ङाःइ ठीम पेःजेला तेःती एः, इःनाङ ख्याइ ओः ठीम माःङीन्बा ङाःला रोप्केन आज्ञा तेर्सी।” 4पावलगीइ सुःरला लाःङेनक्याइ खुङला लाःसी, “ची ख्यो कोन्ज्योइ चोइ पुजाहारीलाङ केताङ्गुबा?” 5पावलगीइ लाःसी, “आतानोःक्या, खुङ चोइ पुजाहारी इःङे लाःती ङाःइ छोर्ती म्याःके। ङाःला टेःम्बा एः, राःङगीइ मीःक्याखाला आङ्ज्या पेःगेन शासककीइ वीरुद्धला माःरीक्पा लाःमीःङे लाःती छ्येला प्रुःदी एः।”
6पावलगीइ महासभाला चीङ मीःक्या सदुकी ओःले फारीसी छोबाइदी एःक्योक छोर्मीःजीक खुङगीइ छ्योम्बो के तेङ्दी लाःसी, “आतानोःक्या, ङाः फारीसीइ पुः फारीसीरा इःङे। सीक्योक मीःक्या सीक्योकलाःम्ले सोम्बो लोःउए लाःकेन तामला रेःवा पेःगासुना दीला ङाः परीक्षाला लेप्ती एः।”
7पावलगीइ दी ताम लाःमीःजीक सदुकीक्या ओःले फारीसीक्या नाःङ्ला ठुक्पा काःल्सी, ओःले महासभाइ मीःक्या खाफ्यासी। 8चीलेलाःना सदुकीक्याइ मीःक्या सीक्योकलाःम्ले सोम्बो मेःलोःए लाःकेन तामला सेमल्हुक मीलुए, ओःले स्वर्गदुतक्या रा लाक्या एःरा म्याः लाःकोःए। इःनाङ फारीसीक्याइदी दी सुमगार तामला सेमल्हुक लुउए। 9ओः सोङ्गारा, महासभाला छ्योम्बो होहल्ला काःल्सी। फारीसी छोबाइ चीङ छ्येइ ठीमगीइ लोबेनक्याइ लाःङ्दी सदुकीक्याला घोर वीरोध पेःदेरा लाःसी, “ङीःइ नी दीखो मीःइदी चीङ माःताक्पारा माःथोङ। लाक्या ओःले स्वर्गदुतक्या दी मीः ङीमु ताम लाःक्योक इःन्स्वा!”
10खुङक्याइ ठुक्पा छ्योम्बो काःल्क्योक सोङ्गारा खुङक्याइ पावलला लुछलाछ पेःदी सेटो लाःती सेनापती जीसी। ओः सोङ्गारा, खुङगीइ पावलला छोबालाःम्ले तेङ्दी छाउनी नाःङ्ला खेर लाःती थेक्याला आज्ञा तेर्सी।
11ओः कुःङ्मु प्रभु पावलगीइ सुःरला ओःङ्दी लाःसी, “माःजी! दीला यरुशलेमला ख्योइ ङाःइ पाङ्बु तेर्ती एः ओःले ख्योइ रोमलाङ ओःन्डुरा पेःकोःउए।”
पावलला सेचेला षड्यन्त्र पेःक्योक
12ङार्तो च्योःङ्रा ङामु चीङ यहुदीक्या जोम्दी पावलला सेकेन तेःदाम पेःसी। खुङक्याइ पावलला मासेथुप चीङ साःगेन्दी ओःले थुङेन्दी मेःबे लाःती ना लुसी। 13एःन्डुले डीक्ती तेःदाम पेःगेनक्या मेःन्दा खाल ङी भन्दाङ माःङ्बु एःके। 14ओः तीङ्ला खुङक्याइ छेस्यो पुजाहारी ओःले छेस्यो मीःक्या साःला काःल्दी लाःसी, “ङीः थाम्जेरकीइ पावलला मासेथुप चीङ मेःसा लाःती ना लुदी एः। 15ताः ख्याक्या ओःले छोबाइ मीःक्या डीक्ती पावलला फीर्च्या महासभाला ख्योङ्दी स्यो लाःती सेनापतीला लेःङ्गो ताङ्तेर। खुङगीइ बारेला खुङला ताःरुङ माःङ्बु तामक्या टीःकोःन्दी एः लाःती लाःचादो। इःनाङ खुङला दीला ख्योङ्दी ओःङ्देरा पेःगासुना ङीःक्या खुङला लाःमलारा सेतेर्के।”
16इःनाङ ओः यहुदीक्याइ पावलला सेके लाःती षड्यन्त्र पेःक्योक ताम खुङगीइ छाउगीइ छोर्सी। ओः सोङ्गारा, खुङ छाउनी नाःङ्ला काःल्दी दी ताम पावलला लाःसी। 17ओःले पावलगीइ मेःन्दा चीग कप्तानला केक्याःप्ती लाःसी, “दी पीःटुकला सेनापती साःला क्याल्तेर, दीखोइ खुङला चीङ ताम लाःकुए।” 18कप्तानगीइ पावलगीइ छाउला सेनापती साःला क्याल्दी लाःसी, “हजुर, कैदी पावलगीइ ङाःला केक्याःप्ती दी पीःटुककीइ ख्या ङीमु वासी पेःगेन चीङ ताम एः लाःकारा दीखोला ख्या साःला ख्योङ्तेर्ती एः।”
19सेनापतीइ ओः पीःटुककीइ लाःक्पाला जुम्दी छ्यो चीगला खेर्सी ओःले टीःसी, “ख्योइ ङाःला लाःकेन ताम ची इःम्बा?” 20ओः पीःटुककीइ लाःसी, “ङार्तो चीङ यहुदीक्या ओःङ्दी पावलगीइ बारेला राःङ्सा तामक्या बुज्तीगेन बहाना पेःदी खुङला फीर्च्या छ्योम्बो छोबाला खेर्चेला ख्या साःला वासी पेःगाला ओःङेन टेः पेःदी एः। 21इःनाङ ख्याइ खुङक्याइ ताम माःको, चीलेलाःना मेःराङ खाल ङी भन्दा माःङ्बु यहुदीक्याइ पावलला मासेथुप खुङक्याइ चीङ मेःसागेन्दी ओःले मीःथुङेन्दी लाःती ना लुदी एः। खुङक्या ताः तयारी काःल्सीःङ्दी एः ओःले ख्याइ आज्ञा ज्योर्चेला चीग्रा कुःदी तेःती एः।”
22ओःले सेनापतीइ ओः पीःटुकला एःन्डु लाःसी, “दी ताम ख्योइ ङाःला लाःक्योक इःङे लाःती सुलाङ माःलाःप।” ओःले खुङगीइ ओः पीःटुकला ताङ्तेर्सी।
पावलला कैसरीयाला ताङ्क्योक
23ओः तीङ्ला सेनापतीइ मेःराङ ङी कप्तानला केक्याःप्ती लाःसी, “कैसरीयाला डोजेला मेःन्दा क्याः ङी थेक्या, खाल सुम रा च्यु ताबु जागेन थेक्या ओःले क्याः ङी भाला क्याःप्केन थेक्या तयार जोदो, ओःले ताःल्दा कुःङ्मु कुः बज्तीगासुना दीलाःम्ले डोजेला तयार पेःदो। 24ओःले पावल जाजेलाङ ताबुक्या तयार जोदो ओःले खुङला याःबुले हाकीम फेलीक्स साःला क्याल्दो।” 25ओःले सेनापतीइ हाकीम फेलीक्सला इःगी चीग प्रुःसी–
26“आदरणीय हाकीम फेलीक्स, ङाः क्लौडीयस लुसीयसलाःम्ले टासीदेले! 27दीखो मीःला यहुदीक्याइ जुम्दी सेचे छोल्दी एःके, इःनाङ दीखो रोमगीइ मीः दुबा लाःती ङाःइ छोर्कारा ङाः थेक्या ङीमु काःल्दी यहुदीक्यालाःम्ले थार्च्युदी ख्योङ्सी। 28दीखो मीःइ ची लेःगा नोङ्दी खुङक्याइ माःताक्पा च्याःङ्क्योक डुबा लाःती सेजेला ङाःइ दीखोला खुङक्याइ छ्योम्बो छोबाला खेर्सी। 29खुङला मृत्युदण्ड तेर्चेला अथवा चेङाङला काजेला खुङगीइ चीङ लेःगा नोङ्दी मीःन्दु। खुङला माःताक्पा च्याःङ्क्योक तामदी खुङक्याइ छ्येइ ठीमगीइ तामगीइ बारेलारा दु। 30यहुदीक्या दीखो मीःला सेकेन दाउ तादी तेःती एः लाःक्योक ताम ङाःइ कोःगारा दीखोला तुरुन्त ख्या साःला ताङ्देरा एः। ङाःइ खुङला माःताक्पा च्याःङेनक्यालाङ खुङला ची तामला माःताक्पा च्याःङ्क्योक इःम्बा ओःखो ख्याइ तोःङ्ला लोःप लाःती एः।”
31थेक्या सेनापतीइ आज्ञा ज्योर्ती पावलला खेर्ती काःल्सी, ओःले खुङक्याइ पावलला ओः कुःङ्मुरा एन्टीपाट्रीस क्याःसाला क्याल्सी। 32ङार्तो च्योःङ्रा ताबुला जागेन थेक्याला पावल ङीमु सुङ लाःती काङ्बाइ डोगेन थेक्यादी छाउनीला लोःसी। 33खुङक्याइ पावलला कैसरीयाला क्याल्सी ओःले हाकीमला इःगी तेर्ती पावललाङ खुङगीइ लाःक्पालारा तेर्सी। 34ओः इःगी टोःसीःङ्दी हाकीमगीइ पावलला काःखो छेत्रइ मीः इःङे लाःती टीःसी। खुङगीइ पावल कीलीकीया छेत्रइ मीः दुबा लाःती छोर्मीःजीक, 35खुङगीइ लाःसी, “ख्योला माःताक्पा च्याःङेनक्या दीला ओःङ्मीजीक ङाः ख्योइ ताम कोःगे।” ओः तीङ्ला हाकीमगीइ पावलला याःबुले सुराक्षा पेःदी हेरोदकीइ क्याःल्खाङला ज्यो लाःती आज्ञा तेर्सी।
Currently Selected:
प्रेरीत 23: SYW
Highlight
Share
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
