याकुब 1
1
1ग साब्चिरा चाइ निवाँहाङ् नुङ् पारभु येसु खिरिस्टमि योम्पक् मुखुबा काङा याकुबऎ हाबि ग हाबि फुबक्डामिहा निवाँहाङ्मि चोब्न याॽमिचि साप्मिम्पा यो। आन्ना चोब्न कॆ स्यामिकानि।
निवाँयुङ नुङ् निवाँ
2बुबुनानुसाचि, आन्ना सक्पि टाहा चोब्न खालाहा डुखाबि हाङ्हाङ् मिनानॆ। 3मान्ठाभनॆ आन्नामि निवाँयुङ् ठाःक्मिम्पासॆ आन्ना चोब्न खानावाँ आङ्हिखुबा लिकानि लोमॆ लेकाम्नि। 4टर माङ् खानावाँबि सङ्क काइर मालिरे चोब्न खानावाँ लेक्खुबा हाङ् वाप्खुबा लिमाम् लागि आन्नाम निवाँ ठाःक्सि टाहा खोप्चिनावाँ आङ्मानुङ् पेनानॆ। 5हाङ् हाम्पॆ याॽमि चाइ निवाँ टक्चाकुवॆ लिमाम् लागि निवाँ पाबुक्र, म खेःॽल पिक्खुबा निवाँहाङ् नुङ् खोसॆ ङागुर। हाङ् निवाँहाङ्ऎ खो निवाँ पिकु। 6टर आक्कसॆ ङाक्मार निवाँबि चाइ पिःॽङॆ रु पिॽङानॆ मिन्मानुङ् हॆॽनॆ, टर निवाँयुङ् लॆःॽमानुङ ङागुर। पिःॽङॆ रु पिॽङानॆ मिन्मानुङ् ङाक्खुबा याॽमि चाइ हिॽयापाऎ मिॽमानुङ् गिउमिउ लॆखुबा योवाबिऎ फॆङ्लॆॽवा रक्मान। 7आक्रक्मा याॽमिऎ चाइ पारभुबाङ् माङ्माङ् टक्चाकुङ् लोमॆ मिइखॆकु हाङ्सु नु। 8मान्ठाभनॆ आक्रक्मा याॽमि हिच्चि निवाँ नुङ्मा लि हाङ् माङ् योम्पक्पि स एक्क निवाँ लिमानुङ् योम्पक् यिक्नि।
माङ्स माआमिहा हाङ् चासुम्टाङ्पा याॽमिचि
9हाङ् माङ्चि सङ्क हॆॽनिहाचि कामानुङ् ङॆप्सिम्पा निवाँयुङ् लॆखुबाचि निवाँहाङ्ऎ खोचि पिॽमिम्पा ढ्या ठालबि चेन्चामिर। 10हाङ् चासुम्टाङ्पाचि चाइ निवाँहाङ्ऎ खोचि ऎङॆप्सिखुबा याॽमिचि मुमिम्पाबि चेन्चामिर, मान्ठाभनॆ खोचि ग ठाॽनाम्बिऎ हॆङ्खॆखुबा बुङ् रक्मान। 11मान्ठाभनॆ नाम् ङिब हाङ् आक्क कुसॆ लिसे खॆ मबाङ् घाँसा सोप्खॆसॆ खॆ हाङ् बुङ् हेड्ढॆ हाङ् आक्क किम्खॆ। आक्रहाङ्न चासुम्टाङ्पा याॽमि सङ्क उम् योम्पक् मुसे लुक्खॆ।
12हाङ् ठाःक्मिम्पा लःबि आसॆ चाइ डुखा आङुकु आक्क याॽमि चाइ आसिका टक्चामिम्पा याॽमि लि। मान्ठाभनॆ आक्रक्मा याॽमिऎ चाइ म ठाःक्मॆ लः लुक्खॆहाङ् निवाँहाङ्ऎ खो पिक्खाना कामानुङ् लोमिम्पा हिङ्खामामि नाम्याक् टक्चाकु। 13हाङ् आक्रक्मा ठाःक्मॆ योम्पक्बि सिट्टिखॆॽमार आसॆ सङ्क “काङा निवाँहाङ्ऎ ठाःक्मॆ पाइङा कामानुङ् आलोसुर” मान्ठाभनॆ निवाँहाङ्ऎ काइसॆ योम्पक्बाङ् ठाःक्सिखॆॽनि हाङ् खोसॆ आसास ठागुचिनि। 14टर चोब्न याॽमिचि उम्चि निवाँबिऎ काइसॆ खानावाँबि रुम्सिॽखॆस्से ठाःक्सिखॆःॽमि। 15गरहाङ् निवाँबिऎ काइसॆ खानावाँऎ हिङ्वा योम्पक् यिक्मॆ निवाँ मुकु हाङ् हिङ्वा योम्पक् जान्म लॆकु। आक्क डॆङ्पि आक्क हिङ्वा योम्पक् पुसे खॆ हाङ् आक्कसॆ याॽमि सिखॆॽमॆ योम्पक्बि टॆकु।
16मसॆ काम् बुबुनानुसाचि, आन्नॆ टाङ्पा टाङ्पान बङ्सिॽमॆ योम्पक् आयिगानॆ। 17हाङ् चोब्न काम्नुहा खानावाँ नुङ् हिङ्खामामि नाम्याक् कानिम् निवाँहाङ् आपाबाङ् टा खोसॆॽन नाम्फलिॽवाबि हाखुबा मुमिम्पा रेम। हाङ् खो चाइ हसहस होइकन लिखुबा लावा रक्मा हॆॽनॆ, टर खो हानाम्स लिढाङ्खुबा यो। 18हाङ् कानि चाइ खोम् सिरिस्टिबिऎ याॽलहा याॽमिचि लिमाम् लागि चाइबानऎ खानावाँबाङ् खोसॆ कानि खोम् निवाँबाङ् खोम् पासा मुसि।
खेम्मॆ हाङ् लॆःॽमॆ
19काङॆ नाम्नाम् पिस्सिमिम्पा काम् बुबुनानुसाचि, आन्नॆ ग खानावाँ वाबाम्नॆ। आन्ना नुःर खानावाँ खेम्खुबा, टाम्म यामुखुबा हाङ् माहॆङ्ले खेम्खुबा लिमा लॆकानि। 20मान्ठाभनॆ याॽमिमि सिरिऎ निवाँहाङ्ऎ मुमा मिन्मिम्पा निवाँनेन् योम्पक् यिगुनि। 21मसॆ आन्ना चोब्न काइसाहा खानावाँबाङ् मिउ पेनानॆ। हाङ् मिछुॽमा लिसे आम्नाबि चुऎ निवाँहाङ्मि खानावाँ निवाँबि युङाम्नॆ, आक्कसॆ आन्नामि लावा हिङ्चामिकु।
22टर निवाँहाङ्मि खानावाँ खेम्खुबा टे हॆॽनॆ, म खेम्मिम्पा रक्न पाइटानॆ, हॆॽनॆ हाङ्ग आन्नॆ टाङ्पॆ टाङ्पान बङ्सिकाम्नि। 23हाङ् एक्क याॽमिऎ खानावाँ ग खेम्कु टर म रक्न पाइनि हाङ्ग, आक्क याॽमि चाइ टाङ्पामि ङाचिक् आइनाबि खाङ्खुबा याॽमि रक्मान लि। 24खोसॆ उम् ङाचिक् आइनाबि खाङ्कु हाङ् आक्कबाङ् खाइहाङ् हाङ् काङा मान्टक्मा याॽमि लॆटिङॆ लोमॆ मरक्लन मिइखॆकु। 25टर आसॆ चाइ याॽमि फाक्खुबा चाइबानऎ यायेॽमाबि निवाँ टिकु हाङ् आक्कसॆ लोमिम्पा रक्न पाइ हाङ् म खानावाँ उम् निवाँबि युङ्ढाङ्कु, निवाँहाङ्ऎ म योम्पक् यिक्मिम्पाबि खो आसिका पिकु।
26हाङ् आसॆ काङा निवाँनेन् याॽमिङा यो मिनुकु, टर हाबि ग हाबि यामुटि हाङ्ग खोसॆ टाङ्पॆ टाङ्पान बङ्सिकु हाङ् खोसॆ निवाँहाङ्मि निङ्पि यिक्मिम्पा योम्पक् स हुन्नऎ लि। 27निवाँहाङ् आपामि लागि खोसॆ नेन्चामॆ योम्पक् यिक्मॆ लोमॆ आसास माआमिहा पिसाचि हाङ् लाङ्मिॽमाचि उम्चि डुखाबि नुःर खाङ्मॆ खानावाँ हाङ् बाखाटेम्पिहा काइसाहा खानावाँबाङ् मिउन पेन्मॆ रेम।
Currently Selected:
याकुब 1: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
