Pilipai 3

Itema ulopala noxou Kalaisiti anu ulapu manina ane

1Ioxe tavivilo, telexu aloxo 'o. Ngaxolu nga'osa no anu xoluxolu noxinge noxou Tatananenge. Loxo akaukavunu vaikala ano'ola la kalakalaxo no anu uasi xo axamulinu lexe anu so u'oxonu latolosinge. 2Ngalaxa'i laixe noxi'a tamitema so xaixai masua olele xo ane'i loxo ta'a'a tavovasi. Ane'i to ne ipoposou vasime'a vitanisi so ikalavoi lexe anene sosovo noxou Mosinge. 3Ia uasi, sosovo manina noxou uxolu noxinge nenge'a ta'ei ane Ulenu upamuxanenge so ta'itinu Mosinge ualasou. Mo nenge ane tatoxu Kalaisiti Iesua xe talopalanu mi vile no anu vasimenge so usu'ulinenge uasisi. 4Ai ngalomu, loxo mi so vasimenge usu'ulinenge axone la eni masi alopalanu ane. Xo loxo itema aneva u'itinu mi vile no anu vasimolu so ulopalanu, la eni aua'ulixu no anu to. 5No anu lavulo'o noxilo la exolu xe no anu voxo 8-sou la mi'oxonu sosovo no anu vasimelo. Eni itema Isilaeli no laili noxou Peniamini. Vaikalaxeli Ipilu u'isalili aloxo papa olie atie. Mo opoleli mututuluou lo no anu vote'i e noxi'a Tapalisi. 6Eni xavileliou avile mole ekakamulinu vote'i so elosi'a tatemanu pitapita tu'umaxu. Mo loxo no ie'i tamitema ane i'oxo lexe vote'i so taxali talapu a no anu lo, la eni mi vile so ito'omeloxu uasisi.

7Ia mimi mukalusi tei ane e'oxo lexe laixe noxilo ne, eni esaxisou lexe mi so usu'a vitanisi xo vaimomo 'o taleli u'oxoxu Kalaisitisi. 8La anenesi uasi, loxo noxilo la mimi no lialia mukalusi anu mi so usu'asi. Xo eni atongonu lavulavusou Kalaisiti Iesua anu Tatanaleli lexe mi lailaixe mo uua'ulixu mimi ne mukalusi avile. Xo noxou Kalaisitisi, la esu'anu mimi ne mukalusi aloxo mosomoso 'osi mo so ateteli noxoumo. 9Eteteli axone la e'una mo a axolu avile noxou. Xo eni axavutala lexe axali alapu xo no anu vote'i so amulimulinu lo no anu ilixo noxilo uasi. Vote'isou exali alapu no iou Mosinge a so elopala noxou Kalaisitisisi. Xo no anu vote'i so lopalasi la Mosinge umoxo'inge lexe talapu no iou. 10La mi ane opoleli u'oxoxu a so alavusou Kalaisiti mo a'una no anu xavi e mutulusou no anu soli. Amasaxau so apita no anu tu'utu'umaxu e mutavulenu xe taleli uxali iou vilesisi noxou loxo musoli. 11Xo no anu anene, la axomaiou alopalanu voxo so Mosinge utulusilo no anu soli.

Polu oponu mututuluou lamaki so uxalisou

12La eni avikala lexe exalisou ilixou Kalaisiti mukalusi mo exali itema laixe loloni uasi. Ia eni asoa so lexe axalisou mo ateteli no anu mi nesi xo anu mi e Kalaisiti Iesua mutetelisiloxu anesi. 13Ani, tavivilo, eni atongoleli lexe ateteli avile no anu uao. Ia alavusou a'oxonu aloxo 'o. Mi ane so tatei la asu'anu tumalilou avile io toxeleliou mi e uxolu no laxuleli so axalisou. 14Eni asoa so axali no anu lamaki so axalisou palaisi. Palaisi e ava noxou Mosinge mupolonu noxou Kalaisiti Iesua. Mua'avalilo so atelai axolu laixe noxou.

15Laso nenge ta'ei lonenge matana avile la laixe so oponenge vilesisi no anu vaikala e elemolu 'o. Xe ngiou aneva opongengi iou vilemo no anu la Mosinge molu upela'ingexu. 16Ia ilixo laixe ane a uxoxolu noxinge mukalu la taxolu no anu axonesi.

17Ioxe tavivilo, ngingi mukalusi ngamulinu ilixoleli. Xe ane'i ane mimaisou muamua'i noxixe loxo pikisa ka mimulinexi no anu, la ngautitii'a so ngano'u lavulavu noxi'a. 18Xo ane'i mose'i la ixililiou xaixai noxou Kalaisiti no ovu valautu no anu muamua'ixa'a. A elemolu noxinge alaxu tavu'alo mukalu mo atama so alemolu 'ola. 19Ane'i xo ne ilomulomuxu masamasaxa no anu vasime'a mole mi ne loxo mosi'asi. La utotomu xavutalai'a uiaveou mimi so lialiasi mo i'itinu ilixo ane laixe so imaila no anu. Tamitema anene ixalisou mamulosi. 20Ia loxo nenge 'o, la nunisinge a tualasou Mosingesi. Laso anu ane molu ne une'e so upamaulinenge la oponenge ulei so taxomaiou. Anu e Tatananenge Iesua Kalaisiti. 21No anu xavi noxousi la umulaxu mimi mukalusi no laxu so u'uli laxunu. La no anu xavi anenesi uxiunu vasimenge pelepelesou 'o uxali iou vilesisi loxo anu vasimolu lailaixe mo iaxu.

Currently Selected:

Pilipai 3: ATA

Highlight

Compare

Copy