Tiemisi 2

Pelototo lexe ilixomenge iou vilesisi noxi'a latala mukalusi

1Ioxe tavivilo, ngingi ngelopala noxou Tatananenge Iesua Kalaisiti e u'uli'uli no anu mimi lailaixe no tualasou Mosinge. Laso ilixo so ngataxane'i tamitema se'i xe ngalu'ene'i se'i la nga'oxonu mamu. 2Xo loxo itema vile ane uvilasi no anu lingi koli xe lavuluti lailaixe une'e no anu pita noxinge io itema vile oloxola ane mimiou muxasixasi une'e kalumo, la masi axova? 3Ngingi masi ngataxanu itema e muvilasi laixe mo ngavikala lexe, “O laixe musuku, natalupexa no anu sia laixe 'o,” io noxou oloxola la ngavikala lexe, “Natulu olelesi, o natalupexa no lialia to 'osi.” 4Loxo nga'oxo axone la ngingi menge ngekalingengi no anu xavutala noxinge lexe se'i talaixe noxi'a se'i. La ngexali loxo tatiasi ane masaxa masua uxolu no opone'i so itilovosi'a tamitema.

5Tavivilo, ngalomu. Mosinge musosovosi'a mose'i so ipalava no anu lopala xe muvavalima lexe ane'i ta'ei isexelaxu la ixalisou mimiou no voxo loxo u'uli laxune'i tamitemaou. La ane'i latala noxi'a ne a tamitema ane tatemanu lialia i'oxo lexe ta'oloxolasi, ne? 6Mo axova, ane'i ta'ei so ilosinge tu'umaxu mo ilavengengi nga'unalai no lakoti ka itulusinge no anu vaikala? Ane'i ta'oloxola ane ngalavusou ngapamailane'i? Uasi e, ane'i tamosou lamoli e ngataxane'i olelesi ane. 7Mo aloxo 'o. Mosinge mupilixinu ualasou Kalaisiti noxinge. La ta'ei so ipupuiou uala lailaixe ne? A ane'i tamitema so lamoli to nesi.

8Mo aloxo 'ola. No anu lavukuou Mosinge la mulemolu lavuloto ane mu'uli'uli aloxo 'o, “Ngingi ngasexelaxa'a tamenexinge aloxo ngingi menge ngasexelangenge ne.” Laso loxo ngingi ngamulinu la nge'oxo laixe ane. 9Ia loxo ngingi tamitema so ngataxane'i se'i xe ngalu'ene'i se'i, la no anu anene ngasusu mo lo upela'inge lexe ngingi tamitema so ngaxolaxola'u to. 10Xo loxo itema umomoxu lavuloto mukalusi no anu lo ia uxola'u soxu vilesisi la anu muxola'u mukalusi ane. 11Loxo telavu, Mosinge muvikala lexe, “Mamu so ngaxola'u taula'i no anu ilixo nuni'u.” Mo muvikala lexe, “Mamu so ngave'a tamitema isoisoli.” Ioxe, laso loxo itema uxola'u taula'i uasi ia uvau menexu usoli, la anu muxola'u lo mukalusi ane.

12Ia noxinge, la Mosinge utilovosinge no anu vaikalaou e upela'ingexu vote'i so ngamulinu masaxa noxou mo ngaxolu lalavulusi, laso ngalemolu vaikala mo nga'oxonu ilixo ane ulovou vaikala anenesi. 13Xo noxi'a tamitema ane ilavusou vote'i so iiaiama noxi'a tamenexi'a uasi, la Mosinge ukolinu ilixo noxi'a mo ulosi'a iaiama uasi. Ia noxinge ane ngalavusou vote'i so ngaiaiama la ngaxalisou iaiama kalumo, xo iaiama uua'ulixu lakolisou susu.

Lopala maninasou uxalixu ilixosou laixe

14Ioxe tavivilo, loxo itema vile u'oxo lexe anu ulopala ia loxo upala'anixu no anu ilixosou laixe uasi la anu mi ne temanu uasi ane. Axova, lopala kaini axone upamaulinu? Uasi to. 15Xo loxo tavivinge no anu lopala se'i si'a ala'ala uasi xe la'ilalixa'a uasi, 16xe loxo ngingi vile navikalane'i lexe, “Ngalai ngaxolu lalavulusi. Ngaai ialungengesi mo ngakalusou masaxa no anu la'ilalisi.” Loxo navikala axonesi io nasu'uli no anu mimi so vasime'a uasi la anu mi ne temanu uasi ane. 17Mo anu axone no anu lopala kalumo. Xo loxo ulili vitanisi xe uxalixu ilixosou laixe uasi, la anu upalasi lexe anu mauli no anu uasisi.

18Ia vile noxinge masi uvikala lexe, “Anu mi vile uasi, loxo eni la alopalasi xe nini la na'oxonu ilixo laixesi.” Laso eni akolinu vaikalaou aloxo 'o, “Nini na'oxo lexe nalopala ia loxo na'oxonu ilixosou laixe uasi la upala'a lexe maninasou axovae? Ia eni la alemolu lopala vitanisi uasi, apala'anixu no anu ilixosou laixesi a.” 19Xe masi u'oxo lexe ulopala lexe Mosinge vilesisi. O ne'oxo lexe anene mi laixe musuku ne? Uasi, anu mi vitanisi, xo ane'i ta'angelo tamasua kalumo ilavusou ilopala axone xe i'ume mo i'olo'olo to!

20Ia axova nini longulongu to ne, anu upalasi noxine uasi? Lopala kaini ane uxalixu ilixosou laixe uasi ne, anu mi temanu uasisi. 21Xo loxo telavu, anu mupalasi lexe ilusunenge Apala'amu anu itema mulapu no iou Mosinge xo no anu ilixo laixe mu'oxonu. Ilixo e so mumulaxu olu Aisaki no tanixu navu so lexe noxou Mosinge. 22La ngamalei, lopala noxou Apala'amu muveisa'inu ilixisou laixe e mu'oxonu laso lopala noxou mulomotele avile no anu ilixosou laixe ne. 23Xe no anu mi e mu'oxonu ne la muxalixu nene'axu vaikala e uxolu no lavukuou Mosinge lexe, “Anu Apala'amu mulopalanu Mosingesi xe Mosinge mumaisou lopala noxou axone laso mumoxo'u lexe anu mulapu no iou.” Mo mumoxo'u Apala'amu lexe anu menexu. 24Laso ngamalei, tava'u so Mosinge umoxo'u itema ulapu no iou a no anu lopala ane uxalixu ilixosou laixesi, tava'u no anu lopala ane uxolu vitanisi uasi.

25Xe anu axone noxie sema so vote'i e La'apu. Anu mupalasi lexe ane sema mulapu no iou Mosinge xo no anu ilixo laixe mi'oxonu. Ilixo e so misaxila'a tamitema so kilolo ane Iosua mupalusi'a ka mipamuxane'i milivu no anu vote'i vile so ixalisou ulua uasi. 26Laso ane, nenge telavu lexe itema vasimolu loxo ulenu uxolu no anu la uasi, la anu musoli ne. Mo anu axone kalumo no anu lopala, xo loxo lopala ane so uxalixu ilixosou laixe uasi, la mauli no anu uasisi.

Currently Selected:

Tiemisi 2: ATA

Highlight

Copy

Compare