युहान्ना 20
20
होप्पॆरॆक्मा येःॽमा
(मट्टि २८:१-८; मारकुस १६:१-८; लुका २४:१-१२)
1हाङ् नाम्लेट्टामि डिना नाम्सङ् माक्मि मारियाम् माग्डालिनि येसुमि येःॽमाबि खारा। हाङ् खोसॆ येःॽमामि याः डॆक्मिम्पा लुङ्कॽवा लाराङ्मिम्पा खाङ्टकु। 2हाङ् खो हिरिरि पिन्से ऎन्डापा हाङ् सिमोन पाट्रुस नुङ् येसुऎ नाम्नाम् पिस्सिकुऎ टिङ्खुबा गरहाङ् लोसुचि, “आक्खाचिऎ कानिम् पारभु ग येःॽमाबाङ् लाफॆडुचि। हाङ् खो हाम्पि युङ्डुचॆर म लेसुङ्कानि।” 3हाङ् पाट्रुस नुङ् होइक टिङ्खुबा येःॽमाबि पिन्खाराचि। 4हिप्पान पिन्खॆॽमॆ सिसाचि, टर म होइकसॆ चाइ पाट्रुस पिम्फाक्डाउ हाङ् येःॽमाबि याॽल टाआ। 5हाङ् खोसॆ हुहु पोःप्मानुङ् येःॽमा हङ्सि खाङ्मार चे टेःॽन खाङ्टकु, टर खो येःॽमा हङ्सिॽयु चाइ माभॆन्। 6हाङ् सिमोन पाट्रुस सङ्क टाखारा हाङ् येःॽमा हङ्सि भॆना। हाङ् खोसॆस सिच्चि मोम्मिम्पा चेः टेःॽन खाङ्टकु। 7हाङ् येसुमि निङ्टवाँबि नॆःॽमिम्पा चेः चाइ होइढा चेःबाङ् फाक्मानुङ् एक्क ठालबि बॆक्भुङ्मिम्पा लॆटा। 8हाङ् याॽल येःॽमाबि टाखुबा टिङ्खुबा स हङ्सिॽयु भॆना। हाङ् खोसॆस खाङ्टकु हाङ् निवाँयुङ् लॆटु। 9(मान्ठाभनॆ आक्खाचिऎ येसु सिखॆमिम्पाबाङ् हिङ्पॽमान लॆ कामानुङ् निवाँनॆन् साब्चिराबिऎ खानावाँ हढारि मॆवाप्मिम्पा लॆटुचि)। 10आक्क डॆङ्पि आक्खा हिप्पा टिङ्खुबाचि खिम्पि खाराचि।
येसु मारियम माग्डालिनि नुङ् खाङ्ङुम्पा
(मट्टि २८:९-१०; मारकुस १६:९-११)
11टर मारियम चाइ हाप्से येःॽमा बाहिरा येप्ढाङ्मिम्पा लॆटा। खोसॆ हाप्से हुहु पोप्मानुङ् येःॽमा हङ्सि खाङु। 12हाङ् खोसॆ येसु युङ्मिम्पा ठालबि बिइःमा चेः चाङ्मिम्पा हिप्पा निवाँखाटॆखुबाचि खाङुचि। एक्क चाइ येसुमि निङ्टावाँ पोट्टा हाङ् होइक चाइ लाङ् पोट्टा पेन्ढाङ्मिम्पा लॆटाचि। 13हाङ् आक्खा निवाँखाटॆखुबाचिऎ मारियम सिमुचि, “नानो, आना मान्ठा हाःप्मे पाइनॆ?” हाङ् खोसॆ लोसुचि, “आक्खाचिऎ काम् पारभु लाफॆडुचि, टर हाम्पि युङ्डुचॆर, काङॆ लेॽङानि।”
14हाङ् आक्रॽमा खानावाँ इसिटु हाङ् खो डॆङ्कॽवा पोट्टा हिङ्पॽमार येसु खोम् कॆक्पि येप्ढाङ्पा खाङ्टकु, टर खो येसुन कामानुङ् चाइ मालेसु।
15हाङ् येसुऎ आक्क मेॽनुङ्मा सिमु, “नानो, आना मान्ठा हाप्मे पाइनॆ? आनॆ आसा यक्मे सिकुनॆ?”
मारियामऎ चाइ खोनुङ् यामुखुबा याॽमि चोप्लिङ्पि योम्पक् मुखुबा हला कामानुङ् लोसु, “टुङ्घङ्पो, आनॆ येसु गबाङ् लाखॆडुना हाङ्ग, खो हाबि युङ्डुनॆ काङा खाङ्मिॽङॆ हाङ् कॆ खो लाखॆकुङ।”
16हाङ् येसुऎ खो लोसु, “मारियम” हाङ् येसुमि साम्ला खेमुहाङ् मारियाम् येसु पोट्टा ऎम्पकाहाङ् हिबुरु खाप्पि लोसु, “राब्बोनि!” (आक्क लोमिम्पा चाइ “चिन्खुबो” लोमॆ यो)।
17हाङ् येसुऎ खो लोसु, “काङा आऎॽङॆ, मान्ठाभनॆ काङा हढारि आपाबि माखॆट्टिॽङा। बोरु काम् बुबुनुसाचिबि खारॆहाङ् ‘काङा काम् आपा हाङ् आम्नि आपा हाङ् काम् निवाँहाङ् नुङ् आम्नि निवाँहाङ्बि खॆॽमॆ पाइङा’ कामानुङ् लोसॆचॆ।”
18हाङ् मारियम माग्डालिनि टिङ्खुबाचिबि खारा हाङ् खोसॆ पारभु खाङ्टमिम्पा हाङ् पारभुऎ खो लोमिम्पा खानावाँ टिङ्खुबाचि खेम्मिटुचि।
येसु खोम् टिङ्खुबाचिम् लुम्पि
(मट्टि २८:१६-२०; मारकुस १६:१४-१८; लुका २४:३६-४९)
19हाङ् नाम्लेट्टामि डिना नाम्किक्खॆॽमिम्पा लॆटा। हाङ् टिङ्खुबाचि चाइ याहुडिचिम् किसिमाऎ लम्भॆरॆङ्मा सॆक्ठाङ्से हङ्सिॽयु पेन्मिम्पा लॆटामि। हाङ् मरक्लन येसु आक्खाचिम् लुम्पि टाआहाङ् येप्से लोसुचि, “आन्नाबि सान्टि लिर!” 20येसुऎ खोचि आक्र लोसिटुचि हाङ् खोम् हुक् नुङ् साक्लेप् खाङ्मिटुचि। हाङ् पारभु खाङ्टकुचिहाङ् टिङ्खुबाचि एट्टान चेन्चाआमि। 21हाङ् होइखेपा येसुऎ आक्खाचि लोसुचि, “आन्नाबि सान्टि लिर! मान्टहाङ् आपॆ काङा पाहाङ्डिङ्, आक्रहाङ् कॆ सङ्क आन्ना पाङ्हाङ्मे सिकानि।” 22आक्क डॆङ्पि “सॆङ्सॆङॆ लावा लासानॆ” कामानुङ् खोसॆ आक्खाचि सक्पि खोम् सक्मा मिप्पिटुचि। 23“आन्नॆ आसाम् हिङ्वा चाइ यङ्निकाम्नि, उम्चि हिङ्वा यङ्निमा लि। हाङ् आसाम् हिङ्वा चाइ आन्नॆ यङ्निटाम्निनि, आक्खाचिम् हिङ्वा यङ्निनि।”
येसु खोम् टिङ्खुबा ठोमाबि खाङ्ङुमिम्पा
24हाङ् येसु टिङ्खुबाचिबि टामार एपङ्हि टिङ्खुबाचिबाङ् एक्क ठोमा लोमॆ डिडुमास चाइ आक्कुबि माचु। 25मसॆ होइढा टिङ्खुबाचिऎ खो गर लोसुचि, “काङ्कॆ पारभु खाङ्टकुङ्का।” टर खोसॆ आक्खाचि लोसुचि, “हानाम्ढारि खोम् हुक्पि काटिऎ ठक्मिम्पा हुवा खाङ्टङानि, हाङ् आक्कुबि डिन्चाङानि हाङ् खोम् साक्लेॽपि हुगॆ डिन्चाङानि आक्रलढारि निवाँयुङ् लॆङानि।”
26हाङ् बाङ्चि डिना डॆङ्पि टिङ्खुबाचि होइखेपा सङ्क लम्भॆरॆङ्मा सॆक्ठाङ्से खिम् हङ्सिॽयु चुआमि। आक्रल चाइ ठोमा सङ्क आक्कुबि चुआ। लम्भॆरॆङ्मा माहेन्बक्पान येसु आक्खाचिम् लुम्पि टाआहाङ् लोसुचि, “आन्नाबि सान्टि लिर!” 27हाङ् येसुऎ ठोमा लोसु, “आम् हुक्खॆरॆॽवासिऎ काम् हुक् डिन्चाऎ हाङ् काम् हुक् खाङॆ। हाङ् आनाम् हुक्ऎ काम् साक्लेॽपि डिन्चोऎ। हाङ् साङ्का आलॆटॆ, टर निवाँयुङ् लॆटॆ।”
28हाङ् आक्रलरे ठोमाऎ येसु “काम् पारभु नुङ् कामि निवाँहाङ्!” कामानुङ् लोसु। 29हाङ् येसुऎ खो लोसु, “आनॆ काङा खाङ्टकिङ्ना हाङ् निवाँयुङ् लॆटिङ्ना, टर काङा माखाङ्रे सङ्क निवाँयुङ् लॆखुबाचि एट्टान आसिका टक्चामिम्पाचि यो।”
ग साब्चिराऎ लोमा यकुवॆ खानावाँ
30येसुऎ टिङ्खुबाचिम् ङारिङ्पि होइढा डिरिक् आक्खॆॽमाहा खानावाँ नुङ् योम्पक् सङ्क यिगु। आक्खा खानावाँ चाइ ग साब्चिराबि मासाप्टि। 31टर आन्नॆ येसु चाइ खिरिस्ट नुङ् निवाँहाङ्मि पासा यो हाङ् खोबि निवाँयुङ् लॆटानॆ हाङ् हानाम्स सिखॆॽनॆ हिङ्खामा टक्चाआनॆ कामानुङ् इघा खानावाँ गुबि साब्डा।
Currently Selected:
युहान्ना 20: LBR
Highlight
Share
Compare
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
