युहान्ना 19
19
येसु सेॽमॆ खानावाँ लिसा
1हाङ् पिलाटासऎ येसु लाखॆॽमिट्टुचिहाङ् कोर्रा टिमिटुचि। 2हाङ् टिलिङ्गाचिऎ चिचिङ्मि एक्क मुकुट चिगुचि हाङ् येसुमि निङ्टावाँबि खाम्टिटुचि। हाङ् हारमक्मक् राङ्मि चे चाङ्टिटुचि।#१९:२ आक्रल हाङ्ऎ चाइ हारमक्मक् राङ्ऎ चे चाङ्युक्सु। 3हाङ् खोम् नेन्टाङ् टाआमि हाङ् याहुडिचिऎ “ओ, याहुडिचिम् हाङ्” कामानुङ् पेसे ङाचिक्पि फॆगुचि।
4हाङ् पिलाटस होइखेपा बाहिर आम्पकाहाङ् याहुडिचि लोसुचि, “खाङाम्नॆ काङॆ ग याॽमिबि माङ्स आब्डिक् मॆखाङ्टॽङा लोमॆ आन्नॆ वाबाम्नॆ कामानुङ् आन्नाबि लाटॆॽमॆ पाइकुङ।” 5हाङ् येसु चिचिङ्मि मुकुट हाङ् हारमक्मक् राङ्मि चेः चाङ्मानुङ्न बाहिरा आम्पका। हाङ् पिलाटासऎ आक्खा याॽमिचि लोसुचि, “ग याॽमि खाङाम्नॆ।”
6हाङ् ढ्या याटाङ्पाचि हाङ् निवाँहाङ्मि खिम् हुङ्खुबाचिऎ खो खाङ्टकुचि हाङ् गरहाङ् याकासामि, “कुरुसाबि आक्क कॆङ्ढाङ्सॆ, कुरुसाबि आक्क कॆङ्ढाङ्सॆ!”
हाङ् पिलाटस्ऎ लोसुचि, “आन्नॆॽन खो कुरुसाबि कॆङाम्नॆ मान्ठाभनॆ कॆग खोबि माङ्स आब्डिक् माखाङ्ङा।”
7हाङ् याहुडिचिऎ खो लोसुचि, “काङ्काम् एक्क यायेॽमा चु, म रक्न ग याॽमि सिखॆॽमान लॆ। मान्ठाभनॆ खोसॆ ‘काङा निवाँहाङ्मि पासाङा’ कामानुङ् का।”
8हाङ् म खानावाँ खेमुहाङ् पिलाटास ऎट्टान किसिखारा। 9हाङ् खोसॆ येसु होइखेपा सङ्क हाङ्खिम् हङ्सि लाखॆटु हाङ् गरहाङ् सिमु, “आना हाम्पिऎ ठालबिऎना?” टर येसु माङ्स मॆयामु। 10मसॆ पिलाटसऎ येसु लोसु, “मान्ठा आना काङानुङ् यामुनानॆ? माल् आना लेहाङ्मॆ हाङ् सेॽमॆ ढुप्पाट्ट काङानुङ् चु लोमॆ आनॆ लेसुनानॆ?”
11हाङ् येसुऎ खो लोसु, “निवाँहाङ्ऎ मापिॽलढारि का सक्पि आनाम् माङ्स ढुप्पाट्ट लिनि। मसॆ आसॆ चाइ काङा आनाम् हुक्पि पिट्टिङ् खो चाइ डिरिक् हिङ्वा नुङ्मा लि।”
12येसुमि म खानावाँ खेमुहाङ् पिलाटासऎ येसु लेॽहाङ्मा यगु। टर याहुडिचि गरहाङ् याकासामि, “आनॆ ग याॽमि लेहाङ्सुना हाङ्ग, आना रोमि ढ्याहाङ् काइसारमि लाङ्काम् हॆॽनानॆ। आसॆ चाइ टाङ्पा हाङ् कामानुङ् का, आक्कसॆ चाइ काइसार काइर लॆकु।”
13हाङ् पिलाटसऎ आक्खाचिम् खानावाँ खेमुहाङ् येसु होइखेपा सङ्क बाहिरा ओम्फुबि लाटॆटु। आक्क चाइ लुङ्कॽवाऎ मुमिम्पा न्यायॆ लॆठाम् ठाल लॆटा। आक्क ठाल चाइ हिबुरु खाप्पि गाब्बाठा लोकुचि। 14हाङ् आक्क डिना चाइ फाक्मॆ लोमॆ चाडामि लागि योम्पक् टङ्मॆ डिनामि एपङ्हि बाजे फेरा पिलाटसऎ याहुडिचि गरहाङ् लोसुचि, “आम्नि हाङ् खाङाम्नॆ!”#१९:१४ गरक् बेलान न याहुडिचिऎ फाक्मॆ लोमॆ चाडामि लागि सामुङ् सेॽयुक्सुचि।
15टर खोचि गरहाङ् याकासामि, “आक्क लाखॆटॆ, आक्क लाखॆटॆ हाङ् कुरुसाबि कॆङ्ढाङ्सॆ।”
हाङ् पिलाटसऎ लोसुचि, “चाइबान कॆ आम्नि हाङ् कॆङ्ढाङ्मॆ टा?”
हाङ् ढ्या याटाङ्पाचिऎ लोसुचि, “रोमि ढ्या हाङ् काइसारबाङ् होइक काङ्कामि हाङ् माआ।”
16हाङ् कुरुसाबि कॆङ्माम् लागि खोसॆ येसु उम्चि हुक्पि पिट्टुचि।
येसु कुरुसाबि
(मट्टि २७:३२-४४; मारकुस १५:२१-३२; लुका २३:२६-४३)
मसॆ आक्खाचिऎ येसु उम्चि हुक्पि लासुचि। 17हाङ् येसुऎ खोम् कुरुसा टाङ्पॆॽन खिन्मानुङ् टाक्रक् लोमॆ ठालबि खारा। आक्क ठाल चाइ हिबुरु खाप्पि गालगाठा लोकुचि। 18आक्कुबि खोचिऎ येसु कुरुसाबि कॆङुचि हाङ् होइढा हिप्पा याॽमिचि सङ्क खोम् चुप्ठिङ् नुङ् बॆङ्सिङ् पोट्टा कॆङुचि। येसु चाइ लुम्पि चुआ। 19हाङ् पिलाटासऎ “नासाराटमि येसु, याहुडिचिम् हाङ्” कामानुङ् साप्मिम्पा एक्क साब्मारा साबुहाङ् कुरुसामि सङ्पिटु एप्टिसु।
20हाङ् आक्क आब्डिक्मि साब्चिरा डिरिक् याॽमिचिऎ पाढालॆटुचि। मान्ठाभनॆ कुरुसाबि कॆङ्मिम्पा ठाल हाटा कॆक्पिॽन चुआ। हाङ् आक्क साब्मार हिबुरु, लॆटिन् नुङ् गिरिक् खाप्पि साप्मिम्पा लॆटा। 21हाङ् ढ्या याटाङ्पाचिऎ पिलाटास गरहाङ् लोसुचि, “ग याहुडिचिम् हाङ् कामानुङ् ऎसाबॆ, टर गसॆ ‘काङा याहुडिचिम् हाङ्ङा का’ कामानुङ् साबॆ कामानुङ् लोसुचि।” 22हाङ् पिलाटसऎ लोसुचि, “काङॆ माङ् साबुङ् म साबुङ।”
23हाङ् टिलिङ्गाचिऎ येसु कुरुसाबि कॆङुचि हाङ् खोम् चे खोचि चोब्न खेःॽमॆ गारि रिचि भाग टिसुचि। हाङ् खोम् बाहिरा पोट्टा चाङ्मॆ चे चाइ माठिमिम्पा, टर मिट्टुबाङ् मिम्मुढारिन एक्कन डाक्मिम्पा लॆटा। 24मसॆ खोचि टाङ्पा टाङ्पाबि गर कासामि, “ग चे चाइ ऎनागुम्यॆ, टर आसाम् भागबि सिऎ कामानुङ् चिठ्ठा डॆन्टुम्यॆ।”
हाङ् निवाँनेन् साब्चिराबि “आक्खाचिऎ काम् चेः टाटाङ्पाबि हासुचि हाङ् बाहिराऎ चे चाइ चिठ्ठा डॆन्टुचि”#खोम्मिम्पासाम् २२:१८ लोमॆ खानावाँ आक्रहाङ् लिसा।
25हाङ् येसुमि कुरुसामि नेन्टाङ्न येसुमि आमा, येसुमि आमामि उम् नुसा कोलोपासमि खिम्टाङ्मा मारियम, नुङ् मारियाम माग्डलिनि येप्ढाङ्पा लॆटामि। 26हाङ् येसुऎ खोम् आमा नुङ् खोसॆ नाम्नाम् पिसिकुवॆ खोम् टिङ्खुबा खोम् कॆक्पि येप्ढाङ्पा खाङ्टकुहाङ् उम्मा लोसु, “आमो, खाङॆ, ग आम् पासान।” 27हाङ् येसुऎ आक्क टिङ्खुबा स लोसु, “खाङॆ, खो सङ्क आनाम् आमान।” आक्क डिनाबाङ् आक्क टिङ्खुबॆ येसुमि आमा खोम् खिम्पि लाखॆटु।
येसु सिखॆमिम्पा
(मट्टि २७:४५-५६; मारकुस १५:३३-४१; लुका २३:४४-४९)
28हाङ् येसुऎ ह खोम् योम्पक् लुक्खारा कामानुङ् लेसु। हाङ् निवाँनेन् साब्चिराबि चुऎ खानावाँ लिर कामानुङ् खोसॆ लोसु, “काङा वाइमे सिसिङ।”#खोम्मिम्पासाम् ६९:२१ 29हाङ् आक्कुबि एक्क पोरोम्पि चिक्खॆम्पा डिबु चुआ। हाङ् हिसप्मि हाँगामि निङ्टवाँबि चेः हिक्टिसुचि हाङ् एक्कसॆ आक्क डिबुबि रुमुहाङ् येसुमि याबि टिबिटु। 30हाङ् येसुऎ म डुङुहाङ् लोसु, “ह लुक्खारा” हाङ् खोसॆ खोम् निङ्टवाँ लेहाङ्सु हाङ् सक्मा टेरु।
येसु ठक्मिम्पा
31ह आक्क डिना चाइ वेन्डाक् लाम्पॆ टाऎ एट्टान ढ्या नाचामॆ डिनामि लागि परक्मॆ डिना लॆटा। हाङ् आक्क नाचामॆ डिना सिच्चि कुरुसाबि याइमा फॆन्नि कामानुङ् याहुडिचिऎ मिॽलाउचि हाङ् पिलाटस लोसुचि, “आक्खा सिखॆॽमा लॆःॽमिहा याॽमिचि सॆॽलॽन सिखॆॽमिर कामानुङ् उम्चि लाङ् योप्लाङ् पिट्टॆचॆ हाङ् कुरुसाबाङ् लाबहाङ्सॆचॆ।” 32मसॆ टिलिङ्गाचि टाआमिहाङ् येसु नुङ् कुरुसाबि कॆङ्मिम्पाचिम् लाङ् याॽल एक्कमि योप्लाङ् पिट्टुचि हाङ् होइकमि योप्पिटुचि। 33हाङ् खोचि येसुबि टाआमि, टर खोचिऎ खो आसिॽन सिखॆम्पा खाङ्टकुचि। हाङ् खोम् लाङ् मायोबुचि। 34टर आक्खा टिलिङ्गाचिबाङ् एक्कसॆ चाइ येसुमि साक्लेप्पि ठुॽलाङ्ऎ ठगु हाङ् मरक्लन ठक्मिम्पा ठालबाङ् हारि नुङ् योवा आम्पका।
35हाङ् आन्नॆ सङ्क ग खानावाँ निवाँयुङ् लॆहिसाम्नॆ कामानुङ् टाङ्पाम् मिगॆॽन खाङ्खुबॆ ग चुमॆक्सङ् पिॽमिम्पा यो। खोसॆ खो चाइबान यामुक् कामानुङ् लेकु हाङ् खोसॆ इमिम्पा खानावाँ चाइबानऎ लॆ। 36आक्खा खानावाँ चाइ “खोमि एक्क स सॆकॽवा योप्निऎ”#पारास्ठान १२:४६; यायेॽमा ९:१२; खोम्मिम्पासाम् ३४:२० कामानुङ् निवाँनॆन् साब्चिराबि साप्मिम्पा खानावाँ लिमाम् लागि लिमिम्पा रेम। 37हाङ् फेरि होइक निवाँनॆन साब्चिराऎ गरहाङ् इकु, “खोचिऎ टाङ्पॆ ठक्मिम्पा याॽमि चाइ खाङ्कुचि।”#जाकारिया १२:१०
येःॽमाबि येसु
(मट्टि २७:५७-६१; मारकुस १५:४२-४७; लुका २३:५०-५६)
38हाङ् आरामिठिया लोमॆ ठालबिऎ एक्क योसेफ लोमॆ याॽमि याहुडिचिम् टुङ्घङ्पाचिम् किसिमाऎ खुनिङ्म येसुमि टिङ्खुबा लिमिम्पा लॆटा। खो पिलाटसबि खारा हाङ् येसुमि सिच्चि ङागु। हाङ् पिलाटस्ऎ सङ्क लाखॆॽमा पिट्टु हाङ् खो खारा हाङ् येसुमि सिच्चि लाखॆटु। 39हाङ् युटा येसु चुब्सि टाखुबा निकोडेमास स योसेफ नुङ् चुआ। खोसॆ सुपङ्सु किलो मुर्रानुङ् एलाबाबाङ् मुमिम्पा नाम्नुऎ केवा लाटॆटु। 40हाङ् खोचि हिप्पाङ्ऎ याहुडिचिम् चालाना रक्न येसुमि सिच्चिबि नाम्नुऎ केवा सिटिबिट्टाचुहाङ् सुटिमि चेऎ मोमाचु। 41हाङ् येसु कुरुसाबि कॆङ्मिम्पा ठालमि कॆक्पि एक्क चोप्लिङ् चुआ। आक्क चोप्लिङ्पि एक्क उम्चङ् येःॽमा चुआ। आक्क येःॽमाबि मरक्लढारि आसास माहुम्मिम्पा लॆटा। 42आक्क डिना चाइ याहुडिचिम् नाचामॆ डिनामि लागि परक्मॆ डिना लॆटा। हाङ् म येःॽमा स कॆक्पिॽन चुऎसॆ खोचिऎ येसुमि सिच्चि आक्कुब्न युङुचि।
Currently Selected:
युहान्ना 19: LBR
Highlight
Share
Compare
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
