Epesusi 1

1Eni Polu a. No anu masaxa noxou Mosinge la anu mutulusilo so lexe eni a aposeliou Kalaisiti Iesua. Eni akaukavunu lapasi ano'o ulai noxinge tamitemaou Mosinge u'isalili ne Epesusi. Ngingi ne ngaxolu noxou Kalaisiti Iesua mo lopala noxinge ututulu noxousi. 2Eni emasaxau lexe Mosinge anu Maminge ilou Tatananenge Iesua Kalaisiti iiaiama noxinge so ilosinge xoluxolu lalavulusi.

Mosinge ulosinge xoluxolu laixe xo taxolu noxou Kalaisiti

3Ioxe, nenge ta'itinu ualasou Mosinge e anu Momu Tatananenge Iesua Kalaisiti. Xo mi ma'ia so xoluxoluxu ulenenge no tualasou la anu mulosinge mukalu. Anu mulosinge axone xo taxolu noxou Kalaisiti. 4Xo no voxo loxo Mosinge ukoinu mimi no lialia uao, la anu musosovosinge noxou Kalaisiti mukalu. Musosovosinge lexe nenge taxolu tamalemalenga mo talapusi no iou. 5Xo aloxo 'o. Anu tanunenge mo no anu masaxa noxou la anu musosovosinge lumamo lexe nenge taxali ta'olu. Taxali ta'olu xo tava'u no anu xaixai noxou Iesua Kalaisitisi. 6Laso nenge ta'itinu iaiama noxou. Xo nenge taxolu noxou Olu ane usexelaxu, laso iaiamasinge misevile.

7Iaiama noxou Mosinge ne mulolutu e mulolutu manina, laso maixene muiasou susu noxinge. Muiasou xo taxolu noxou Kalaisiti mo sialuxu mulotonu tina'unenge so susu. 8Mosinge muxotataonenge no anu iaiama noxou. Anu lavulavuou mo xavutalaou misevile. 9Xo aloxo 'o. Tatei la anu umasaxa so u'oxonenge laixe. Mumasaxa axone laso anu mupalusou Kalaisiti mune'e noxinge. Anu mune'e laso masaxa laixe noxou singe ne a mupala'a ne. 10Ia nene'axu mi ne uxali loloni uao. Xo anu umasaxau lexe voxosou u'isalili uxalii, laso mimi mukalusi upita la kisou vilesisi noxou Kalaisiti. Anu molu u'uli laxunu mimi ane uxolu teitexi xe no lialia mukalusi.

11Ai manina ane, Mosinge ulavusou u'oxonu mimi mukalusi no anu masaxa noxousi. Xo no anu masaxa noxou la anu musosovosinge lumamo noxou Kalaisiti lexe nenge taxali tamitemaou mu'isalili. 12La musosovosixe so nexi ane tei so telopala noxou Kalaisiti mo so ualasou utilasi. 13Xe mukalu la ngingi kalumo ngelomusou vaikala manina e vaikala laixe so pamauli noxou Mosinge. Ngelomusou la ngelopala noxou Kalaisiti laso anu mumulinu vavalima noxou so ulosinge Ulenu Laixe. Ulenu ne anu sosovo noxinge lexe ngingi ngaxolu noxou Kalaisiti. 14Nenge'a tamitemaou la mulosinge Ulenu Laixe so sosovo lexe ili'i la taxalisou mimi lailaixe ane muvavalimasou. Laso nenge oponenge ututulu mo ta'itinu ualasousi xo manina, mi ne uxali ane.

Linga noxou Polu si'a Ta'epesusi

15Ioxe, eni elomusou a'alosou lopala noxinge noxou Tatananenge Iesuasi. Mo elomu lexe ngingi tamitemaou Mosinge mu'isalili ngasexelangenge ngato'o. 16Laso utotomu eni avikala laixe noxou Mosinge so vaikalasinge ne elomusou. Xe loxo avikala noxou Mosinge la alavusou alingau su'ulisinge. 17Alinga noxou Mosinge anu Mosinge nenge'a Tatananenge Iesua Kalaisiti. Anu Maminge e mosou iaxu. Amasaxau lexe Ulenu ulosinge lavulavu mo upela'inge so ngalavu laixe noxou Mosinge. 18Mo eni alinga noxou lexe anu ulamananixu opongengi. Xo anu laixe so ngalavu lexe anu mu'avalingexu ma'ia, mo so ngalopalanu ngaxomaiou. Xe anu laixe so ngalavu lexe mimi lailaixe ma'ia anu musosovosou lexe noxinge tamitemaou mu'isalili. 19Xe laixe so ngalavu no anu xavi tatila Mosinge usu'ulinenge no anu. Anu su'uli ne a une'e noxinge ane talopalanu. Xavi noxou usu'ulinenge no anu ne u'oki musuku. Xo aloxo 'o. 20No anu xavi nesi la mutulusou Kalaisiti no anu soli. Mutulusou la mulaixu mutalupexasou no avolu tema no tualasou laixe. 21Laso Kalaisiti a uxoxolu u'uli'uli noxi'a ta'angelo xe tami so xavi iouiou xe tamitema tatiatila xe ane'i ane ualaualasi'a tatila. Ia mi ne so vaimomo 'osi uasi, Kalaisiti u'uli'uli avile ili'i kalumo. 22Mo Mosinge mumulaxu mimi mukalusi uai no laxu Kalaisiti so umaloxo'u. Mumaxa'u axone lexe anu kisou mimi mukalusi. Xe no anu pita noxou la anu anusisi kisou kalumo. 23Xo pita ne anu vasimolu Kalaisiti. Anu laixe xo anu uxolu upita noxou kisou axone la anu loloni, pa'usou vilela uasi. Xo ena'ei uxolu noxou la xoluxolu noxou ulomotelesi.

Currently Selected:

Epesusi 1: ATA

Highlight

Compare

Copy