Tiemisi 4
4
Masaxa no anu lialia uxililiou Mosinge
1Laso atali'isinge axo'. Tava'u axova so ngapelesou anangenge mo tu'utu'umaxu a uxolu no taingengi ne? Anu tava'u no anu masamasaxa e u'avuti mo uxalixu oto no vasimenge, ne? 2Ani, xo opongengi utatamasou mimi iouiou ia ngaxalisou uasi, laso maixene opongengi lexe ngave'axu tamitema. Xe ngaisuisuxu mimi se'i ia ngano'u to uasi, laso ngapelesou anangenge mole nga'oto avile. La tava'u so ngaxalisou mimi se'i uasi xo ngalingau noxou Mosinge uasi. 3Ia no voxo loxo ngalinga la ngaxalisou lakolisou uasi xo opongengi mukilikalu so ngelinga axone. Ngelingau mimi ane so umomomosou masamasaxa noxingemo. 4Ngingi ne ngalavusou ngaxexesou Mosinge aloxo sema ane ixexesou mulue so ixola'u taula'i no anu ili'ilixo nuni'u. La axova, ngalavu uasi? Loxo ngavaitami no anu ili'ilixo so lialia la ngaxililiou Mosinge ane. Laso itema ane umasaxau uxali menexu ili'ilixo so lialia la anu molu uxalixu so u'uluaou Mosinge. 5Xo lavukuou Mosinge uvikala aloxo 'o, “Mosinge oponu pakia'u manina lexe ulenenge vilevilesi ane mumulaxu nonano noxinge la ulolomu noxousi, uiaveiaveou mimi se'ila uasi.” Ia axova, nge'oxo lexe vaikala ne mi vitanisi?
6Ia Mosinge uiaiamasinge misevile. Laso maixene vaikalaou uvikala lexe, “Mosinge uxililiie'i tamitema ane i'itine'i. Ia noxi'a tamitema ane ilu'ene'i la uiaiama noxi'a.” 7Laso ngalu'engengi mo ngaxolu no laxu Mosingesi. La nga'apixu Uluaou mo so anu u'umesinge. 8Ngasuku alai noxou Mosinge xe anu usuku une'e alai noxinge ane. Ia ngingi tamitema so susu laso nga'uinu uxexesou avonge. Xe ngingi tamitema so vaikalamengi iou vilemo no anu ilixomengi, laso ngaxalixu opongengi malemalengasi. 9Anu laixe so opongengi tu'umaxu mo iengi lexaxu unixinixi no anu tamasi. Loxo ngingi a ngekeke mo nga'osa'osa vaimomo 'o la ngaxiunu opongengi mo so anu tu'umaxu mole ngaieleou avile. 10Ngalu'engengi no iou Tatananenge laso anu molu u'itingengi.
Pelototo lexe Mosinge ta'olu ito'ome'a ngato'o mamu
11Ioxe tavivilo, ngato'omenge no anu vaikala ngato'o mamu. Xo loxo itema uvikala masuaou vimou no anu lopala o loxo utilovosou so ukamulinu susu vile noxou, la vaikalaou uto'omolu losi ane. Xe loxo nini vile na'oxo axone mo vaikalameni uto'omolu lo la nini naxolu no laxu lo so namulinula uasi. Nini ne'itineni a loxo tiasi so natilovosou lexe anu laixe o masua. 12Ia anu Mosinge anusisi muxalixu lo xe anu anusisi a Tiasi xe anu anusisi umomomo so upamauline'i o umamulone'i tamitema. Laso nini namitema kaini axova so natilovosi'a tamenexine mo nakamulinu susu noxi'a to ne?
Mamu so tatonenge no anu mi ma'ia so ta'oxonu ili'i
13Ngalomu, eni vaikala vile so alemolu noxi'a tamitema e ilavusou ivikala aloxo 'o, “Masi o ne'iela la alai no taoni olele. Alai la axolu tau ie vile so alotoloto xe amaketi so axalisou lamoli tatila kena.” 14Ngingi ngavikala to axone ia ngalavusou lexe ngaxoxolu axova ne'iela uasisi. Ngingi loxo navu umuxu e tasaxisou se ka tasiaxusi. 15Laso no anu vote'i laixe la vaikalamengi masi aloxo 'o, “Loxo Tatananenge umasaxau, la taxolu tamauli mo ta'oxonu mi 'o xe mi olele.” 16Ia aloxo 'o la ngingi nga'itingengi mo ngatongenge no anu mimi lailaixe ane lexe nga'oxonu. Vaikala so ngatongenge vitanisi axone masua manina.
17Ioxe, mi 'o tangengiou laixe. Loxo nenge talavu mukalu no anu ilixo ane laixe so ta'oxonu io ta'oxonu uasi, la nenge tesusui ane.
Currently Selected:
Tiemisi 4: ATA
Highlight
Copy
Compare
Share
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
