Ipilu 13

Nenge tasexelanenge ngato'o

1Ioxe, ngingi tavivingesi ane, laso ngaxolu ngasexelangenge ulai axonesi. 2Xe loxo taasila ixali la kalakalangenge uasi so ngavu'uline'i. Aitengasinge ukisi noxi'a xo se'i mivu'uline'i taasila la mikalavoi lexe tamitemamo, la uasi, ane'i ta'angelo ane. 3Xe tangengixa'a tavivinge ikalavusu a loxo ngingi menge ngaxolu ngakalavusu ne. Xe ane'i ane taxilili ilosi'a tu'umaxu la tangengixa'a a loxo ngingi ngatavulenu tu'umaxu no vasimenge kalumo.

4Xe no anu ngiou no anu taula'i la ngataxanu laixe mo ngailanu mi nuni'u no anu uasisi. Xo tamitema so ilixo nuni'u mo ane'i ane so ixola'u taula'i la Mosinge utilovosi'a mo ukoline'i.

5Nga'umengengi so ngaxolu lalavulusi no anu isuisu so lamoli. Mi ma'ia ngeno'u mukalu la opongengi u'osasou xo Mosinge molu muvikala lexe, “Eni axiunu tumaliloinge uasi mo apilixingengi so ngaxolu ta'oloxola uasi.” 6Laso nenge ta'ume xo ma'ia, tavikala aloxo 'o, “Tatananenge anu mosou su'ulisilo laso eni a'ume uasi. Xo tamitema i'oxonu mi ma'ia noxilo?”

Nenge tamaila so tamulinu Iesua uasi

7Mo aloxo 'o. Ngaxavutalane'i ane'i ane mi'uli laxungengi ne, ane'i milanu vaikalaou Mosinge noxinge. Xe ngaxavutalanu xoluxoluxa'a xo muxalixu nene'axu lailaixe. Laso ngaunexa'a no anu lopala noxi'a.

8Ilixo noxou Iesua Kalaisiti anu iou vilesisi tatei xe vaimomo 'o, la anu uxolu axonesi kaluxusou uasi. 9Laso loxo ngalomusou votovoto iouiou alavua la ngapilixingengi so ulapungengi mamu. Anu laixe so oponenge utuluou iaiamasi xo anusi u'oxonu pakia'inge. Xo ane'i se'i la i'au'au no anu vaivaikalasou la'ilali ia ixalisou su'uli no anu lavuloto axone uasi.

10Ioxe, noxinge 'o la tanixu lapesou susu noxinge a uxolu. Ia ane'i ane ixaxai no anu tasou Mosinge so lialia 'osio, la vote'i so ino'u temanu tanixu noxinge ne uasi. 11Xo loxo pilisiti tatila u'oxonu ilixo so usu'asou susu la u'unalaixu sialuxu misoposi no anu ngiou noxou Mosinge u'isalili. Ia loxo vasimolu misoposi ne la ilavusou i'elaxu noale no anu kemu noxi'a Ta'isilaeli. 12Xe noxou Iesua la mupilixinu vasimolu so sialuxu ula mo so uxalixa'a tamitema malemalenga. Mutavulenu navunavu axone, la noale no anu aitengaxu taoni kalumo. 13Laso ane, nenge masi loxo talai noale no anu kemu kalumo so tapita no anu maila e mutavulenu ne. 14Xo nenge taoni vile no lialia so uxolu avile uasi. Nenge oponenge u'oxoxu taoni ane taxalisou ili'i. 15Laso utotomu no anu ualasou Iesua la ta'itinu Mosinge ualasou. Xo loxo tavikala laixesou Mosinge no anu ananenge axone la tapilixinu mi vile noxou ane u'osasou. 16Mo kalakalangenge so nga'oxonu alauna uasi. Xe loxo tamitema isoti no anu mi vile la ngasu'uline'i. Laixe so nga'oxo axone xo ngingi a ngapilixinu mi vilela noxou Mosinge e u'osasou ane.

Talomuxa'a ane'i ane so isaxila'inge

17Ngalu'engengi noxi'a tatiatilamenge ne mo ngalomuxa'a xo ane'i so i'oxo latolosou xoluxolu so ulengengi. Mo xaixai noxi'a ne ia'aloxu noxou Mosinge ili'i so utilovosou. Laso ngalomuxa'a mo so i'osasou xaxai no taingengi ne. Ngalosi'a tu'umaxu no anu uasi xo loxo 'o io ngaxalisou su'uli laixe uasi.

18Xe loxo nexi 'o, ngapilixinexi noxou Mosinge. Xo nexi talavu lexe tanexi uai laixe no iou, ia oponexi ututulu lexe mimi mukalusi ta'oxonu, la no anu vote'i laixesi. 19Mo atama noxinge lexe xavingengi no anu linga so u'oxonu vote'i so eni apalea axali noxinge.

20Eni apilixingengi noxou Mosinge e mosou xoluxolu lalavulusi. Anu mutulusou Iesua anu Tatananenge no anu soli. Iesua ne anu mupilixinu sialuxu so ulotone'i tasipisipiou mo usosovosou konitalaki ane kaluxusou uasi. Mutulusou laso Iesua muxali Itema Tila so usaxila'a tasipisipiou ne. 21Apilixingengi noxou Mosinge xo anu a ulosinge mimi lailaixe so xoluxolu noxinge u'isalili no anu masaxa noxou. Xe mi ma'ia laixe no iou la anu upolonu noxou Iesua Kalaisiti so u'avutinoxu noxinge. Laso avikalangengi manina aloxo 'o, nenge ta'itinu ualasou Kalaisiti ulai ulai kaluxu uasi.

Vaikala kaluxusou

22Ioxe, atama noxinge lexe ngalomuxu pelototo no anu lapasi ekaukavunu 'o xo alapunu veveni malaxo uasi. 23Mo amasaxau so ngalavu lexe ane'i mipilixinu vivinge Timoti mula no anu lakalavusu. Loxo anu upalea uxali noxilo la noxou talai noxinge ne. 24Ngalemolu aso noxixe noxi'a tatiatila noxinge mo noxi'a tamitemaou Mosinge u'isalili mukalusi. Ane'i tamitema so Itali 'o ivikala aso noxinge kalumo. 25Iaiama noxou Mosinge a uxolu noxinge ne. Anu anesi.

Currently Selected:

Ipilu 13: ATA

Highlight

Copy

Compare