Xalesia 5

Anu laixe so oponenge u'oxoxu xoluxolu lalavulusi noxou Kalaisiti

1Ioxe, Kalaisiti mu'umenenge no anu mi e mukalavusunenge tei mo so taxolu lalavulusi. Laso ngatulu pakia'inge mo nga'italongengi so tamitema iuauoingenge ka ngalivu no anu xoluxoluxa'a tasilevi mamu.

2Ai ngalomu, eni Polu avikalangengi aloxo 'o. Loxo ngapilixingengi so ngaxalisou sosovo no anu vasimenge la anu uxalixu xaixai noxou Kalaisiti lexe mi vitanisi. 3Noxinge tamulu ta'ei a so ngaxalisou sosovo no anu vasimenge la avikala aloxo 'ola. Nini ena'ei na'oxo axone la nini mene napilixineni no laxu lo so namomoxu lavuloto no anu mukalusii ane. 4Ngingi ta'ei nga'oxo lexe ngamulimulinu lo mo so Mosinge umoxo'inge lexe ngingi talapusi no iou, la ngexolu ngekalipala noxou Kalaisiti ne. Ngingi ngexexesou iaiama noxou Mosinge ane. 5Ia nexi 'o tano'u xavi noxou Ulenu Laixe so talopalanu Mosingesi. Laso nexi taxolu se'isisi so talopalanu taxomaiou voxo so xoluxolunexe malemalenga upalasi avile. 6Xo loxo itema uxolu noxou Kalaisiti xe sosovo uxolu no anu vasimolu o uxolu uasi, la anene mi vitanisi to. Ia mi ane mutiatila a so lopala noxou itema ne u'avutinoxu sexela no oponusi.

7Ai, tei la iavengenge ne xavinusi, ia ena'ei utanutanuxu vote'isinge so ngalomuxu vaikala manina uasio? 8Vaikala e uilisou sangalinge ne molu noxou Mosinge uasi, xo anu molu mu'avalingemo. 9Mo loxo ilemolu, “Anu isiti isusu'a se u'oxonu pileti loloni usoxo kena.” 10Ia xo nenge ngenge'a taxolu noxou Tatananenge laso eni alopalanu lexe opongengi ukalipala no anu pelototo noxilo uasi. Xe noxou anu ane uxovulaulaunixinge ne anu molu utavulenu lakolisou ilixo noxou ili'i ane. Anu ena'ei ne.

11Ioxe tavivilo, loxo anu manina lexe vaikala so tamitema ixotosou vasime'a ne alanusio, laso axova so imamasualeli aloxo 'o? Ane'i opone'i la'iaxuou votovoto so ovu valautu alalanu 'o, ia loxo eni avalaxu ilixo so sovovo ne la umomomo so ilosilo tu'umaxu aloxo 'o uasisi. 12Ia loxo noxi'a ane'i ane ixovulaulaunixinge no anu vaivaikala so sosovo no anu vasimenge ne, anu laixe so me'a ixotosou putu'a uxexe avile.

13Laso tavivilo, Mosinge molu mu'avalinge so nga'una no anu xoluxolu lalavulusi. Ia mamu so opongengi lexe, “Ai nenge taxolu lalavulusi no anu lo a, laso masaxa aneva no anu vasimenge 'o la tamulinusi.” Nga'oxo axone uasi, nga'oxo aloxo 'o. Ngaxolu no anu sexalasi so ngaxali tamitema so xaixai noxinge ngato'o. 14Xo no vaikala so lo mukalusi la uxalixu nene'axu loloni no anu vaikala ano'o, “Ngingi ngasexela'a tamenexinge aloxo ngingi menge ngasexelangenge ne.” 15Ia loxo ngingi nga'oxo loxo tamisoposi so ngangangasinge mo ngateateangengi ngato'o la ngalaxa'i laixe. Xo loxo 'o io ngingi ngamamulongengi avile ane.

Xoluxolu ane so noxou Ulenu xe ane so vasimenge

16Ioxe, vaikalaxeli so alemolu noxinge aloxo 'o. Ngingi ngapilixingengi noxou Ulenu Laixe so upamuxanu muamua'ingenge mo so ngamulinu masamasaxa no anu vasimenge uasi. 17Xo loxo telavu, masamasaxa no anu vasimenge uxililiou Ulenu. Xe Ulenu la uxililiou masamasaxa no anu vasimenge. Ane'i ilou ixililiie'i ngato'o axone laso mi ane ngamasaxau nga'oxonu la umomomo so nga'oxonu uasi. 18Xo loxo Ulenu upamuxangengi la ngingi ngaxolu no laxu lo so upamuxangengi uasi ane.

19La anu upalasi lexe masamasaxa no anu vasimenge uxalixu nene'axu aloxo 'o. Tamitema ipilipilixinu vasime'a vitanisi no anu ilixo nuni'u mo ukilikalu. 20Xe i'itinu momosi'a kalavoi mo i'oxonu ta'uluxu masua. Xe ixali tauluai'a ngato'o xo tu'utu'umaxu mo isuisu uxolu no taine'i ka la'ia noxi'a xalo u'elasi. Laso ipelepelesou anaxa'a xe kalikalipala uxali no taine'i mole ikalitotone'i avile. 21Xe opone'i sixulai'a ngato'o. Xe isipaki sika ixolaxola mole anaxa'a utautausi. Xe mimi se'i axone uxolusio. A loxo eveletalosinge mala'o mo a alemolu 'ola. No voxo so Mosinge molu u'uli laxune'i tamitemaou la tamitema so ili'ilixo axone ixolu nonano uasisi.

22Ia nene'axu xaixai noxou Ulenu no anu xoluxolunenge aloxo 'o. Ilixo so sexela mo osa mo xoluxolu lalavulusi. Xe anu upamuxanenge so tapalea no anu la'ia uasi mo ta'oxonu alauna ilou ilixo laixe noxi'a leviani. Xe ilopalanenge no anu xaixai ma'ia la ta'oxonu ulovosi. 23Xe oponenge lexasi mo xoluxolunenge vuluvulusi uasi, tapamuxanu u'isalilisi. Anu lo vile so u'apinenge no anu mi aloxo 'o uasisi. 24Xo ane'i tanoxou Kalaisiti, la mino'u vasime'a xe masamasaxa ilou mimi ane upalupalusi'a no anu ka mililinu no ovu valautu mole musoli mukalu.

25Anu mauli noxinge 'o a noxou Ulenu Laixesi, laso nenge tapilixinenge so anu molu upamaxunu muamua'inenge. 26La nenge ta'itinenge mo takusukusu'inge mo taisuisunenge ngato'o mamu.

Currently Selected:

Xalesia 5: ATA

Highlight

Compare

Copy