प्रेरीत 15
15
यरुशलेमगीइ महासभा
1ओः तीङ्ला चीङ मीःक्या यहुदीया छेत्रलाःम्ले ओःङ्दी एन्टीओखीयाइ प्रभुला सेमल्हुक लुगेनक्याला एःन्डुले लोप्काला स्युःसी, “मोशाइ तेर्क्योक छ्येइ ठीमगीइ लाःक्योक च्योःङ्राले खतना माःबेथुप ख्योक्या थार्चे मीःखुए।” 2एःन्डुले लोप्क्योक थोङ्दी पावल रा बरनाबास खुङक्या ङीमु ठुक्पा स्योर्सी। ओः सोङ्गारा, ओःलाइ आतानोःक्याइ पावल, बरनाबासला ओःले राःङ्सा चीङ मीःक्याला दी तामगीइ बारेला प्रेरीतक्या ओःले छेस्योक्याला टीःजेला यरुशलेमला ताङ्सी। 3कोःम्साइ मीःक्याइ खुङक्याला ओःलाःम्ले ताङ्मीःजीक खुङक्या फोनीके ओःले सामरीयाले पेःदेरा डोगासुना राःङ्सा क्युःपाइ मीःक्याइ प्रभुला सेमल्हुक लुक्योक तामक्या ओःलाइ सेमल्हुक लुगेन मीःक्याला लाःतेर्सी। दी ताम कोःदी ओःलाइ सेमल्हुक लुगेन थाम्जेर मीःक्या माःङ्बुरा केःदाङ काःल्सी।
4खुङक्या यरुशलेमला लेप्मीःजीक ओःलाइ प्रेरीतक्याइ, छेस्योक्याइ ओःले कोःम्साइ मीःक्याइ खुङक्याला तोःङ्ज्याङ पेःसी। ओःले पावल रा बरनाबासकीइ ओःला जोम्क्योक मीःक्याला कोन्ज्योइ खुङक्यालाःम्ले पेःक्योक थाम्जेर लेःगाक्याइ बारेला लाःतेर्सी। 5इःनाङ प्रभुला सेमल्हुक लुगेन चीङ फारीसी छोबाइ मीःक्यादी लाःङ्दी एःन्डु लाःसी, “प्रभुला सेमल्हुक लुगेन राःङ्सा क्युःपाइ आतानोःक्याइयाङ खतना पेःराकोःउए ओःले मोशाइ तेर्क्योक छ्येइ ठीम ङीःन्कोःउए।”
6प्रेरीतक्या ओःले कोःम्साइ छेस्योक्या दी तामगीइ लागी जोम्दी टेः पेःसी। 7माःङ्बुरा टाःटेः पेःमीःजीक पत्रुसकीइ लाःङ्दी लाःसी, “आतानोःक्या, ख्याक्याइ छोर्तीरा एः, राःङ्सा क्युःपाइ मीःक्याइ प्रभु येशुइ बारेला याःबु लेःङ्गो लाःती कोःज्युक ओःले सेमल्हुक लुज्युक लाःती कोन्ज्योइ ङाःला ख्याक्याइ कीललाःम्ले माःङ्बुरा तोःङ्ला दाम्क्योक इःङे। 8थाम्जेरकीइ सेमगीइ ताम सेगेन कोन्ज्योइ उःक्याला तेर्क्योक च्योःङ्रारा राःङ्सा क्युःपाइ मीःक्याइ लागीङ चाङ्मा ला तेर्सी ओःले खुङक्याला राःङगीइदी लाःती तोःङ्ज्याङ पेःक्योक तेङ्तेर्सी। 9खुङगीइ यहुदी ओःले राःङ्सा क्युःपाइ कील्ला भेदभाव मेःबेए। खुङक्याइ कोन्ज्योला सेमल्हुक लुक्योक सोङ्गारा खुङक्याइ लाःयो क्षमा पेःतेर्सी। 10ओः सोङ्गारा, चीले यहुदीक्याइ दी ठीम प्रभुला सेमल्हुक लुगेनक्याला काल्दी कोन्ज्योला सीःताङ लाङेन्दी? ओः ठीम नाः उःइ फाफामुक्याइयाङ खुर्खुबा ओःले नाः उःक्याइ खुर्खुबा। 11इःनाङ उः सेमल्हुक लुउए, उःक्याइयाङ प्रभु येशुइ अनुग्रहलाःम्ले खुङक्याइ च्योःङ्रारा थार्चे ज्योर्ती एः।”
12थाम्जेर जोम्क्योक मीःक्या छ्याबे तेःसी ओःले राःङ्सा क्युःपाइ मीःक्याइ कील्ला कोन्ज्योइ खुङक्यालाःम्ले पेःक्योक याःमाछाककीइ लेःगाइ बारेला पावल रा बरनाबासकीइ लाःकासुना याःबुले कोःदी तेःसी।
13खुङक्याइ लाःसीःङ्मीःजीक याकुबकीइ लाःङ्दी लाःसी, “आतानोःक्या, ङाःइ ताम कोःदो। 14तोःङ्लारा कोन्ज्योइ राःङ्सा क्युःपाइ मीःक्यालाःम्ले चीङ मीःक्याला राःङगीइ मीः जोजेला दाम्क्योक ताम सीमोनगीइ लाःती एः। 15दी तामक्या कोन्ज्योइ लेःङ्गो तेर्केन मीःक्याइयाङ छ्येला प्रुःक्योक तामक्या ङीमु डीक्कुए। खुङक्याइ एःन्डुले प्रुःदी एः,
16‘ओः तीङ्ला ङाः लोःगे
ओःले रीःल्क्योक दाऊदकीइ खीम ङाः फीर्च्या जोगे।
ङाः ओः खीमगीइ रोःम्क्योक चीःक्पाक्या फीर्च्या ल्हादी याःरला लाङे
ओःले फीर्च्या ओःखोला राःम्बु जोगे।
17ओःले थाम्जेर राःङ्सा मीःक्याइ ङाःछ्योले सेम लोगेन एः,
ओःले ङाःइ दाम्क्योक थाम्जेर राःङ्सा क्युःपाइ मीःक्यालाङ ङाः राःङगीइदीरा लाःती केक्याःप्के। दी ताम लाःकेन्दी ङाः प्रभु इःङे।
18ङाःइ दी तामक्या माःङ्बुरा तोःङ्मीःजीकरा लाःसीःङ्दी एः।’#आमोस ९:११-१२”
19ओः सोङ्गारा, याकुबकीइ फीर्च्या लाःकाला स्युःसी, “ङाःइ ठीवाला कोन्ज्योछ्योले सेम लोदी खुङला सेमल्हुक लुगेन्दी राःङ्सा क्युःपाइ मीःक्याला उःक्या तुःक्पु मातेर्का। 20इःनाङ खुङक्याला एःन्डुबा इःगी प्रुःतेर्का, ‘कुला फुल्क्योक साःप्च्याक्या माःसा, व्यभीचार माःबे, जीङ्बा चीर्ती सेक्योक पशुक्याइ स्याक्या माःसा ओःले ठाक्याङ माःसा।’ 21चीलेलाःना मोशाइ प्रुःक्योक छ्येइ ठीमक्या तोःङ्मीःजीकरा थाम्जेर क्याःसाक्याला प्रचार पेःदी एः ओःले यहुदीक्याइ थाङ सोगेन ङीःमारी टाःङ्मा खुङक्याइ जोम्साखीमक्याला दीखो टोःउए।”
प्रभुला सेमल्हुक लुगेन राःङ्सा क्युःपाइ मीःक्याला प्रुःक्योक इःगी
22ओः तीङ्ला प्रेरीतक्या, कोःम्साइ छेस्योक्या ओःले कोःम्साइ थाम्जेर मीःक्या डीक्ती खुङक्या नाःङ्ले मेःन्दा ङी मीःक्याला दाम्दी पावल रा बरनाबास ङीमु एन्टीओखीयाला ताङ्तेर्केन ठीवा चेसी। ओः दाम्क्योक मेःन्दा ङी मीःक्यादी यहुदा (खुङला बारसाबास लाःतीङ लाःकुके) ओःले सीलास एःके। खुङक्या प्रभुला सेमल्हुक लुगेन आतानोःक्याइ कील्ला तोःङ क्याःप्केन मीःक्या एःके। 23खुङक्या मेःन्दा सीःइ लाःक्पाला एःन्डुबा प्रुःक्योक इःगी ताङ्तेर्सी,
“एन्टीओखीया, सीरीया ओःले कीलीकीयाला एःक्योक प्रभुला सेमल्हुक लुगेन राःङ्सा क्युःपाइ आतानोःक्याला, ङीः प्रेरीतक्या ओःले कोःम्साइ छेस्योक्यालाःम्ले टासीदेले। 24ङीःक्या नाःङ्ले काःल्क्योक चीङ मीःक्याइ ख्याक्या साःला ओःङ्दी ख्याक्याला तुःक्पु तेर्केन्दी ओःले ख्याक्याइ सेम छाबाछुबे जोगेन तामक्या लाःक्योक ङीःइ कोःसी। इःनाङ ओः मीःक्याला ङीःइ ताङ्क्योक मीःङे। 25ओः सोङ्गारा, ङीःक्या थाम्जेर जोम्सी ओःले ङीःक्या थाम्जेर डीक्ती चीङ मीःक्याला दाम्दी उःइ च्याःम्बु बरनाबास रा पावल ङीमु ख्याक्या साःला ताङ्तेर्केन टेः पेःसी। 26बरनाबास रा पावलगीइ उःइ प्रभु येशु ख्रीष्टकीइ लागी राःङगीइ मीःलीलाङ खतराला क्याल्दी एः। 27ओः सोङ्गारा, ङीःइ यहुदा रा सीलासला ताङ्तेर्ती एः। खुङक्याइयाङ ङीःइ प्रुःक्योक दी तामक्यारा ख्याक्याला लाःकेन एः। 28चीलेलाःना चाङ्मा ला ओःले ङीःक्याला दीखोरा डीक्पु नेसी ख्याक्याला कोःकेन ठीमक्याबाहेक राःङ्सा ठीमक्या काल्दी तुःक्पु मातेर्का। 29ख्याक्याला कोःकेन तामक्यादी दीक्यारा इःङे–
कुला एः तेर्क्योक स्याःक्या माःसा,
ठा माःसा,
जीङ्बा चीर्ती सेक्योक पशुक्याइ स्याक्या माःसा,
ओःले व्यभीचार पेःजेलाःम्ले थारीङ्बु तेः।
एःजे तामक्यादी ख्याक्याइ ङीःन्सी लाःना ख्याक्याला याःबु ओःङेन एः। लाःकोन तामक्या एःजेरा इःङे।”
30ओः तीङ्ला ओः मेःन्दा सीः आतानोःक्याला दीखो इःगी तेर्ती एन्टीओखीयाला ताङ्सी। ओःला खुङक्याइ कोःम्साइ थाम्जेर मीःक्याला केक्याःप्ती ओः इःगी तेर्सी। 31ओः इःगी टोःसीःङ्मीःजीक ओःला प्रुःक्योक साहसकीइ तामगीइ पेःगासुना खुङक्या थाम्जेर केःदाङ काःल्सी। 32यहुदा ओःले सीलास खुङक्या राःङरा कोन्ज्योइ लेःङ्गो तेर्केन मीःक्या एःके। खुङक्याइ कोन्ज्योला सेमल्हुक लुगेन आतानोःक्याला माःङ्बुरा सुङक्या तेर्ती साहस तेर्सी ओःले खुङक्याइ सेमल्हुक राःम्बु जोतेर्सी। 33खुङक्या ओःला चीङ ङीःमाथुप तेःसी। ओःले ओःलाइ आतानोःक्याइ खुङक्याला मोलाम तेर्तीमाराङ खुङक्याला ताङेन आतानोःक्या साःला लोदी ताङ्सी। 34[इःनाङ सीलासदी ओःलारा तेःकेन सेम पेःसी।]#१५:३४ काःजे ग्रीक तामगीइ तोःङ्गीइ छ्येइ पेज्याक्याला दीखो पद ३४ म्याः।
35पावल रा बरनाबासदी चीङ ङीःमाथुप एन्टीओखीयालारा तेःसी ओःले राःङ्सा माःङ्बुरा मीःक्या ङीमु डीक्ती खुङक्याइ मीःक्याला लोप्सी ओःले प्रभु येशुइ बारेला प्रचार पेःसी।
पावल रा बरनाबास खाफ्याक्योक
36चीङ ङीःमा तीङ्ला पावलगीइ बरनाबासला लाःसी, “ताः उः लोःदी डोगा, ओःले प्रभुइ सुङ उःइ टाःम्क्योक थाम्जेर क्याःसाक्याला काःल्देरा ओःलाइ आतानोःक्या ची पेःदेरा दुबा तागा।” 37बरनाबासकीइ मर्कुस लाःकेन युहन्नाला खुङक्या ङीमुरा खेर्केन सेम पेःसी। 38इःनाङ पावलगीइदी खुङला ङीमुरा खेर्ती डोजे डीक्पु माने, चीलेलाःना खुङक्याइ लेःगारा माःसीःङ्बा मर्कुसकीइ खुङक्याला पामफीलीयालाःम्ले पोःर्ती ओःङ्दी एःके। 39ओः तामला पावल रा बरनाबास माःङ्बुरा ठुक्पा स्योर्सी, ओः सोङ्गारा, खुङक्या खाफ्यासी। बरनाबासकीइ मर्कुसला खेर्ती जहाजलाःम्ले साइप्रसछ्योले काःल्सी। 40इःनाङ पावलगीइदी राःङ ङीमु खेर्चेला सीलासला दाम्सी। ओःले प्रभुला सेमल्हुक लुगेनक्याइ खुङक्याला प्रभुइ अनुग्रहला पोःर्तेर्सी ओःले खुङक्याला ताङ्तेर्सी। 41खुङक्या सीरीया ओःले कीलीकीयाले पेःदेरा डोगासुना ओःलाइ कोःम्साइ मीःक्याला सेमल्हुकला राःम्बु जोदेरा काःल्सी।
Currently Selected:
प्रेरीत 15: SYW
Highlight
Share
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
