Vilemoni 1
1
1Eni Polu a, eni amitema so lakalavusu xo no anu xaixai noxou Kalaisiti Iesuasi. Nexi noxou vivinge Timoti a takaukavunu lapasi 'o so ulai noxine Vilemoni. Nini vivixe ane tasexelaxene mo namenexixe no anu xaixai 'o. 2Mo nexi tavikala kalumo noxie vivixe Apia xe noxou Alikipusi e ulavusou uveisa'inexi no anu oto noxou Mosinge e taxolu no anu 'o. Xe noxi'a tatemanu pita e ipita no tasine, tavikalangengi mukalusi aloxo 'o. 3Nexi tamasaxau lexe ngaxamulinu iaiama mo xoluxolu lalavulusi noxi'a Mosinge anu Maminge ilou Tatananenge Iesua Kalaisiti.
Polu mulemolu sexela ilou lopala noxou Vilemoni
4Eni loxo avikala noxou Mosinge la utotomu alavusou alemolu ualasine mo avikala laixesine noxou. 5Xo elomusou a'alosine lexe nasexelaxa'a tamitemaou Mosinge mu'isalili mo nalopala noxou Tatananenge Iesuasi. 6Nenge nengei lopala na'a nenge vilesisi axone, laso eni alinga noxou Mosinge lexe u'oxonu lavulavu noxinge no anu mimi lailaixe e texalisou noxou Kalaisiti uleme tatila. 7Ani vivilo Vilemoni, nini nalavusou nasexelaxa'a tamitemaou Mosinge mu'isalili mo na'oxonu pakia'u opone'i. Elomu axone laso muxalixu osa'ila noxilo mo mumamatolanu opoleli.
Pelototo lexe Vilemoni oponu ulu'e noxou Onesimusi
8Ioxe, laso eni masi amomomo so akasine no anu vaikala no ualasou Kalaisiti so namulinu vote'i laixe no anu mi e a so alemolu 'o. 9Ia uasi, xo eni amasaxau akatu se'isisi noxine mo nalomuxo xo no anu sexelasi. Eni Polu amitema so asosovosou mo alanu vaikalaou Kalaisiti Iesua a, mo xo no anu xaixai anenesi a axolu akalavususou 'o. 10Enisi a akatu noxine lexe oponeni lexa noxou alixeli Onesimusi. Eni amomu no anu lopala xo exolu ekalavusu 'o la mune'e noxilo xe evotovotonu, laso mulopala.
11Ioxe, tei la nano'u su'uli vile noxou uasi, ia vaimomo 'o anu umomomo so nenge nengei tano'u su'uli noxou. 12Mo a apalusou ulivu une'e noxine, ia anusi uasi xo opoleli umulinu kalumo. 13Eni axolu akalavusu 'o xo no anu vaikala laixe la nini vote'i so nasu'uleli uasi. Laso eni emasaxau lexe noxou Onesimusi taxolui so uno'u tanixene mo usu'ulileli 'o. 14Ia e'oxo lexe mamu so a'oxonu mi vile ane oponeni vilesisi no anu tei uasi. Xo amasaxau lexe asouneni no anu su'uli vile uasi, anu laixe so na'alaunasilo no anu masaxa na'a ninisi.
15Xo manina, Onesimusi mu'ume muxolu va'axu noxine voxo se axo'o. Ia anu masi muxali axone mo so loxo nalivunoxu noxine la ngilou ngaxolu avilesi. 16Ngaxolu ne la anu silevimeni ia silevi vitanisi to uasi, xo anu vivine so nasexelaxu manina. Noxilo la opoleli u'osasou axone ia loxo noxine la osa noxine masi utila noxou avile. Xo no anu vasimene la usu'ulineni xo anu silevimeni, xe noxou Kalaisiti la usu'ulineni kalumo xo anu vivine ane.
17Laso ane, loxo nasaxisilo aloxo amenexine no anu xaixai noxou Kalaisiti la na'unanu Onesimusi noxine a loxo anu a eni ne. 18Xe loxo mususunixine vile o tina'uxu noxine la naxiunu mo so eni ualasilo uai no anu tina'u ne. 19Eni Polu akaukavunu vaikala ano'o no avolo 'o. Eni melo akolinu tina'u ne. Ia no anu tina'uxene so maulixene e uai noxilo 'o, la masi tava'u so alemolu uasi, ne? 20O vivilo, nalomu. No anu ualasou Tatananenge eni amasaxau lexe na'alaunasilo so na'unanu Onesimusi axone. Xo nenge nengei taxolu noxou Kalaisiti laso na'oxonu mi ne so opoleli uai laixe.
21La eni alavu lexe nini nalomuxosi, laso maixene ekaukavu mune'e noxine aloxo 'o. Mo elavu lexe ilixo laixe so na'oxonu noxou Onesimusi ne masi uua'ulixu linga noxilo 'o. 22Ia mi vile so alemolu aloxo 'ola. Lopala noxilo lexe Mosinge ulomuxu vaikalamengi so ngapilixileli noxou la u'italoleli alivu ane'e noxinge. Laso nalalaxinu ngiou vile no tasine so aai no anu.
Tamenexu Polu no anu xaixai mikalanu aso noxou Vilemoni
23Epavilasi e noxou takalavusu 'o xo no anu xaixai noxou Kalaisiti Iesua, mukalanu aso noxine. 24Mo tamenexilo no anu xaixai e Maki xe Alisitakusi xe Temasi xe Luku ivikala aso noxine kalumo.
25Eni amasaxau lexe ngaxamulinu iaiama noxou Tatananenge Iesua Kalaisiti no anu tangengi mukalusi ne. Anu anesi.
Currently Selected:
Vilemoni 1: ATA
Highlight
Copy
Compare
Share
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
