Taitusi 3
3
Pelototo so xoluxoluxa'a Mosinge ta'olu
1Ioxe, mo aloxo 'ola. Na'avutinoxu xavutalai'a lexe itaxane'i tatiatila xe taxamani mo ilomuxa'a no anu mi ane laixe so i'oxonu. 2Mo ane'i ivikala masuai'a tamenexi'a uasi. Xe ane'i tamitema so i'avutinoxu tu'utu'umaxu uasi, ixolu se'isisi mo opone'i lexa noxi'a tamenexi'a mukalusi. 3Xo nenge tei la texolu texovulaulau mo talomuxu Mosinge vaikalaou uasi. Texovulaulau xo Uluaou mu'oxo lolonenge mo masamasaxa no anu vasimenge mu'avutinoxu osa vitanisi no oponenge. Texolu oponenge sixula mo teisuisu mo tematapianenge ngato'o. 4Texolu axone ia Mosinge anu mosou pamauli tanunenge misevile la sexela noxou singe tamitema mupala'a. 5Sila maixene anu mupamaulinenge. Mupamaulinenge ia tava'u noxinge uasi xo nenge ta'oxonu mi vile ulapu uasi. Mi ne, mi so alauna noxou xo ukolinu susu noxinge uasi. Anu mu'ulosinge mo muxalinenge ta'olu ta'alavua noxou Ulenu Laixe. 6Xo no anu xaixai noxou Iesua Kalaisiti anu Itema so Pamauli la anu munixi'u Ulenu Laixe noxinge laso tepalava noxou. 7Kalaisiti muiaiamanenge laso Mosinge mumoxo'inge lexe tamalemalenga no iou. Mo musosovosinge nenge ta'olu lexe taxalisou mauli kaluxu uasi ane talopalanu taxomaiou. 8Vaikala ano'o manina e maninasi. Laso loxo nalemolu la amasaxau lexe xavineniou. Mo so axone la tamitema ane ilopalanu Mosinge la ilaxa'i laixe so i'oxonu ilixo laixesi. Xo axone la ane'i latala ino'u su'uli laixe no anu.
9Ioxe, anene su'uli laixe. Ia mi loxo oto'oto vitanisi no anu vaikala xe nana vuluvulusi xe so ipelesou anaxa'a no anu vaikala kitukitu so lo, la usu'ulinenenge axova? Mi axone nene'axu laixe uasi. 10Xe loxo itema ane uxililiou Mosinge vaikalaou mo uxalixu kalipala no anu pita, la ngalovonixu. Ngalovonixu alaxu vile, alaxu tamei xe loxo oponu pumuxusi, la ngaxiunu tumalingeou avile. 11Ngaxiunu tumalingeou xo itema axone ngalavu lexe susu noxou ne usakinui ane. Anu molu mumaxa'u oponu no anu ilixo noxou ne.
Vaikalaou Polu kaluxusou
12Ioxe, no voxo loxo apalusi'a Atemasi ilou Tikikusi ine'e noxine la xavineni so nane'e naxalisilo no tuala ne Nikopolisi. Nane'e xo eni opoleli lexe axolu ne no anu sivo lelemosou taunu. 13Xe Senasi anu itema so lavulavu no anu lo noxou xamani ilou Apolosi la nasu'uline'i laixe. Mo so loxo ilutu so imuamua'i la isoti no anu mi vile uasi. 14Xe napelototosi'a tamitemamenge so ilavu laixe no anu vote'i so su'uli. Laso loxo tamitema isoti no anu mi ma'ia xe isu'uline'i la uxalixu nene'axu laixe ane. 15Tamitema mukalusi noxi'a taxoxolu 'o, ivikala aso noxine. Mo kalumo navikala aso noxi'a tamitema ane isexelanexe ne, xo lopala noxixe noxi'a vilesisi. Mo ngaxamulinu iaiama noxou Mosinge ane usu'asinge ne. Anu anesi.
Currently Selected:
Taitusi 3: ATA
Highlight
Copy
Compare
Share
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
