प्रेरीत 20
20
पावल माकेडोनीया ओःले ग्रीसला
1ओः हल्ला छ्याबे काःल्मीःजीक पावलगीइ प्रभुला सेमल्हुक लुगेन एफीससकीइ आतानोःक्याला रुःप चीःदी साहस तेर्सी। ओःले खुङ ओःलाःम्ले बीदा पेःदी माकेडोनीयाछ्योले काःल्सी। 2ओःला लेप्मीःजीक खुङगीइ ठाउँ ठाउँला काःल्दी मीःक्याला साहस तेर्केन लेःङ्गोक्या लाःसी। ओः तीङ्ला खुङ ग्रीस देशला काःल्सी, 3ओःले दावा सुमथुप ओःलारा तेःसी। ओः तीङ्ला खुङ जहाजलाःम्ले सीरीया इलाका डोगेन ठीवा चेसी। एःन्डुले डोजे छोल्सुना चीङ यहुदीक्याइ खुङगीइ वीरोधला जाल पेःदेरा एः लाःकेन ताम खुङगीइ छोर्सी। ओः सोङ्गारा, खुङ माकेडोनीयाले पेःदी लोःदी डोगेन ठीवा चेसी। 4बेरीया क्याःसाला तेःकेन पुरसकीइ पुः सोपात्रोस, थेसलोनीके क्याःसाला तेःकेन अरीस्तार्खस रा सीकन्दस, डर्बी क्याःसाला तेःकेन गायस, एशीया इलाकालाःम्ले ओःङ्क्योक तुखीकस रा त्रोफीमस, ओःले तीमोथी खुङ ङीमु काःल्सी। 5खुङक्यादी ङी भन्दा तोःङ्लारा काःल्दी ङीःला त्रोआस क्याःसाला कुःतेःती एःके। 6ङीःदी नीस्तार मेःलीङ सीःङ्मीःजीक फीलीप्पी क्याःसालाःम्ले जहाजला जादी काःल्सी, ओःले ङीःमा ङा तीङ्ला खुङक्याला त्रोआस क्याःसाला फ्रेसी। ओःला ङीःक्या ङीःमा तीःनथुप तेःसी।
पावलगीइ मेःन्दा चीग स्याराला सीक्योकलाःम्ले सोम्बो जोक्योक
7साङीःमाइ कुःङ्मु ङीः ओःला एःक्योक प्रभुइ योबाक्या ङीमु प्रभुइ डेन साःजेला जोम्सी। पावलदी ङार्तो च्योःङ्रा डोकोःन्दी सोङ्गारा, खुङक्या ङीमु नुःप फेथुप खुङ ताम लाःती तेःसी। 8ङीः जोम्दी तेःक्योक तेङ्खाला माःङ्बुरा छेमीक्या थेप्ती एःके। 9युटीकस लाःकेन पीःटुक चीगदी माःदाङला तेःती एःके। पावलगीइ ताम लाःतेरा एःकासुना ओः पीःटुक ङीचु लोःसी ओःले तेङ्खा सुमलाःम्ले साला ताःप्सी। खुङक्याइ ओः पीःटुकला याःरला लाङ्गासुना खो सीसीःङ्दी एःके।
10इःनाङ पावल वाःला काःल्दी ओः पीःटुकखाला खाप्लु क्याःप्सी ओःले खोला पाःङ्ज्या ताप्ती एःन्डु लाःसी, “ख्याक्या हा माःले, चीलेलाःना खो सोम्बोरा एः।” 11ओः तीङ्ला पावल तेङ्खाला जासी ओःले थाम्जेर डीक्ती प्रभुइ डेन साःसी। ओःले पावलगीइ नाःम माःलाङथुप खुङक्या ङीमु ताम लाःमीःजीक खुङ ओःलाःम्ले काःल्सी। 12खुङक्याइ ओः पीःटुकला खीमला क्याल्तेर्सी ओःले ओः पीःटुक सेन्क्योक सोङ्गारा थाम्जेर केःदाङ काःल्सी।
त्रोआसलाःम्ले मीलेटसथुप
13ङीःक्यादी तोःङ्लारा जहाजला जादी अस्सोस क्याःसाला काःल्सी। पावलदी अस्सोसथुप काङ्बाइरा डोगेन सेम पेःगारा ङीःइ खुङला अस्सोस क्याःसालाःम्ले चीग्रा जहाजला काल्गेन तेःदाम पेःसी 14खुङगीइ ङीःक्याला अस्सोसला फ्रेमीःजीक खुङलाङ ङीःइ जहाजला काल्सी ओःले ङीःक्या थाम्जेर मीतीलेने क्याःसाछ्योले काःल्सी। 15ङार्तो च्योःङ्रा ङीः जहाजला जादी खीयस टापुइ सुःरला लेप्सी। नाङ च्योःङ्रा ङीः सामोस टापुला लेप्सी ओःले सेःइङीःमु च्योःङ्रादी ङीः मीलेटसला लेप्सी। 16एशीयाइ इलाकाला तीःजी मीक्युर्चेला पावल एफीसस क्याःसाला माःस्युबारा डोगेन ठीवा चेती एःके, चीलेलाःना खुबाथुप खुङ पेन्तीकोस मेःलीङगीइ ङीःमुरा यरुशलेमला लेप्चेला फीसीःङ्दी एःके।
एफीससकीइ कोःम्साइ छेस्योक्या ङीमु पावलगीइ बीदा
17मीलेटसलाःम्ले पावलगीइ एफीसस क्याःसाइ कोःम्साइ छेस्योक्याला मीलेटसला खुङला फ्रेचेला स्यो लाःती लेःङ्गो ताङ्सी। 18खुङक्या लेप्मीःजीक पावलगीइ लाःसी, “एशीयाला ओःङ्क्योक तोःङ्गीइ ङीःमामीःजीकरा ख्याक्या ङीमु तेःसुना ङाःइ ओः ङीःमाक्या काःन्डुले ताङ्बा ओःखो ख्याक्याइ छोर्ती एः। 19यहुदीक्याइ जीङथाकक्याइ पेःगासुना काःजे खेप नी छ्योम्बो तुःक्पुला लेप्नाङ ङाः नम्र काःल्दी मीज्यु पाप्तेरा प्रभुइ लेःगा पेःसी। 20ख्याक्याला याःथाक ओःङेन चीङ ताम ङाःइ सेमला माःज्याबारा ङाःइ मीःक्याइ तोःङ्ला ओःले खीम खीमला लोप्कासुना ख्याक्याला लाःतेर्सी। 21यहुदीक्याला ओःले ग्रीकक्याला खुङक्याइ लाःयोलाःम्ले स्याबा पेःदी कोन्ज्योछ्योले लोःदो ओःले उःइ प्रभु येशुला सेमल्हुक लुदो लाःती ङाःइ पाङ्बु तेर्ती एः।
22ताःसे ङाः चाङ्मा लाइ लाःक्योक ङीःन्दी यरुशलेमला डोदेरा एः। ओःला ङाःला ची ओःङेन इःम्बा ङाः चीङ मेसेए। 23इःनाङ एःजेदी सेदी एः, यरुशलेमला ङाःला चेङाङला लुगेन एः ओःले तुःक्पु ज्योर्केन एः लाःती चाङ्मा लाइ ङाःला थाम्जेर क्याःसाक्याला तेङ्दी एः। 24इःनाङ ङाःइ जुबु चीङ रीःनगीइदी एः लाःती ङाः ठीवा मेचे। ङाः एःजे चीग्रा सेम पेःगे प्रभु येशुइ ङाःला तेर्क्योक लेःगा पेःसीःङे, ओःखोदी कोन्ज्योइ तेर्क्योक अनुग्रहइ बारेला याःबु लेःङ्गो फेल्गेन लेःगा इःङे। 25ओःले ङाःला टेःम्बा एः, ङाःइ ख्याक्या काःन्दी काःन्दीला कोन्ज्योइ क्याःल्खापकीइ लेःङ्गो फेल्बा, ख्याक्या सुइयाङ ङाःला फीर्च्या मेःथोङेन एः। 26ओः सोङ्गारा, तीःरीङ ङाः ख्याक्याला पाङ्बु तेर्तेरा लाःके, ख्याक्या नाःङ्ला सुङ सीःङ्दाक काःल्सी लाःना ओःखोइ माःताक्पा ङाःला मेःक्याःप्केन एः। 27चीलेलाःना कोन्ज्योइ थाम्जेर उद्देश्य ख्याक्याला लाःचेला ङाःला क्याःप लोःदी म्याः। 28ओः सोङ्गारा, ख्याक्या राःङगीइरा राःङगीइ कोःरालु पेःदो ओःले चाङ्मा लाइ ख्याक्याला जीम्मा तेर्क्योक थाम्जेर मीःक्याइदीङ कोःरालु पेःदो। कोन्ज्योइ कोःम्साइ याःबु कोःरालु पेःदो चीलेलाःना प्रभु येशुइ ओः मीःक्याला राःङगीइ ठा स्याःलच्युदी ङ्योःक्योक इःङे। 29ङाःइ छोर्ती एः, ङाः काःल्मीःजीक जीबा लाःङ्जे च्योःङ्रा फाराक्या ख्याक्याइ कील्ला स्युःगेन एः, ओःले ख्याक्याला तुःक्पु तेर्चे मेःपोर्केन एः। 30ख्याक्या नाःङ्लेराङ स्योप क्युःर्केन मीःक्या थेङेन एः ओःले खुङक्याइ प्रभुला सेमल्हुक लुगेनक्याला राःङगीइ माःरीक्पा लाःमछ्योले खेर्चे छोल्गेन एः। 31ओः सोङ्गारा, खुङक्या ङीमु च्यागाताःक्पु पेःदी तेः, ओःले ङाःइ लोः सुमथुप कुःङ्मु ङीःमाला मीज्यु पाप्तेरा ख्याक्याला चेताउनी तेर्क्योक ताम टेःम्बा माःचे।
32ताः ङाः ख्याक्याला कोन्ज्योइ लाःक्पाला क्याप च्योल्तेर्के ओःले खुङगीइ अनुग्रहइ लेःङ्गोइ भरला पोःर्तेर्के। कोन्ज्योइ दी लेःङ्गोइ ख्याक्याला सेमल्हुकला राःम्बु जोजेला ओःले राःङगीइ मीःक्याला मोलामगीइ भागीदार जोजेला रोः पेःगेन एः। 33ङाःइ सुइदीङ सेर, ङुल ओःले केःलाइ मीफामु माःबे। 34ख्याक्या राःङगीइरा थोङ्दी एः, ङाःइ लाःक्पाइ लेःगा पेःदी ङाः ओःले ङाःइ रोःक्याला कोःकेन थाम्जेर स्याःक्या जुटाइतीसी। 35ङाःइ थाम्जेर तामला ख्याक्याला उदाहरण तेर्ती एः, ख्याक्याइयाङ एःन्डुलेरा खुबाथुप लेःगा पेःदी ल्हे म्याःक्योक मीःक्याला रोः पेःदो। प्रभु येशुइ राःङगीइरा लाःक्योक तामला टेःम्बा साल्दो, ‘लेःङ्जे भन्दा तेर्चे याःबु इःङे।’”
36दी तामक्या लाःसीःङ्मीःजीक पावलगीइ थाम्जेर ङीमु पीमु चुसी ओःले प्रार्थना पेःसी। 37खुङक्या थाम्जेर ङुःसी, ओःले खुङक्याइ पावलला पाःङ्ज्या ताप्ती च्य्वाक पेःदेरा बीदा पेःसी। 38खुङक्याइ फीर्च्या पावलगीइ तोःङ्बा मेःथोङेन एः लाःती पावलगीइ लाःक्योक तामला खुङक्याइ माःङ्बुरा तुःङाल पेःसी। ओःले खुङक्याइ पावलला जहाजथुप क्याल्तेर्सी।
Currently Selected:
प्रेरीत 20: SYW
Highlight
Share
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
