युहान्ना 21
21
येसु वाङ्चि टिङ्खुबाचिबि खाङ्ङुम्पा
1आक्क डॆङ्पि होइखेपा सङ्क येसु टिङ्खुबाचिबि टिबेरियास लोमॆ टोम्पलिॽवामि कॆक्पि गरहाङ् खाङ्ङुसा। 2सिमोन पाट्रुस, ठोमा लोमॆ डिडुमास हाङ् गालिलमि काना लोमॆ ठालबिऎ नाठानेल हाङ् जाब्डियामि हिप्पा पासाचि हाङ् खोम् होइढा हिप्पा टिङ्खुबाचि खोम्टि खॆॽमिम्पा लॆटामि। 3हाङ् सिमोन पाट्रुसऎ आक्खाचि लोसुचि, “काङा ङा लाप्सि खॆॽमॆ पाइङा।” हाङ् आक्खाचिऎ खो लोसुचि, “काङका स आनानुङ्न लङ्किङ्का।” हाङ् आक्खाचि खारामिहाङ् सिङ्खङ्पि ठाङामि। टर खोचिऎ सेन्सेन् पाइमार सङ्क एक्क स ङा मालाप्हिसुचि।
4हाङ् नाम्स माॽमि येसु टोम्पलिॽवा कॆक्पि येप्ढाङ्पा लॆटा, टर टिङ्खुबाचिऎ चाइ खो येसुन कामानुङ् मालेॽहिसुचि। 5हाङ् येसुऎ आक्खाचि लोसुचि, “लाङ्काम्चि, आन्नॆ ङा लाबाम्नॆ?” हाङ् खोचिऎ लोसुचि, “माआये।” 6हाङ् खोसॆ आक्खाचि लोसुचि, “सिङ्खङ्मि चुप्ठिङ् पाट्टा जाला कगाम्नॆ हाङ् आन्नॆ ङा लाप्काम्नि।” हाङ् खोचिऎ सङ्क येसुऎ लोमिम्पा ठालबि जाला कगुचि। हाङ् आक्कुबि गर डिरिक् ङा सिट्टा, खोचिऎ जालान मासॆॽहिसुचि। 7हाङ् येसुऎ नाम्नाम् पिस्सिकुयॆ टिङ्खुबॆ पाट्रुस लोसु, “खो ग पारभु रेम!” हाङ् म खानावाँ खेम्मा अक्सि सिमोन पाट्रुसऎ उम् बिल्ल्याङ्मिम्पा चेः नॆरु हाङ् योवाबि चेढिन्टा। 8टर होइढा टिङ्खुबाचि चाइ डिरिक् ङा सिॽमिम्पा जाला सॆस्से सिङ्खङ्बाङ्न डाॽमे पाइटामि। मान्ठाभनॆ टोम्पलिॽवाबाङ् बाखाबि आम्पक्माम् लागि मर मॆअङ् खॆॽमा पाब्निऎ लॆटा। एकग् मिटारार मॆअङ् खॆॽमार बाखाबि टाखॆयुक्सामि।
9हाङ् खोचि बाखाबि आम्पक्मार खोचिऎ ङा मिःबि हिड्ढाङ्पा हाङ् एक्क हिच्चि चारेपा आक्कुबि खाङ्टकुचि। 10हाङ् येसुऎ आक्खाचि लोसुचि, “आन्नॆ लाप्मिम्पा एक्क हिच्चि ङा गुबि लाप्पाम्नॆ।” 11हाङ् सिमोन पाट्रुस योवाखङ्पि ठाङाहाङ् ङाऎ चॆप्खॆडुवॆ जाला सॆस्से बाखाबि लाटॆटु। आक्कुबि डिढ्ढा डिढ्ढा एकक् ङापङ्सु ङा चुआमि। मरलॆःॽलि ङा चुआमि हाङ्स जाला चाइ मानाग्। 12हाङ् येसुऎ आक्खाचि लोसुचि, “डाबानॆहाङ् चाआनॆ।” हाङ् टिङ्खुबाचिबाङ् आसॆस “आना आसाना?” कामानुङ् सिम्मॆ निवाँ मामुहिसुचि। खोचिऎ खो पारभु कामानुङ् लेस्सिम्पा लॆटुचि। 13हाङ् येसु खाराहाङ् चारेपा लासुहाङ् हाःबिटुचि। हाङ् मरहाङ्न ङा सङ्क पिट्टुचि।
14येसु सिखेमिम्पाबाङ् हिङ्पका हाङ् टिङ्खुबाचिबि खाङ्मुडॆ ग चाइ सुम्चि खेपा लिमिम्पा लॆटा।
येसु पाट्रुस नुङ् यामुचाडॆ
15हाङ् आक्खाचिऎ चाइखॆटुचि हाङ् येसुऎ सिमोन पाट्रुस लोसु, “युहान्नामि पासा सिमोन, माल् आनॆ काङा इघाचिऎ बाङ्स डिरिक नाम्नाम् पिस्सिङानॆ?”
पाट्रुसऎ खो लोसु, “एमो पारभु, कॆ आना नाम्नाम् पिस्सिःॽना लोमॆ आनॆ लेकुना।”
हाङ् येसुऎ खो लोसु, “मरहाङ्ग काम सामुङ्चि कुसॆचॆ।”
16हाङ् येसुऎ पाट्रुस होइक खेपा गरहाङ् सिमु, “युहान्नामि पासा सिमोन, माल् आनॆ काङा चाइबान नाम्नाम् पिस्सिङानॆ?”
पाट्रुसऎ खो लोसु, “एमो पारभु, कॆ आना नाम्नाम् पिस्सिःॽना लोमॆ आनॆ लेकुना।”
हाङ् येसुऎ खो लोसु, “मरहाङ्ग काम सामुङ्चि खाङाचॆ।”
17हाङ् येसुऎ होइक खेपा स पाट्रुस सिमु, “युहान्नामि पासा सिमोन, माल् आनॆ काङा नाम्नाम् पिस्सिङानॆ?” हाङ् येसुऎ होइखेपा स “आनॆ काङा नाम्नाम् पिस्सिङानॆ?” कामानुङ् सिम्मिम्पासॆ पाट्रुस चाइखॆटु हाङ् येसु लोसु, “पारभु, आनॆ चोप्ठका लेकुना हाङ् कॆ आना नाम्नाम् पिस्सिःॽना लोमॆ स लेकुना।”
हाङ् येसुऎ खो लोसु, “मरहाङ्ग काम सामुङ्चि कुसॆचॆ। 18चाइबान कॆ आना लोक्ना, आना वॆन्चा लॆटानार आम् चे आम् टाङ्पेॽन हिक्युक्सुना हाङ् हाम्पि खॆॽमा मिन्ना, आक्कुबि खॆःॽना। टर पासिङ् पिक्खॆना हाङ् चाइ आनॆ आम् हुक् खिङ्पकुना मसॆ होइकसॆ आम् हुक् कुरुसाबि हिःक्पि हाङ् आना हाम्पि खॆॽमा मिन्नानि याॽमिचिऎ आना आक्कुब्न लाखॆःमि।” 19पाट्रुसऎ मान्टहाङ् सिखॆसे निवाँहाङ्मि निङ्लावा लॆकुवॆ लोमॆ खानावाँमि बारेबि येसुऎ आक्क खानावाँ इमिम्पा लॆटु। आक्क डॆङ्पि येसुऎ पाट्रुस लोसु, “काङा टिङ्ङॆ।”
येसुऎ नाम्नाम् पिस्सिम्पा टिङ्खुबा
20हाङ् पाट्रुस ऎम्पकाहाङ् गर खाङ्मार येसुऎ नाम्नाम् पिसिम्पा टिङ्खुबा खोचिम् डॆङ्डॆङ् डाप्मे पाइमिम्पा खाङु। (आक्क टिङ्खुबा चाइ भोजा चामार येसुमि साक्लेॽपि नॆन्से “पारभु आना आसॆ चाइ बङ्सिऎ?” कामानुङ् सिम्मिम्पा लॆटु)। 21हाङ् पाट्रुसऎ खाङ्टकुहाङ् येसु लोसु, “पारभु, खो चाइ याॽमिचिऎ माङ् लॆकुचॆ टा?” 22हाङ् येसुऎ पाट्रुस लोसु, “काङा माऎन्टारढारि खो हिङ्चाढाङ्र कामानुङ् मिङ्ङा हाङ्स, म आनाम् निङ्टावाँ टुक्मॆ खानावाँ हॆटा? आनॆ चाइ काङा टिङ्ङॆ।”
23मसॆ खोचिम् लुम्पि आक्क टिङ्खुबा चाइ सिखॆॽनि लोमॆ खानावाँ फुबका। टर येसुऎ खो सिखॆॽनि कामानुङ् चाइ मालोमिम्पा लॆटु, टर “काङा माऎन्टारढारि हिङ्चार कामानुङ् मिङ्ङा हाङ्स आम् निङ्टवाँ टुक्मॆ खानावाँ हॆटा?” कामानुङ् सिम्मिम्पा लॆटु।
24हाङ् ग टिङ्खुबाऎन इघा चोब्न खानावाँमि चुमॆक्सङ् पिडु हाङ् आक्खा खानावाँन साब्डु हाङ् खोसॆ पिॽमिम्पा चुमॆक्सङ् चाइबानऎ कामानुङ् काङ्कॆ लेकुङ्का।
लुक्पिॽमॆ खानावाँ
25हाङ् येसुऎ होइढा स डिरिक योम्पक् यिगु। काङा गर मिनुॽङा, खोसॆ यिक्मिम्पा आक्खा चोब्न योम्पक्मि बारेबि साब्मान हाङ्ग, ग बाखाटेम्पि खोम् साब्चिरा वाक्सुनि।
Currently Selected:
युहान्ना 21: LBR
Highlight
Share
Compare
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
