Kolosi 1

1Eni Polu a. Eni aposeliou Kalaisiti Iesua xo no anu masaxa noxou Mosingesi. Nexi noxou vivinge Timoti a takaukavunu lapasi 'o. 2Takaukavunu ulai noxinge tamitemaou Mosinge mu'isalili ne Kolosi ane lopala noxinge pumuxu noxou Kalaisiti. Amasaxau lexe ngaxamulinu iaiama ilou xoluxolu lalavulusi noxou Mosinge anu Maminge.

Polu muvikala laixesi'a Takolosi noxou Mosinge

3Loxo nexi tavikalasinge noxou Mosinge e Tatananenge Iesua Kalaisiti Momu la utotomu talemolu laixesinge noxou. 4Xo telomu lexe ngelopala noxou Kalaisiti Iesua mo ngalavusou ngasexelaxa'a tamitemaou Mosinge mu'isalili mukalusi. 5No voxo loxo vaikala laixe anu temanu manina muxali noxinge tei la ngeno'u lavulavusou nene'axu laixe e so ngaxalisou ili'i. Laso maixene ngingi a ngalopalanu ngaxomaiou mi e Mosinge ulaxa'inu laixe so ulalaxisinge ne. 6Vaikala laixe ne uxaxalixu nene'axu mo a ususuku no xale tuatuala mukalusi. Anu iou vilesisi aloxo musoko'u no taingengi no voxo tei ngelomusou mo ngelavu no anu iaiama noxou Mosinge manina. 7Mi ne anu vivinge Epavilasi mupela'ingexu. Anu ne ulavusou uveisa'inexi so noxi'a taxolu tamitema so xaixai 'o mo nexi tasexelaxu manina. Xaixai ma'ia Kalaisiti upilixinu noxou so uno'u taninexe no anu la ulavusou u'oxonu laixesi. 8Anu mua'alomexi no anu sexela noxinge e Ulenu mu'avutinoxu no taingengi.

Polu mulingau su'ulisi'a Takolosi noxou Mosinge

9Laso musoko'u no voxo loxo telomusou a'alosinge laixe ne la utotomu talingau su'ulisinge noxou Mosinge. Mo so ngalavu avile no anu masaxa noxou mo Ulenu Laixe ulosinge lavulavu u'asi'asi ilou tilovo laixe. 10Xe no anu muamua'ingenge la ulovou xoluxolungenge noxou Tatananenge mo so u'osasou no anu teletelexu mukalusi. Xe no anu xaixai aneva laixe nga'oxonu la uxalixu nene'axu. Xe no anu lavulavu noxinge so Mosinge la ulelemesi. 11-12Mo talinga kalumo lexe no anu xavi noxou lailaixe mutoxoxa'a la u'oxonu pakia'inge so loxo mi ma'ia uxali la ngatulu pumungenge mo opongengi uai se'isisi no anu. Xe nga'osa'osa so ngavikala laixe noxou Maminge. Xo anu molu muxalixinge laixe umomomo so ngaxalisou lavilelusou mimiou. Mimiou ne musovosou lexe noxinge tamitemaou mu'isalili ane so taxolu no anu lamanaxusi. 13Xo tei la nenge texolu no anu xavinu isivoxosi. Ia anu mu'umenenge ka muvulanenge so taxolu no anu laili noxou Olu e usexelaxu so molu u'uli laxunenge. 14Laso noxou Olu la taxolu lalavulusi a, xo anu mupilixinu lapesinge e mukalusou tina'unenge so susu.

Polu muvikalasou xoluxoluxu Kalaisiti ilou xaixai noxou

15Ioxe, nenge tamomomo so tamaisou Mosinge uasi, ia Olu ne anu iou vilesisi loxo Mosinge laso anu vote'i so talavusou. Anu laposalaxu u'uli'uli no anu mimi mukalusi e Mosinge mukoinu 'o. 16Xo noxou, la Mosinge mukoinu mimi mukalusi no tualasou xe no lialia 'o. Muxalixu mimi ane tasaxisou no ienge xe mimi ane tamomomo so tasaxisou no ienge uasi, aloxo ta'angelo so xavi xe ta'ulenu ane i'uli'uli xe tamimi ane xavine'i mo ualaualasi'a. Mimi mukalusi molu noxousi xe mimi mukalusi a noxoumo. 17Tei loxo mimi mukalusi uxali uao la anu muxolusi. Mo xo noxousi la mimi mukalusi upita mu'isalilisi. 18Anu kisou pita noxou xe pita anu vasimolu. Anusisi tava'u maulixu pita. Anu laposalaxu ane mutulu mumauli no anu soli la mu'uli noxi'a leviani ane so itulutulu. Mo so axone la anu upalasi lexe anu u'uli'uli no anu mimi mukalusi. 19Xo Momu mu'osa manina so temanu xoluxoluxu loloni uxolu uana'ana noxou Olu ne. 20Xe Mosinge mulalaxinu vote'i e noxou Olu so ulivunoxu mimi so lialia xe so tualasou noxou. Laso Olu mulili no ovu valautu xe sialuxu munixi mo so ukalusou kalipala xe u'oxonu vote'i so mimi mukalusi ulivu noxou Mosinge.

21Xo manina, tei la opongengi muxolu mukalipala noxou Mosinge mo muxililiou xe ilixomengi masuasi. 22Ia vaimomo 'o no anu soli no anu vasimolu Olu la Mosinge mukalusou kalipala mo mulivunixinge so ngaxolu opongengi vilesisi noxou. Mo so loxo utulusinge no iou la usaxisou xoluxolungenge lexe ulapu mo malemalenga mo lamanasi. 23Laso ngingi la ngatulu pumungenge no anu lopala so ngasasalo uasi. Xo ngelomusou vaikala laixe mo mupela'ingexu mi e so ngalopalanu ngaxomaiou, laso ngaxexesou mamu. No anu vaikala laixe nesi eni Polu 'o exali amitema so axaixaisou. Mo votovotosou a mulala muxali no anu xale tuautala mukalusi.

Polu musu'uline'i Takolosi

24Ioxe, vaimomo loxo atavulenu navunavu so asu'ulingengi la a'osasousi. Xo Kalaisiti a utatavulenu navunavu so vasimolu e pita noxousio. Laso eni a'una ava'isu no anu xo opoleli ututulu lexe usivita avile. 25La Mosinge molu mutulusilo so axaxaisou pita noxou. Mutulusilo so asu'ulingengi xo anu xaixai noxilo so alanu vaikala noxou loloni. 26Vaikala ne tatei la muxolu mutalumexa'a tatemanu lailaili mukalusi no lialia. Ia vaimomo 'o a muxolu mupala'a no ie'i tamitemaou Mosinge mu'isalili. 27Xo anu masaxa noxou Mosinge so upela'ingexu vaikala e mutalume ne. Vaikala ne anu mi so takulukemolu kena mo ta'osa'ilasou xo anu lailaixe so usu'uline'i tamitema no anu lailaili mukalusi. Anu aloxo 'o. Kalaisiti a uxolu nonano noxinge ne, laso mimi lailaixe so tualasou Mosinge e ngaxolu ngaxomaiou ne, ngingi ngaxalisou ane. 28Laso nexi talanu vaikalasou Kalaisiti noxi'a tamitema vilevilesi mukalusi. Xe tapelototosi'a mo tavotone'i no anu vaikala mu'asi'asi loloni. Mo so loxo tatulusi'a no iou Mosinge la xoluxoluxa'a noxou Kalaisiti ulomotelesi. 29Laso maixene asoa mo sasaieliou xaixai ne, xe xavisou ano'u noxou Kalaisitisi xo anenesi uauavutunixilo 'o.

Currently Selected:

Kolosi 1: ATA

Highlight

Compare

Copy