याकुब 2
2
याॽमिचि एक्क मिगॆ खाङ्मा लॆःॽमि
1काम बुबुनानुसाचो, आन्नॆ कानिम् निङ्लावा नुङ्मा पारभु येसु खिरिस्टबि निवाँयुङ् लॆःॽमिम्पासॆ याॽमिचिम् या खाङ्मानुङ् कोइचि नुःर हाङ् कोइचि चाइ काइर लॆःॽमा फॆन्नि। 2आन्ना खोम्मिम्पा ठालबि काम्नुहा काम्नुहा चे चाङ्खुबा हाङ् फिःइयामि आउठि वॆखुबाचि हाङ् नाग्लॆम्पा चे हाङ् मिउमिउन नाम्छुॽवॆ चे चाङ्खुबा माङ्स माऎ याॽमिचि टाक्मि। 3आन्नॆ काम्नुहा चे चाङ्खुबा चासुम्टाङ्पा याॽमि नुःर लॆसे, “गुबि आनाम् लागि काम्नुऎ पेन्ठाम् ठाल चु” टर म माङ्स माऎ याॽमि चाइ काइर लॆसे “मिउ पेनॆ” आठावा “पालुम्पिॽन पेनॆ” लोकाम्नि। 4आक्रक्मा योम्पक् यिगानि हाङ्ग माल् आन्नम् लुम्पिॽन आन्ना फाक्सिखुबा हाङ् काइसॆ निवाँ नुङ्मा याॽमि लिसानिनिऎ टा?
5बुबुनानुसाचि, खेमाम्नॆ, माल् बाखाबाटेमबिहा माङ्स ऎचुखुबा याॽमिचि निवाँयुङ्बि चासुम्टाङ्पा मुसॆ काङा नाम्नाम् पिसिखुबाचि कॆ पिकानि लोमिम्पा हाङ्डाम् पिॽमाम् लागि निवाँहाङ्ऎ आक्खा याॽमिचि मासॆगुचिहॆ? 6टर आन्नॆ ग माङ्स ऎचुखुबा याॽमि काइर लॆडाम्नि। माल् चासुम्टाङ्पा याॽमिचिऎ आन्ना सिगानिनिहॆ? हाङ् न्यायॆ लॆठाम् ठालबि सॆक्खॆटानिनिहॆ? 7माल् आक्खाचिन हॆॽनॆ आन्नॆ टक्चामिम्पा ढ्या निङ् येसु खिरिस्ट इचाखुबाचि?
8निवाँनेन् साब्चिराबि “टाङ्पामि गॆअङ्मॆअङ्हा याॽमिचि टाङ्पा रक्न नाम्नाम् पिसिटाम्चिनॆ” लोमॆ ढ्या खानावाँऎ लोसिन्टक्न लॆटानि हाङ्ग आन्नॆ नुऎ योम्पक् यिगुकानि। 9टर आन्नॆ याॽमिचि एक्क मिगॆॽन खाङाम्निनि हाङ्ग हिङ्वा योम्पक् यिगुकाम्नि। हाङ् यायेॽमाऎ लोसिन्ट मापाइमिम्पासॆ आन्ना आब्डिक् नुङ्मा लिकानि। 10मान्ठाभनॆ आसॆ यायेॽमाऎ लोमिम्पा चोब्न योम्पक् यिगुकु, टर आक्कबाङ् एक्क मिछुॽमा योम्पक् नासॆ लॆकु खो सक्पि चोब्न यायेॽमा नासॆलॆमिम्पा आब्डिक् सि। 11मान्ठाभनॆ एक्क निवाँहाङ्ऎन “ब्याबिचार आलॆटॆ” कामानुङ् लोडु हाङ् “याॽमि आसेरानॆ” सङ्क लोडु। आना ब्याबिचारा लॆःॽनानि हाङ्स याॽमि सेःॽना हाङ्ग यायेॽमाऎ आना आब्डिक् टि। 12मसॆ आम्नि खानावाँ हाङ् योम्पक् याॽमिचि फाक्खुबा यायेॽमा रक्न न्यायॆ लॆखुबा याॽमिम् रक्मान लिर। 13मान्ठाभनॆ आनॆ होइढा याॽमिचि नाम्नावाँ मॆलॆटुचिना हाङ्ग आनॆ सङ्क नाम्नावाँ टक्चाउनानि, टर आनॆ याॽमिचि नाम्नावाँ लॆडुचिना हाङ्ग निवाँहाङ्ऎ सङ्क आना नाम्नावाँ पि।
निवाँयुङ् नुङ् योम्पक्
14काम् बुबुनानुसाचो, एक्क याॽमिऎ “कानुङ् निवाँयुङ् चु” ग का टर म आनुसारॆ माङ्स योम्पक् यिगुनि हाङ्ग, आक्रक्मा निवाँयुङ्ऎ खो हिङ्चामिहिकुहॆ? खोसॆ माङ् काम्नुऎ योम्पक् यिगुवॆ? 15एक्क नुसा नुङ् चामा डुङ्मा हाङ् चाङ्मा चे माङ्स माआ, 16हाङ् आन्ना हङ्सिबि एक्कसॆ खो “नुःर खारॆ, कुसॆ पेनॆ हाङ् बखार चाऎ” लोकु टर पाबुऎ ठका माङ्स पिट्टुनि हाङ्ग आक्कसॆ माङ् योम्पक्र यिगुकुवॆ? 17गरहाङ्न निवाँयुङ् सङ्क आक्रक्मान। आक्कसॆ माङ्स योम्पक् यिगुनि हाङ्ग म निवाँयुङ् सिखॆम्पा लि।
18टर याॽमिचि गरहाङ् काग्मि, “आनॆ निवाँयुङ् लॆकुना, काङा चाइ योम्पक् मुःॽङा।” योम्पक् मॆड्डिङ्मा आम् निवाँयुङ् खाङ्मिॽङॆ हाङ् काम् योम्पक्बाङ् कॆ काङाम् निवाँयुङ् खाङ्मिना। 19आन्ना एक्क निवाँहाङ्पि निवाँयुङ् लॆकाम्नि। आक्क काम्नुऎन। टर एक्क निवाँहाङ्पि ग खारिॽमाङ्चिऎ सङ्क निवाँयुङ् लॆकुचि हाङ् खोनुङ् ठुरुरु यङुॽमि। 20निवाँ मॆड्डिङ्मा आन्ना, माल् योम्पक् मॆड्डिङ्मा निवाँयुङ् हुन्नऎ लि लोमॆ खानावाँमि चुमॆक्सङ् पाब्कानिहॆ? 21माल् कानिम् टुबालाबा आबाराहामऎ टाङ्पामि पासा इसाहाक युङ्ठङ्पि युङुहाङ् निवाँहाङ्मि ङारिङ्पि निवाँनेन् याॽमि लिमिम्पा हॆॽनॆ? 22खोम् निवाँयुङ् नुङ् योम्पक् सोरिसोरिन लॆटा। हाङ् योम्पक्ऎ खोम् निवाँयुङ् चाइबानऎ खाङ्मुसु। 23हाङ् निवाँनेन् साब्चिराबि गरहाङ् साप्मिम्पा खानावाँ लिसिखारा, “आबाराहामऎ निवाँहाङ्बि निवाँयुङ् लॆटु, हाङ्न खो निवाँहाङ्ऎ निवाँनेन् लोसु।”#उट्पाटि १५:६ मसॆ निवाँहाङ्ऎ खो खोम् लाङ्काम् लोसु। 24ह आन्नॆ वाबाम्नि याॽमि निवाँहाङ्मि ङारिङ्पि योम्पक्ऎ सङ्क निवाँनेन् लिक्मि, निवाँयुङ्ऎ टेःॽन हॆॽनॆ। 25गरहाङ्न चरॆक्मा राहाब लोमॆ मेॽनुङ्मामि बारेबि सङ्क मिॽलाआम्नॆ। खोसॆ खानावाँ वाप्सि टाडामिहा याॽमिचि नुःर लॆसॆ होइकन लाम् पाङ्हाङ्मिम्पा योम्पक्ऎन खो निवाँनेन् लिमिम्पा हॆॽनॆ? 26सालुङ् चाइ लावा मॆड्डिङ् मान्टहाङ् सिखॆम्पा लि मरहाङ्न योम्पक् मॆड्डिङ् निवाँयुङ् सङ्क सिखॆॽमिम्पा लि।
Currently Selected:
याकुब 2: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
