Pilipai 2

Pelototo lexe Tapilipai ixolu opone'i vilesisi

1Ioxe atali'i noxinge aloxo 'o. Ngingi ngalavusou ngaxalisou mamatola noxou Kalaisiti, ne? Mo ngaxamulinu sexela noxou u'oxonu opongengi uai se'isisi, ne? Mo nge'una ngepita no anu xoluxolu noxou Ulenu, ne? Mo tangengingenge so nga'oxonu alauna noxinge ngato'o, ne? 2Loxo anene manina, la nga'oxonu osa noxilo uxali loloni avile no anu vote'i aloxo 'o. Ngaxolu no anu xavutala vilesisi mo ngateteli no anu sexela vilesisi mo ngapita opongengi vilesisi mo xavingengiou masaxa vilesisi. 3Mamu so nga'oxonu mi vile no anu masaxa noxingemo o so ngaxalixu ualasinge utila no anu. Ngingi vilevilesi ngalu'engengi no anu opongengi mo ngasaxisinge lexe ngingi tami vitanisi no taine'i tamenexinge. 4Opongengi ututuluou mimi so ngingi menge ngaxalisou su'uli no anu uasi, ngaxavutalanu mimi so leviani ixalisou su'uli no anu kalumo.

Kalaisiti molu mulu'enu laso Mosinge mu'itinu avile

5Anu laixe so tangengi iou vilesisi aloxo noxou Kalaisiti Iesua. 6Muxolu la temanu xoluxoluxu iou vilesisi noxou Mosingesi. Ia anu usaxisou tanixu so mumomomo noxou Mosinge ne lexe anu mi so ukamakulunu uasi. 7Laso anu molu mululusou ka mu'italonu so muxali itema so xaixai vitanisi. La muxali loxo tamitema, 8xe ane'i misaxisou loxo itema 'osi. Xe anu molu mulu'enu ka mumulinu masaxa noxou Mosinge xo mole mumomomo avile no soli. Ani, soli e no ovu valautu. 9Laso maixene Mosinge mu'itinu teitexi musuku mo mulosou uala vile lailaixe ane uua'ulixu ualauala mukalusi. 10Mo so loxo ualasou Iesua upala'a la tami mukalusi no tualasou Mosinge xe no lialia xe no laxu lialia la ixolasou tava'a so imaxa'u mama'u noxi'a. 11Mo vaikala lexe Iesua Kalaisiti anu Tatananu mimi mukalusi ula no anaxa'a tami ne mukalusi. La no anu vote'i anene la ualasou Mosinge utilasi.

Mosinge ta'olu so ixolu loxo lalamo no lialia

12Ai tamaula, utotomu ngingi ngalavusou ngalomuxu pelototo noxilo, laso ngalomuxu ano'ola. Anu laixe so ngalomuxo loxo axolu no taingengisi uasi, xo axolu nopaxa noxinge a ia ngalomuxu pelototo ano'o laixe manina. No anu pamauli e ngexalisou mukalu la ngamama'u mo opongengi u'olo'olou so ngamomosou avile. 13Xo anu ane so uxaxai nonano noxinge, a Mosingesi. Anu a uxaxai so u'avutinoxu osa no opongengi so ngamulinu masaxa noxou u'isalili ka ulosinge xavi so nga'oxonu.

14No anu mi ma'ia so nga'oxonu la no anu osasi. Ngakalapusou uasi mo ngapelesou anangenge no anu uasi. 15Mo so axone la ngingi menge ngapala'aningenge lexe ngingi Mosinge ta'olu ane xoluxolungenge mulapusi mo lamanasi. Xo ngingi ngaxolu no tainu laili so ilixo ukilikalu mo xililisi laso laixe so mi vile no anu xoluxolungenge so ito'omengexu uasi. Ngaxolu loxo lalamo no anu isivoxo so lialia 'osi. 16Xe ngatolosou vaikala so mauli noxi'a. Mo so no anu voxo noxou Kalaisiti olele la tava'u osa noxilo a ngingi nesi. Xo upala'a lexe eni esoa mo sasaieli no taingengi, la epuleli uasi.

17Laso loxo tava'u maulixo 'o so unixi ula la anu loxo usiali upita ilou mi e ngepilixinu no anu lopala noxinge lexe noxou Mosinge. Eni a'osa so uxali axone mo amasaxau lexe ngingi kalumo ngaxamulinu osa noxilo 'o. 18La avikalangengi lexe laixe so nga'osa mo so eni kalumo axamulinu osa noxinge ne.

Polu muvikala lexe anu upalusou Timoti ulai ne Pilipai

19Ioxe, eni alopalanu Tatananenge Iesua lexe anu u'oxonu vote'i so maxuveni uasi la apalusou Timoti une'e noxinge. Mo so loxo ua'alongenge noxilo no anu lailivuxu la u'avutinoxu osa noxilo. 20Apalusou Timoti xo itema vilela oponu vilesisi noxilo aloxo anu 'o uasi. Xo anu oponu u'oxoxu xoluxolu noxinge manina ane. 21Io ane'i leviani la opone'i ututuluou mimi noxi'amo, ixavutalanu mimi noxou Iesua Kalaisiti so ixaxaisou uasi. 22Ia loxo noxou Timoti 'o la ngingi ngelavusou ilixo noxou. Anu upalasi lexe musu'ulileli so texaxaisou vaikala laixe aloxo itema olu usu'ulinu no anu xaixai noxou. 23Laso taxolu sevileo mo amalei lexe mi ma'ia uxali noxilo laso ane, alaxu vilesisi apalusou une'e noxinge. 24Ia lopala noxilo lexe Tatananenge ukisinu vote'isilo so eni melo apalea ane'e noxinge ne.

Polu muvikalasou Epavilotitusi

25Ia exavutala lexe laixe so apalusou vivinge Epavilotitusi ulivu une'e noxinge. Anu muva'isuleli no anu xaixai noxilo mo muveisa'ileli no anu oto e taxolu no anu 'o. Musu'ulileli aloxo ngingi menge ngepalusouxu 'o. 26Apalusou ulivu xo anu oponu utama lexe umaisingela. Anu muuali xo mulavu lexe ngingi ngelomusou a'alo so siki noxou. 27Xo manina mane la usoli, ia Mosinge mu'alaunasou mo mupamaulinu. Ia anusi uasi, Mosinge mu'alaunasilo no anene kalumo xo loxo 'o io tu'umaxusou upita no anu tu'umaxu ane atavulenu 'o. 28Laso maixene opoleli u'osa manina so apalusou une'e noxinge so loxo ngamaisou la nga'osa'ilasi. Xe loxo ngamaisou lexe laixenusi la eni kalumo opoleli uualisingela uae. 29Laso nga'osa so ngalivunoxu u'una no taingengila no anu ualasou Tatananenge. La tamitema ane xo ne ngataxane'i laixe. 30Xo anu mu'oxonu xaixai noxou Kalaisiti la mulai alai no anu soli. Anu uxavutalanu mauli noxou so ulaxa'inumo uasi. Oponu mututuluou xaixai ngepilixinu no avolu e so usu'ulilelisi.

Currently Selected:

Pilipai 2: ATA

Highlight

Compare

Copy