Tiemisi 3

Talaxa'inu levenenge laixe

1Ioxe tavivilo, mamu so ngaxavutalanu lexe anu mi papaxe vitanisi kaio ngingi latala ngaxali tatisa no anu Mosinge vaikalaou. Xo voxosou Tatananenge utilovosou xaixai na'a nenge la utilovo pakia'u manina noxinge tamitema so talulusou vaikalaou. 2No anu mi ma'ia ta'oxonu la nenge latala talavusou tapolo va'axu no anu ngioungiou mose'i. Ia loxo itema vile upolo va'axu sevile uasi no anu mi ma'ia ula no anaxu, la anu upalasi lexe xoluxoluxu ulomotelesi. Xo loxo ulavusou vote'i so u'apixu vaikalaou no anu susu, la vasimolu pa'upa'usou mukalusi ne anu umomomo so upamuxanusi ane. 3Anu loxo aini telexu se e tamitema isakinu no anu anaxa'a ta'osi so ipamuxane'i no anu. Xo loxo ipamuxanu aini telexu no anaxa'a ta'osi la upamuxanu vasime'a loloni ka imulinu masaxa noxi'a tamosi'asi. 4Mo ngaxavutalanu lasipi kalumo. Xo anu mi toxoxu mo sivo xavinu so utausou uiave no luaki. La vote'i axova so kepiteni upamuxanu lasipi tatila to ne? Anu upamuxanu so umulinu masaxa noxou a no anu sitia se kitua sesi. 5La anu axonesi no anu levenenge. Xo anu vasimenge pa'usou se isusu'asi, ia anu ulelei so utotopaxanu no anu mimi mutiatilasi.

Mo ngaxavutalanu vile kalumo, no anu sexetelu la talexexu se kituasi ia u'avuti la u'ou ula tatila. 6La levenenge aloxo navu nesi. Anu uxolu vilesisi no tainu vasimenge pa'upa'usou tapiena 'o, ia anu mosou e so uolexu ili'ilixo masumasua iouiou mole vasimenge loloni nuni'u no anusi. Anu loxo uno'u navu no anu navu so mamulo olele kaio u'unanu no anu xoluxolunenge sika navu u'ani'ani no anusi. 7Xo manina, noxi'a tamisoposi tavova xe tangiala xe tasineke xe tami no luaki iouiou mukalusi ne tamitema imomomo so ituvu'a mo ipamuxane'i. 8Ia itema vile umomomo so usikulunu levexu so umulinu masaxa noxou avile uasi. Xo ananenge muana'ana no anu lamalasini e uve'a tamitema isoisoli la levenenge ulelei vuluvulusi so tato'ome'a tamenexinge no anu.

9No anu ananenge la talemolu laixesou Tatananenge anu Maminge xe kalumo la talemolu masuasi'a tamitema e Mosinge mukoine'i loxo anu molu. 10No anu ananenge vilesisi ne vaikala laixe xe vaikala masua ulala. O tavivilo, ilixo axone laixe to uasi. 11Xo axova, no anu lexa luxu laixe la luaki ula no anu kalumo? 12Tavivilo, no anu anene uasi manina. Xo ovu viki uxalixu nene'axu olivi uasi, xe lamota uaini uxalixu nene'axu viki to uasi. La anu axonesi, luaki umomomo so uxalixu lexa laixe so taiexu uasi.

Itema ane uxalisou lavulavu mu'asi'asi la ilixou laixesi

13La axova, vile no taingengi utilovo laixe mo lavulavuou mu'asi'asi? Loxo itema axone la upala'anixu no anu vote'i e so ulu'enu ka umulinu lavulavu u'asi'asi so u'oxonu ilixo ane laixesi. 14Ia loxo opongengi sixula so ngaisungenge ngato'o mo ututuluou uala tatilasi la tava'u so nga'oxo lexe ngingi tamitema so lavulavu to uasi. Xo loxo 'o io nga'itingengi vitanisi mo ngaxililiou vaikala maninasi. 15Lavulavu ane xo ne anu lavulavu mu'asi'asi e ululu'e no tualasou Mosinge uasi. Anu mi so lialia xe anu mi so tava'u susu no vasimenge xe anu mi noxou Uluaoumo. 16Xo no anu apu loxo isu'isu uxolu xe tamitema opone'i ututuluou uala tatilasi la xoluxoluxa'a vuluvulusi mo mimi masumasua mukalusi uxalixali no taine'isi.

17Ia noxi'a ane'i ane ixalisou lavulavu mu'asi'asi e ululu'e no tualasou Mosinge, la mi ane tamaleisou tei a so xoluxoluxa'a malemalenga. Xe kalumo la tamalei lexe ilavusou ixolu se'isisi mo opone'i lexasi mo opone'i ukisi noxi'a tamitemasi. Xe ane'i tamitema ane xo ne xoluxoluxa'a uxalixu nene'axu laixe so i'alauna misevile mo i'oxonu iou vilesisi noxi'a tamitema mukalusi. Xe ikalavoi uasi, xo ilixo noxi'a iou vilesisi no anu vaikalai'asi. 18Ane'i tamitema so isolixu tu'umaxu ka ixalixu xoluxolu se'isisi no taine'i tamitema la loxo itapu'u ngiaxu. Xo loxo itapu'u xe uleme la uxalixu nene'axu e ilixo ulapusi.

Currently Selected:

Tiemisi 3: ATA

Highlight

Copy

Compare