Pilipai 4
4
Pelototosi'a Mosinge ta'olu
1Laso tavivilo, ngatulu pumungenge noxou Tatananenge. Eni asexelangenge misevile mo opoleli utama so amaisinge. Eni a'osasinge manina xo ngingi loxo palaisi na'a xeli ane esoa so axalisou.
2Xe noxinge Iuotia xe Sinitike avikala pakia'u noxinge lexe ngingi tanoxou Tatananenge ane, laso ngaxolu opongengi vilesisisi. 3La nini ane vaitamixeli manina no anu xaixai, eni alinga noxine so nasu'uline'i tasema tamei no anu tu'umaxu noxi'a ne. Xo ane'i ilou miva'isuleli no anu xaixai so alanu vaikala laixe. Xe Kilemeni oli'a tavaitamixeli mose'i mipita no anu xaixai kalumo. Ane'i ne ualasi'a uxolu ukaukavunu no anu lavuku so mauli.
4Utotomu ngaxolu nga'osa no anu xoluxolu noxinge noxou Tatananenge. A alemolu 'ola, ngaxolu nga'osasi.
5Anu laixe so upalasi no ie'i tamitema latala lexe opongengi lexasi noxi'a tamenexinge. Mo ngalavu aloxo 'o, Tatananenge alaimanasi. 6Opongengi uuali uasi, no anu mi ma'ia la ngapilixinu noxou Mosingesi. Ngavikala noxou mo ngavikala laixe so ngalingau su'uli no anu ngiou aneva. 7Xo axone la Mosinge u'oxonu opongengi uai se'isisi e se'isisi. Vote'i so mi ne axovaio, xo uua'ulixu xavutalamenge avile? Ia tava'u xo ngaxolu noxou Kalaisiti Iesua, laso xoluxolu lalavulusi ulosinge ne uutululunu opongengi ilou tangengi.
8Ioxe tavivilo, vaikalaxeli telexu aloxo 'o. Utotomu xavutalamengi uxoxolu no anu mi ane kalavoi no anu uasi xe mi laixe so tataxanu xe mi ane ulapusi xe mi ane malemalenga xe mi ane so sexelasi xe mi ane tamitema ivikalasou laixesi. Ani, ngaxavutalanu mimi ane lailaixe u'uli'uli xe mimi ane temanu laixe so ta'itinu axonesi. 9Laso ane, mi ma'ia epela'ingexu xe ngekasou laixe mo mi ma'ia ngelomusilo elemolu mo ngemaisilo e'oxonu, la ngamulimulinu axone utotomusi. La anu Mosinge e mosou xoluxolu lalavulusi a uxolu noxinge ne.
Polu mu'osasou su'uli ane Tapilipai mipilixinu noxou
10La eni a'itinu Tatananenge ualasou manina xo ngexolu xo mo muxali vaimomo 'o la opongengi mu'avuti so tangengixola. Manina, tei ngingi tangengixo mo mune'e axonesi ia vote'i so ngasu'ulileli uasi. 11Ia anu loxo axolu 'o mo opoleli ukakamuli mimi se'i asoti no anu ka avikala aloxo 'o uasi. Xo eni eno'u lavulavu no anu vote'i so loxo axolu kaini axova, la opoleli uai se'isisi no anusi. 12Loxo a'oloxola o axolu no anu mimi latanu la anu mi vile uasi. Eni loxo exalisou laki no anu vote'i so opoleli uai se'isisi no anu xoluxolu iouiou. Laso loxo la'ilalixo ulolutu o asolixo xe loxo mimixeli tavu'alo o akamuli avile la eni axolu a'osasi. 13Xo noxou anu ane ulavusou ulosilo xavi, la amomomo no anu mimi mukalusi.
14Ia ngingi ne nge'oxo laixe manina so nge'una no anu tu'umaxu noxilo 'o ka ngekalanu su'uli mune'e. 15La loxo ngingi Tapilipai ngelavu, tatei mi ne elanu vaikala laixe tei xe exexesou polovinisi Masetonia la tatemanu pita vilela i'una noxilo so isu'ulileli no anu mi vile uasi. A ngingi nesi ngeva'isu no anu xaixai noxilo axone. 16Xo no voxo loxo exolu ne Tesalonaika la alaxu mose'i ngekalanu nene'axu alauna noxinge so ngesu'ulileli. 17Ia anu loxo opoleli ukakamulinu avonge temanu axone uasi. Mi ane opoleli ututuluou a so alauna noxinge uleme mo so ngingi menge ngaxalisou nene'axu laixe no latanula. 18Ia ano'o vaikala lamana lexe mimi e ngekalanu a exalisou avile, usoti no anu ngiou sevile uasisi. Exolu e'ana'ana mole akakamulinu mi vile uasi xo Epavilotitusi muxalixu avonge temanu noxilo. Anu mi ne anu loxo mi vile lailaixe ane ngepilixinu lexe noxou Mosinge ka tuma'u laixe muxali noxou mo u'osasousi. 19La Mosilo musosovosou mimi lailaixe mulolutu noxou so taxalisou a noxou Kalaisiti Iesua. Laso mi ma'ia laixe so xoluxolu noxinge ane ngasoti no anu la anu umomomosou ane. 20Laso nenge ta'itinu ualasou Mosinge e anu Mosinge xe Maminge ulai ulai mole utalo uasisi.
Vaikalaou Polu si'a Tapilipai kaluxusou
21Eni avikala aso noxinge ngingi tamitemaou Kalaisiti Iesua u'isalili mukalusi. Xe ane'i tavivinge noxi'a taxoxolu 'o ivikala aso noxinge kalumo. 22Ane'i tamitemaou Mosinge u'isalili lai 'o mukalusi ivikala aso noxinge. Ia ane'i noxi'a so ixaixai no tasou Sisa, la pakia'a manina lexe avikala aso noxingesi.
23La amasaxau lexe ngaxamulinu iaiama noxou Tatananenge Iesua Kalaisiti no anu ulengengi. Anu anesi.
Currently Selected:
Pilipai 4: ATA
Highlight
Share
Compare
Copy
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
