प्रेरीत 22

1“आतानोःक्या ओःले आबाक्या, ख्याक्याइ तोःङ्ला ङाःइ राःङगीइ पक्षला लाःकोन ताम कोःदो।” 2खुङगीइ हीब्रु तामलाःम्‍ले लाःक्योक कोःदी खुङक्या ताःरुङ खाजुम तेःसी।

ओःले पावलगीइ लाःसी, 3“ङाः कीलीकीयाइ टार्सस क्याःसाला केक्योक यहुदी इःङे, इःनाङ ङाः दीला यरुशलेमला गमलीयल लोबेनगीइ तेःनला छार्सी। उःइ फाफामुमीःजीकरा ङीःन्दी ओःङ्क्योक छ्‍येइ ठीमक्या ङाःइ याःबुले सेदी एः। तीःरीङ ख्याक्याइ कोन्ज्योछ्‍योले काःजे उत्साह तेङ्दी एःपा, ङाःइयाङ ओःजेरा उत्साह तेङ्दी एःके। 4प्रभुइ लाःमला सेमल्हुक लुगेनक्याक्याला ङाःइ सीगेन पेःदी सताइतीदी एःके, ओःले ङाःइ ख्य्वापीःजाक्या ओःले पेःन्पीःजाक्या ङीक्‍कारला जुम्दी चेङाङला काच्युदी एःके। 5ङाःइ लाःक्योक दी ताम तेःन्दामरा इःङे लाःती चोइ पुजाहारी ओःले उःइ छोबाइ मीःक्याइयाङ लाःचे खुउए। खुङक्याइरा ङाःला दमस्कसला एःक्योक यहुदी आतानोःक्याइ मीःनला इःगीक्या तेर्ती एःके, ओः सोङ्‍गारा, प्रभुला सेमल्हुक लुगेनक्याला जुम्दी यरुशलेमला ख्योङ्जेला ओःले तुःक्पु तेर्चेला ङाः ओःला काःल्सी।

राःङ परीवर्तन काःल्क्योककीइ बारेला पावलगीइ लाःक्योक

(प्रेरीत ९:१-१९; २६:१२-१८)

6ङाः दमस्कसकीइ सुःरला लेप्चे छोल्गासुना ङीःमा फे काःल्दी एःके। ओः तेःकासुरा नाम्सार्गालाःम्‍ले खेप चीगलारा ज्योती चीग ङाःखाला स्यार्सी। 7ङाः साला रीःल्सी ओःले एःन्डु लाःक्योक के चीग कोःसी, ‘शाऊल, ए शाऊल, ख्योइ चीले ङाःला तुःक्पु तेर्कुबा?’ 8ङाःइ टीःसी, ‘ए प्रभु, ख्या सु इःङे?’ ओः केइ लाःसी, ‘ख्योइ तुःक्पु तेर्तेरा पेःक्योक ङाः नासरतकीइ येशु इःङे।’ 9ङाः ङीमु एःकेन मीःक्याइ ओः ज्योतीला थोङ्सी, इःनाङ ङाः ङीमु ताम लाःतेरा पेःक्योक केला खुङक्याइ सेमाःखु। 10ङाःइ लाःसी, ‘ए प्रभु, ङाः ची पेःगा?’ प्रभुइ ङाःला लाःसी, ‘ताः लाःङ्दी दमस्कस क्याःसाला सुङ, ओःले ख्योइ पेःकोःन लेःगा ओःलारा लाःकेन एः।’ 11ओः ज्योतीइ पेःगासुना ङाः मी मेःथोङेन्दी काःल्सी, ओः सोङ्‍गारा, ङाः ङीमु एःकेन मीःक्याइ ङाःइ लाःक्पाला जुम्दी ङाःला दमस्कसला ख्योङ्सी।

12ओः क्याःसाला हननीया मीःन पेःक्योक मेःन्दा चीग मीः तेःकुके। खुङ मोशाइ तेर्क्योक ठीम ङीःन्ङेन्दी ताःक्पा मीः एःके ओःले दमस्कसला तेःकेन यहुदीक्या थाम्जेरकीइ खुङला सेःसा पेःउके। 13ओः मीःरा ङाः साःला ओःङ्सी ओःले ङाःइ सुःरला लाःङ्दी ङाःला लाःसी, ‘शाऊल नोः, ख्यो फीर्च्या मी थोङेन्दी काःल्ज्युक।’ खुङगीइ एःन्डु लाःलुङम्याःपा ङाः मी थोङेन्दी काःल्सी ओःले खुङला थोङ्सी। 14ओः तीङ्ला खुङगीइ ङाःला लाःसी, ‘उःइ फाफामुक्याइ कोन्ज्योइ खुङगीइ सेम ख्योला सेच्युजेला, खुङगीइ ताःक्पा मीःला थोङ्च्युजेला ओःले खुङगीइ लाःक्योक तामला कोःच्युजेला खुङगीइ ख्योला दाम्दी एः। 15चीलेलाःना ख्यो खुङगीइ पाङ्बु काःल्दी थाम्जेर मीःक्याइ लागी ख्योइ थोङ्क्योक ओःले कोःक्योक तामक्या लाःकोःउए। 16ओः सोङ्‍गारा, चीले कुःल्बु पेःगेन्दी? लोःङ ओःले बप्‍तीस्मा लेःङ्दो ओःले येशुइ मीःन लेःङ्दी राःङगीइ लाःयो ठुदो।’

17ओःले ङाः यरुशलेमला लोःदी ओःङ्दी कोन्ज्योइ मन्दीरला प्रार्थना पेःदेरा एःकासुना ङाःइ दर्शन चीग थोङ्सी, 18ओःले प्रभुइ ङाःला एःन्डु लाःसी, ‘गेबु पेःदी यरुशलेमलाःम्‍ले थेङ्दी सुङ चीलेलाःना ङाःइ बारेला ख्योइ लाःक्योक तामक्या दीलाइ मीःक्याइ मेःकोःगेन एः।’ 19ङाःइ लाःसी, ‘ए प्रभु, ङाः जोम्साखीमक्याला काःल्दी ख्याला सेमल्हुक लुगेन मीःक्याला ङाःइ जुम्देरा रोप्क्योक ओःले चेङाङला काक्योक ताम खुङक्या थाम्जेरला याःबुले टेःम्बा एः। 20ख्याइ बारेला लाःकेन्दी स्तीफनसला सेकासुःना, ङाः ओःलारा लाःङ्दी ङीःन्दी तेःती एःके। ङाः राःङाङ खुङला सेकेनक्या ङीमु डीक्‍ती खुङक्याइ केःलाक्या रुःङ्दी तेःती एःके।’ 21इःनाङ प्रभुइ ङाःला लाःसी, ‘ख्यो सुङ, ङाः ख्योला माःङ्बुरा थारीःङ्बुइ राःङ्सा क्युःपाक्या साःला ताङ्तेर्के।’”

22पावलगीइ राःङ्सा क्युःपाक्या शब्द लाःसुनाथुप मीःक्याइ खुङगीइ ताम कोःदी तेःसी। इःनाङ ओः तीङ्ला खुङक्याइ केताङ्देरा लाःकाला स्युःसी, “दीखोला सेराकोः! दीखोला सोम्बो पोःर्चे मेःयोङे!” 23खुङक्याइ राःङ राःङगीइ फोँस्योकक्या पीती क्युर्तेरा ओःले याःरला तुःल उर्तेरा केताङ्‍गाला स्युःसी। 24दीखो थोङ्दी रोमी सेनापतीइ पावलला नाःङ्ला खेर्च्युसी ओःले पावलगीइ वीरुद्धला चीले यहुदीक्या केताङ्क्योक दुबा लाःती छोर्चेला कोर्रा क्याःप्केन आज्ञा तेर्सी। 25ओःले थेक्याइ पावलला कोर्रा क्याःप्चेला थाक्पाइ तागासुना, खुङगीइ थामाला लाःङ्दी तेःक्योक कप्‍तानला पावलगीइ लाःसी, “ची रोमी मीःला माःताक्पा माःथोङ्थुप कोर्राइ क्याःप्चे ठीम ङीमु डीक्पु एःपा?” 26कप्‍तानगीइ दी ताम कोःमीःजीक खुङ सेनापती साःला काःल्दी लाःसी, “ख्याइ दीखो ची पेःजे चाल्क्योक? दीखो मीः नी रोमगीइ मीः का दुबा!”

27दी ताम कोःदी सेनापती पावल साःला काःल्दी टीःसी, “ङाःला लोःप ले, ची ख्यो रोमगीइ मीः इःङे?” पावलगीइ लाःसी, “इःङे!” 28सेनापतीइ लाःसी, “ङाः नी माःङ्बुरा डेबा च्याल्दी रोमगीइ मीः काःल्योक इःङे।” पावलगीइ लाःसी, “इःनाङ ङाः नी केबुमीःजीकरा रोमी मीः इःङे।” 29पावलला टीःजे छोल्गेन मीःक्या तुरुन्त तीङ सर्तीसी। ओःले सेनापतीइ पावल रोमगीइ मीः इःङेन्दुबा लाःती छोर्मीःजीक खुङ जीसी चीलेलाःना खुङगीइ पावलला च्याल्दाइ ताःम्च्युदी एःके।

पावल छ्‍योम्बो छोबाइ तोःङ्ला

30यहुदीक्याइ पावलला ची तामला माःताक्पा च्याःङ्क्योक दुबा, ओः ताम सेनापतीइ सेजे छोल्सी। ओः सोङ्‍गारा, ङार्तो च्योःङ्‍रा खुङगीइ छेस्यो पुजाहारीक्याला ओःले महासभाइ थाम्जेर मीःक्याला जोम्ङेन आज्ञा तेर्सी, ओःले खुङगीइ पावलला चेङाङलाःम्‍ले तेङ्दी ख्योङ्सी ओःले खुङला थाम्जेरकीइ तोःङ्ला लाःङ्च्युसी।

Currently Selected:

प्रेरीत 22: SYW

Highlight

Copy