Xalesia 6
6
Mi ma'ia tatounu la tano'u nene'axu u'isalilisi
1Ioxe tavivilo, loxo ngalavu lexe susu vile muua'ulixu vile noxinge la ngingi ta'ei Ulenu upamuxangengi ne ngalai se'isisi noxou so ngalovinoxu. Ia ngalaxa'i laixe xo loxo 'o io tovotovo uxalisinge kalumo ane. 2Ngingi ngava'isungenge ngato'o no anu tu'utu'umaxu mo so no anu vote'i anene la ngamomoxu lo noxou Kalaisiti. 3Xo loxo itema vile uxavutalanu lexe anu mi lailaixe ia loxo manina anu mi vitanisi, la anu molu mukakalavoinu moe! 4Laso ngingi vilevilesi ngatilovosou xaixai noxingemo, mo so loxo ngamaisou nene'axu laixe la nga'osasousi. Anu laixe so ngatilovosou xaixai noxinge no anu ane noxi'a leviani uasi. 5Xo anu mi noxinge vilevilesi so tatavulenu tavalasou noxinge u'isalili.
6Mo aloxo 'o, itema e uxoxolu so uno'u lavulavu no anu Mosinge vaikalaou la uveluvelunu mimiou laixe noxou tisaou ne. 7Ngingi ngakalavoingengi uasi, vote'i so nga'oxonu loloxu Mosinge uasisi. Xo mi ma'ia so itema utounu la temanu u'isalili no anusi so uxalisou. 8Xo loxo itema ulomuxu masamasaxa no anu vasimolumo la anu loxo utotou no anu anensi. Laso uxolu xo xe uxalisou temanui la masua xo anu mi so mamulosi. Ia loxo itema ulomuxu Ulenu Laixe la anu loxo utotou no anu anenesi. Laso loxo uxalisou temanu noxou Ulenu ili'i la anu mi so mauli kaluxu uasi. 9Laso oponenge utotosa so ta'oxonu alauna uasi. Xo loxo kalakalanenge no anu ilixo laixe uasi la nenge taxalisou nene'axu laixe no anu voxosou u'isalili. 10Laso ane, loxo nenge vote'i la ta'oxonu laixe noxi'a latala mukalusi. Xe loxo tavivinge no anu lopala la xavinengeou avile so ta'oxonu noxi'a.
Mi ane so Polu mu'itinu a ovu valautusou Iesuasi
11Ngamaisou vaikala pa'usou ano'o ne kaukavusou toxotoxoxu 'o, eni melo akaukavunu a. 12La ngalomu, ane'i tamitema mose'i e ixolu no taingengi ne imasaxau ualasi'a utila no ie'i tamitema tosi. Ane'i isoungengi so ngaxalisou sosovo no anu vasimenge xo i'oxo lexe, “Iu, loxo tamitema ilomu lexe talopala no anu ovu valautusou Iesuasi, la masi ilosinge navunavusou.” 13Xo ane'i ane sosovo uxolu no anu vasime'a ne, ane'i me'a imomomoxu lo to uasi. Ia ane'i imasaxau lexe ngaxalisou sosovo ne so ualasi'a utila no anu mi e uxali no anu vasimenge tosi. 14Ia loxo noxilo la axamulinu lexe mamu so a'itinu ualasilo o mi vilela. Mi ane so a'itinu a ovu valautusou Tatananenge Iesua Kalaisitisi. Xo no anu soli noxou Kalaisiti la xavi no anu ili'ilixo so lialia musoli no anu vasimelo xe eni la esoli ekalipala no anu. 15La loxo sosovo uxolu no vasimenge la anu mi vitanisi. Xe loxo uxolu uasi la anu mi vitanisi kalumo. Ia ane so Mosinge ukoinenge taxali tami ta'alavua, la anenesi mi mutiatila. 16La noxi'a ane'i ane opone'i ututuluou vote'i nesi so imulinu, la ixalisou xoluxolu lalavulusi ilou iaiama xo ane'i so laili Isilaeli noxou Mosinge u'isalili ane.
17La eni amasaxau lexe tamitema ilosilo tu'umaxu no anu vaikala aloxo 'ola uasi. Xo tamitema mimasualeli mo lamalamakisou a uxolu no vasimelo so umaxa'u lexe eni amitema so xaixai noxou Kalaisiti manina.
18Tavivilo, amasaxau lexe ngaxamulinu iaiama noxou Tatananenge Iesua Kalaisiti no anu ulengengi. Vaikala ano'o maninasi. Anu anesi.
Currently Selected:
Xalesia 6: ATA
Highlight
Share
Compare
Copy
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
