Tiemisi 1

1Eni Tiemisi a, eni amitema so xaixai noxou Mosinge xe noxou Tatananenge Iesua Kalaisiti. Eni akaukavunu lapasi ano'o so ulai noxinge ngingi so laili 12 noxi'a Ta'isilaeli e ngepaxepaxele mo a ngatalupexa no anu xale tuatuala mose'i. Avikala aso noxinge.

Tu'utu'umaxu uxali so u'oxonu pakia'a talopala

2Ioxe tavivilo, no voxo loxo tu'utu'umaxu iouiou uxalisinge la ngasaxisou lexe anu mi so nga'osasousi. 3Xo ngelavu, loxo mimi axone uxali mo utovotovonu lopala noxinge la anu so u'oxonu opongengi pumuxu mo kalakalangenge uasi. 4Laso loxo ngatulu pumungenge avile axone la anu uxalixu nene'axu lailaixe aloxo 'o. Xoluxolungenge uxali ulomotele mo loloni avile, laso ngingi ngaxolu ngakamulinu mi vilela uasi.

Itema ane usoti no anu lavulavu mu'asi'asi la ulingau

5Ia loxo vile no taingengi usoti no anu lavulavu mu'asi'asi la ulingau noxou Mosinge. Xe loxo ulingau la anu ulosou ane, xo Mosinge u'osa so u'alaunasi'a tamitema mukalusi mo oponu tu'umaxuou linga noxi'a uasi. 6Ia loxo itema ulingau la no anu lopalasi, oponu tamei no anu uasi. Xo oponu tamei axone la anu uvaxa une'e loxo xasi ane sivo utaotaonu ka upaxelenusi. 7Laso anu itema ane xo ne umomomo so ukalavoi lexe uxalisou mi vile noxou Tatananenge uasisi. 8Xo anu ne, xavutalaou ulavusou uvalavala mo xoluxoluxu mamalaxu tosi.

Vaikala ulai noxi'a ta'oloxola xe tamitema so lamoli

9Xe loxo vivinge Mosinge olu vile u'oloxola no anu xoluxolu so vasimolu la anu laixe so u'osasi, xo loxo manina la anu tanixu e teitexi musuku. 10Ia itema e lamolamolixu la laixe so u'osasi loxo Mosinge ulu'enu. Xo ane'i tamitema so lamoli ne la tasiauxa'a vitanisi aloxo laxalasi sesenu se 'o. 11A loxo telavu, aso ialuxu uieisou laxalasi xo xe uxaloe, sila sesenu ununusi mole usaxi laixela uasi. La anu axonesi noxi'a tamitema so lamoli xo ixolu i'au'au no anu xaixai noxi'a iouiousio, sila tasiauxa'asi.

Mosinge u'oxonenge laixesi, utovonenge no anu susu uasi

12Laso anu laixe noxou itema ane utulu pumuxu no anu tu'umaxu loxo utovonu lopala noxou. Xo uxolu uua'uli no anu xo xe ukalu la Mosinge ulosou palaisisou. Palaisi ne anu mi so mauli kaluxu uasi ane muvavalimasou noxi'a ane'i ane isexelaxu.

13Ia loxo tovotovo no anu susu uxalisou itema vile la mamu so uvikala lexe, “E Mosinge utovoleli no anu susu”. Uasi manina, xo vote'i so susu utovonu Mosinge uasi xe Mosinge utovone'i tamitema no anu susu uasi. 14Tovotovo ne anu ulavusou uxalisinge vilevilesi loxo masaxa masua noxinge menge uuauoinenge kaio ulapunengesi. 15Anu loxo sema opone kaio ivo'onu ilie la uleme tatila. Xo masaxa masua loxo uxalisou tanixu no oponenge la u'avutinoxu susu xe loxo susu uleme tatila la uxalixu solisi.

16O tavivilo ane asexelangenge misevile, ngakalavoingengi to uasi. 17Mimi lailaixe mukalusi ane taxalisou ne molu no tualasou Mosingesi. Maminge e mosou mimi ane uka no loxotolo molu upilipilixinu nene'axu alauna mulomotele noxinge. La mimi no loxotolo loxo uiesou lialia la uxiuxunu xalexalexu, ia noxou Mosinge la ilixo noxou uxiuxiu axone uasisi. 18Anu molu mumasaxausi, laso no anu vote'i e so vaikala temanu anu manina la muxalixinge. Muxalixinge axone mo so nenge taxolu laili ane u'uli'uli no taine'i tamimi mukalusi e mukoine'i.

Talomusou vaikalaou vitanisi uasi, talomuxusi

19Ioxe ngingi tavivilo ane asexelangenge misevile, tangengiou vaikala ano'o laixe. Ngapalea no anu lolomusi, ia no anu vaivaikala xe la'ia la ngapalea no anu mamu. 20Xo la'ia noxi'a tamitema la uxalixu mi ane ulapu no iou Mosinge uasi. 21Laso ili'ilixo nuni'u iouiou xe ili'ilixo masumasua ane ulavusou ulolutusi la ngapilixinusi. Io ngalu'engengi so opongengi uloxu vaikalaou Mosinge e mutounu no opongengi xo anene so pamaulisinge ane.

22Mo vaikalaou ngeno'u ne la ngalomuxusi. Xo loxo ngalomusou vitanisi ia ngamulinu uasi la anene ngingi ngakalavoingengisi ane. 23Itema loxo ulomusou vaikalaou Mosinge vitanisi mo ulomuxu uasi, la anu loxo usaxisou iou no anu titilosi. 24Xo loxo usaxisou iou no anu titilo ka uxexe ulai, la anu alaxu vilesisi tanuvulusiou iou lexe musaxi axovae. 25Ia vaikalaou Mosinge ulomotele a uxolu so upela'ingexu vote'i so tamulinu masaxa noxou mo taxolu lalavulusi. Laso loxo itema umalei laixe no anu kaio ulomuxu mo tanuvulusiou vitanisi uasi, la Mosinge ulosou nene'axu laixe no anu mi ma'ia u'oxonu.

26Loxo itema u'oxo lexe anu ulavusou umulinu masaxa noxou Mosinge ia upamuxanu levexu uasi la anu molu ukakalavoinu. Anu uvikala lexe umulinu masaxa noxou Mosinge ia mi ne temanu uasisi. 27Vote'i ane malemalenga mo mulapu no iou Mosinge anu Maminge so tamulinu masaxa noxou aloxo 'o. Tavu'uline'i tamolomolo ane ta'oloxola xe tasema ane tamului'a misoisoli mo tasu'uline'i no anu tu'utu'umaxu noxi'a. Xe aloxo 'ola, taxolu va'axu no anu ili'ilixo masua so lialia 'o mo so anu utei uxolu noxinge uasi.

Currently Selected:

Tiemisi 1: ATA

Highlight

Copy

Compare