Ipilu 1

Mosinge mupolonu vaikalaou noxou Olu

1Tatei loxo no voxovoxo xe no anu vote'i iouiou la Mosinge mupolonu vaikalaou noxi'a tapolopeti mo so muxali noxi'a ta'ilusunenge. 2Ia vaimomo 'o no anu kaluxusou voxovoxo 'o, la Mosinge mupolonu vaikalaou noxou Olusi mo so uxali noxinge nenge'a. Olu ne musosovosou so upilixinu mimi mukalusi noxou. Mo noxou, la Mosinge muxalixu lialia mukalusi. 3Xe anu a upala'anixu iaxu Mosinge xo lamanaxu molu noxousi. Mo anu iou vilesisi loxo Mosinge u'isalili. Xe no anu xavi no anu vaikalaou la utetelisou mimi mukalusi so uxolu ulovosi. Ioxe, anu muxalixu vote'i so ukalusou tina'u so susu mo uxalixa'a tamitema tamalemalenga. Mu'oxonu xe mukalu la anu a utalupexa no anu avolu tema Kingi Tatila ane uxolu teitexi.

Mosinge Olu anu u'uli'uli noxi'a ta'angelo

4Ioxe, uxolu no anu tanixu mutiatila laso anu upala'a lexe anu laixe avile noxi'a ta'angelo. Mo kalumo Momu mupilixinu uala vile noxou ane mutiatila avile no anu ualasi'a ta'angelo. 5Xo tatei la Mosinge muvikalanu lexe, “Nini na'alixeli, vaimomo 'o eni so amamine a.” Xe muvikalasou kalumo lexe, “Eni axolu amomu xe anu uxolu alixeli ane.” Ia axova, vaikala anene mulemolu so si'a ta'angelo? Uasi to! 6Mo no voxo loxo mupalusou Olu laposalaxu mulu'e no lialia la muvikala lexe, “Ngingi ta'angelou Mosinge mukalusi nga'itinu ualasou.”

7Xe noxi'a ta'angelo la muvikalasi'a lexe, “Anu u'oxone'i ta'angelou a sivosi xe u'oxone'i tamitema so xaixai noxou a navu kaxusi.” 8Ia no anu Mosinge vaikalaou la muvikalasou Olu aloxo 'o, “Mosinge, nini naxolu no anu tanixene so kingi ne ulai ulai kaluxu uasi. Mo napamuxane'i tamitemameni no anu vote'i mulapusi. 9Xo vote'i mulapusi ne oponeni ututuluou ia mi ane upolo va'axu la namatapianu. Laso Mosinge e Mosine munixi'u ueli so osa'ila noxine so usosovosine lexe nini na'uli'uli noxi'a tamenexine.”

10Xe no anu vaikalaou la muvikalasou aloxo 'ola, “Tatananexi. Tei tei manina nini ne'isalilinoxu mimi tavatava'u no lialia mukalusi. Xe mimi teitexi no anu loxotolo ne anu nene'axu xaixai noxinesi. 11Xe mimi mukalusi ne la umamulosi, ia nini la naxolu avilesi. Xo lialia ilou loxotolo ne umanaulu aloxo lavuluti teinu 'osi. 12Laso ili'i la naxexenu ilou a loxo itema ulokenu mo'e so upipinu. Mo nakolinu alavua aloxo itema usenisi no anu mimi alavua. Ia loxo nini la naxiuxiu uasi, naxoxolu axonesi. Xe tau iexene kaluxusou uasisi.”

13Mo aloxo 'ola. Tatei la Mosinge muvikalanu Olu lexe, “Nini natalupexa no anu avolo tema xo mo eni amaluxa'a tauluameni no laxene so namaloxo'a no anu tava'ine.” Anu ulemolu mi ne noxi'a ta'angelou? Uasi to! 14Xo ta'angelou ne ane'i ta'ulenu ane so i'oxonu xaixai noxousi. Anu upalupalusi'a ilailai so isu'uline'i ane'i ane so ixalisou pamauli.

Currently Selected:

Ipilu 1: ATA

Highlight

Copy

Compare