प्रेरीत 21
21
पावल यरुशलेमला काःल्क्योक
1एफीसस कोःम्साइ छेस्योक्या ङीमु बीदा पेःमीःजीक ङीःक्या जहाजलाःम्ले थेकारा कोसला ओःङ्सी। ओःले ङार्तो च्योःङ्रा रोडस टापुला लेप्सी ओःले ओःलाःम्ले ङीःक्या पटारा क्याःसाला काःल्सी। 2ओःलाःम्ले ङीःक्याइ फोनीके इलाकाथुप डोगेन जहाज ज्योर्सी ओःले ओःखोला जादी काःल्सी। 3ङीःइ साइप्रस टापुला थोङ्मीःजीक ओःखोइ लोःलाःम्ले ङीः सीरीया इलाकाछ्योले काःल्सी। टुरोस क्याःसाला जहाजलाःम्ले क्युःक्या पाप्कोःन्दी सोङ्गारा ओःला जहाज रोक्तीसी ओःले ङीःङ पाःप्सी। 4ओःले ङीःक्या ओःला तेःकेन प्रभुला सेमल्हुक लुगेन मीःक्या साःला फ्रेकाला काःल्सी ओःले ङीःमा तीःनथुप खुङक्या ङीमु तेःसी। चाङ्मा लाइ ल्हेलाःम्ले खुङक्याइ पावलला यरुशलेम माःन्डो लाःसी। 5इःनाङ ङीःमा तीःन ओःला तेःमीःजीक ङीः खुङक्या ङीमु बीदा पेःदी काःल्सी। ओःलाइ प्रभुला सेमल्हुक लुगेन आतानोःक्या, आजीनोःमोक्या ओःले पीःजाक्या थाम्जेरकीइ ङीःला क्याःसामीःजीक चाङ्बुइ सुःरथुप क्याल्गाला ओःङ्सी। ङीःक्या थाम्जेरकीइ चाङ्बुइ सुःरला पीमु चुदी प्रार्थना पेःसी। 6ओः तीङ्ला ङीःक्यादी खाफ्यादी जहाजला जासी ओःले खुङक्यादी खीमछ्योले लोःसी।
7ङीःक्या टुरोस क्याःसालाःम्ले टोलेमाइस क्याःसाला लेप्मीःजीक जहाजलाःम्ले पाःप्सी। ङीःक्याइ ओःला प्रभुला सेमल्हुक लुगेन आतानोःक्याला टासीदेले लाःसी ओःले ङीःमा चीग खुङक्या ङीमुरा तेःसी। 8ङार्तो च्योःङ्रा खुङक्यालाःम्ले खाफ्यादी ङीः कैसरीयाला लेप्सी। ओःला ङीः लेःङ्गो प्रचार पेःगेन फीलीपकीइ खीमला तेःसी। फीलीपदी यरुशलेमला प्रेरीतक्याला रोः पेःजेला दाम्क्योक मेःराङ तीःन नाःङ्ला मेःराङ चीग एःके। 9खुङगीइदी कोन्ज्योइ अगमवाणी लाःकेन्दी मेःराङ सीः याःर्का माःक्याःप्क्योक पोःमोक्या एःके।
10ङीःक्या चीङ ङीःमाथुप ओःला तेःकासुना यहुदीया क्षेत्रलाःम्ले अगाबस मीःन पेःक्योक मेःराङ चीग कोन्ज्योइ लेःङ्गो तेर्केन्दी ओःला ओःङ्सी। 11खुङगीइ पावलगीइ कारा लेःङ्दी राःङगीइ लाःक्पा रा काङ्बा ताःम्सी ओःले एःन्डु लाःसी, “चाङ्मा लाइ एःन्डु लाःकुए, ‘दी काराइ ताःक्पुला यरुशलेमगीइ यहुदी छेस्योक्याइ एःन्डुलेरा ताःम्ङेन एः ओःले राःङ्सा क्युःपाइ मीःक्याइ लाःक्पाला तेर्केन एः।’” 12दीखो ताम कोःदी ङीःक्या ओःले ओःला एःक्योक मीःक्याइ पावलला यरुशलेमला माःन्डो लाःती वासी पेःसी। 13इःनाङ पावलगीइ लाःसी, “एःन्डुले ङुःदी ख्याक्याइ चीले ङाःइ सेम छ्याछ्युबे जोउबा? ङाः यरुशलेमला ताःम्जेला चीग्रा मीःङे, इःनाङ ङाः प्रभु येशुइ लागी सीकोःनाङ सीजेला तयार एः।” 14ओःले ङीःइ पावलला वाःम्जे माःखुमीःजीक “कोन्ज्योइ सेम छाङ्ज्युक” लाःती खाजुम तेःसी।
15ओः तीङ्ला ङीःक्या राःङगीइ क्युःक्या तयारी पेःदी यरुशलेमगीइ लाःम स्युःसी। 16कैसरीयाला प्रभुला सेमल्हुक लुगेन चीङ आतानोःक्याङ ङीः ङीमुरा ओःङ्सी। खुङक्याइ ङीःला साइप्रस टापुलाःम्ले ओःङ्दी तेःक्योक प्रभुला तोबारा तोःङ्ला सेमल्हुक लुक्योक मनासोनगीइ खीमला तेःकाला क्याल्सी।
पावलगीइ याकुबला फ्रेक्योक
17ओःले ङीःक्या यरुशलेमला लेप्मीःजीक ओःलाइ आतानोःक्याइ ङीःला केःदाङ पेःदेरा तोःङ्ज्याङ पेःसी। 18ङार्तो च्योःङ्रा पावल ङीःक्या ङीमु याकुबला फ्रेकाला काःल्सी। ओःला कोःम्साइ थाम्जेर छेस्योक्या जोम्दी एःके। 19पावलगीइ खुङक्याला टासीदेले लाःसी ओःले कोन्ज्योइ खुङलाःम्ले राःङ्सा क्युःपाइ मीःक्याइ कील्ला पेःक्योक थाम्जेर लेःगाक्या खुङक्याला लाःतेर्सी। 20पावलगीइ ताम कोःदी खुङक्याइ कोन्ज्योला प्रशंसा पेःसी। ओः तीङ्ला खुङक्याइ पावलला लाःसी, “तादो नोः, दीलाङ हाजारौं यहुदीक्याइ प्रभुला सेमल्हुक लुदी एः ओःले मोशाइ तेर्क्योक ठीमगीइ तामक्याला याःबु पेःदी सेम तेर्ती एः। 21खुङक्याइ ख्याइ पेःक्योक बारेलाङ चीङ ताम कोःदी एः। ओःखो ची इःङे लाःना, ख्याइ राःङ्सा क्युःपाक्याइ कील्ला तेःकेन यहुदीक्याला मोशाइ ठीमला पोःर्तो ओःले खुङक्याइ पीःजाक्याला खतना माःबे ओःले यहुदीक्याइ ठीमक्या माःङीन लाःती लोप्ती एः लो। 22ख्या ओःङ्क्योक ताम खुङक्याइ तेःन्दामरा कोःदी एः। ताः उःक्या ची पेःगा ले? 23ओः सोङ्गारा, ङीःइ लाःक्योक ङीःन्दो। दीला कोन्ज्योला ताःम्ज्या पेःगेन मेःन्दा सीः मीःक्या एः। 24ख्याइ खुङक्या ङीमु कोन्ज्योइ मन्दीरला सुङ ओःले खुङक्या ङीमुरा चाङ्मा ओःङेन ठीम पेःदो। खर्चक्यादी ख्याइ च्याल्तेर ओःले खुङक्याइ टा प्राःच्युदो। एःन्डुले ख्याइ मोशाइ तेर्क्योक ठीमक्या ङीःन्क्योक थोङ्दी ख्याला च्याःङ्क्योक थाम्जेर माःताक्पाक्या तेःन्दामरा मीःङेनदुबा लाःती थाम्जेरकीइ छोर्केन एः। 25इःनाङ प्रभु येशुला सेमल्हुक लुगेन राःङ्सा क्युःपाइ मीःक्यालादी कुला फुल्क्योक साःगेन स्याःक्या चीङ माःसा, ठा माःसा ओःले जीङ्बा चीर्ती सेक्योक वास्तुइ स्या माःसा, ओःले व्यभीचार पेःजेलाःम्ले थारीःङ्बुरा तेः लाःती ङीःइ टेः पेःदी इःगी प्रुःदी ताङ्तेर्सीःङ्दी एः।”
26ङार्तो च्योःङ्रा पावल ओः मेःराङ सीः मीःक्या ङीमुरा काःल्सी ओःले खुङक्या ङीमुरा राःङ चाङ्मा ओःङेन ठीम पेःसी। ओःले चाङ्मा ओःङेन ङीःमा नाःम सीःङ्गुबा ओःले खुङक्या थाम्जेरकीइ लागी नाःम बली तेर्कोःउबा लाःती पुजाहारीइ छोर्च्युक लाःती खुङ कोन्ज्योइ मन्दीर नाःङ्ला स्युःसी।
पावलला जुम्क्योक
27ङीःमा तीःन सीःङ्जेरा छोल्दी एःकासुना, एशीया इलाकालाःम्ले ओःङ्क्योक चीङ यहुदीक्याइ पावलला कोन्ज्योइ मन्दीरला थोङ्सी। खुङक्याइ मीःइ पोर्चोमला क्यासी ओःले पावलला जुम्सी, 28ओःले खुङक्या एःन्डु लाःतेरा केताङ्गाला स्युःसी, “इस्राएली आतानोःक्या, ङीःला रोः पेःदो! दीखो मीःरा इःङे, काःनाथेते काःल्दी उः इस्राएलीक्या, उःइ ठीम ओःले दी ठाउँगीइ वीरुद्धला मीःक्याला लाःकेन्दी। ओः भन्दाङ माःङ्बु नी, दीखोइ राःङ्सा क्युःपाइ मीःक्याला कोन्ज्योइ मन्दीर नाःङ्ला ख्योङ्सी ओःले दी चाङ्मा ठाउँलाङ चीबु जोदी एः।” 29खुङक्याइ दीखो चीले लाःक्योक लाःना खुङक्याइ एफीससलाःम्ले ओःङ्क्योक त्रोफीमसला पावल ङीमुरा क्याःसाला थोङ्दी एःके ओःले पावलगीइ खोला कोन्ज्योइ मन्दीर नाःङ्लारा खेर्स्वा लाःती खुङक्याइ ठीवा साल्दी एःके।
30दी ताम क्याःसा काःङ्रा हल्ला काःल्सी ओःले थाम्जेर मीःक्या छ्योङ्देरा ओःङ्सी। खुङक्याइ पावलला टीःतेरा कोन्ज्योइ मन्दीर नाःङ्ले फीला ख्योङ्सी, ओःले खुङक्याइ खेप चीगलारा मन्दीरकीइ कोः चेतेर्सी।
31खुङक्याइ पावलला सेचेरा चाल्दी एःके, ओः तेःकासुरा यरुशलेम क्याःसाला काःल्क्योक होहल्लाइ लेःङ्गो रोमी सेनापतीइ कोःसी। 32खुङगीइ खेप चीगलारा चीङ थेक्या ओःले कप्तानक्याला खेर्ती छ्योङ्देरा मीःक्याइ पोर्चोमछ्योले काःल्सी। खुङक्याइ सेनापतीला ओःले थेक्याला ओःङ्क्योक थोङ्दी खुङक्याइ पावलला रोप्चे पोःर्सी। 33ओः सेनापती ओःङ्दी पावलला जुम्सी ओःले ङीथाल च्याल्दाइ खुङला ताःम्च्युसी। ओःले खुङगीइ मीःइ पोर्चोमला सु इःम्बा ओःले ओःखोइ ची पेःबा लाःती टीःसी। 34चीङ मीःक्याइ ताम चीग लाःतेरा केताङ्सी ओःले राःङ्साक्याइ राःङ्सारा ताम लाःतेरा केताङ्सी। छ्योम्बो होहल्लाइ पेःगासुना सेनापतीइ ओःखोइ कारण छोर्माःखु, ओः सोङ्गारा, खुङगीइ पावलला खुङक्याइ छाउनीला खेर लाःती आज्ञा तेर्सी। 35थेक्याइ पावलला खेर्ती टेलापला लेप्कासुना मीःक्याइ छ्योम्बो होहल्ला पेःदी खुङला सेचे छोल्सी। ओः सोङ्गारा, थेक्याइ पावलला खुर्ती खेर्सी। 36ओःले मीःक्या खुङक्याइ तीङ तीङ्ला ब्य्राङ्दी “ओः मीःला सेतो!” लाःती केतेङ्दीरा तेःसी।
पावलगीइ राःङगीइ बारेला लाःक्योक
37खुङक्याइ पावलला छाउनी नाःङ्ला क्याल्जे छोल्गासुना खुङगीइ सेनापतीला लाःसी, “हजुर, ङाः ख्याला चीङ ताम लाःका?” सेनापतीइ लाःसी, “ख्योला ग्रीक ताम लाःचेङ ओःङ्गुबा? 38ची ख्यो ओः मीश्रइ मीःरा मीःङे, ओःखोइ चीङ तीःजी तोःङ्ला वीद्रोह मच्चाइतीदी हाजार सीः वीद्रोहीक्याला उजाड ठाउँला तोःङ क्याःप्ती खेर्ती एःके?” 39इःनाङ पावलगीइ लाःसी, “ङाः नी यहुदी इःङे, ओःले ङाः कीलीकीयाइ टार्सस क्याःसाला केक्योक इःङे। ङाः ओःखोरा मीःन ताःक्योक क्याःसाइ मेःराङ चीग मीः इःङे। ख्याला वासी एः, ङाःला दी मीःक्याइ तोःङ्ला चीङ ताम लाःचे ना।” 40सेनापतीइ पावलला ताम लाःचे तेर्मीःजीक खुङ टेलापला लाःङ्दी मीःक्याला छ्याबे तेः लाःती लाःक्पाइ लाःदाप पेःसी। खुङक्या छ्याबे तेःमीःजीक पावलगीइ हीब्रु तामलाःम्ले एःन्डु लाःकाला स्युःसी–
Currently Selected:
प्रेरीत 21: SYW
Highlight
Share
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
