Epesusi 5

Nenge tamuamua'i no anu lamanasi

1Ioxe, Mosinge usexelanenge ta'olu misevile, laso ngamulimulinu ilixo noxou mo so ngaxali loxo anu. 2Mo ngasexelangenge ngato'o a loxo Kalaisiti musexelanenge. Xo anu molu mupilixinu mauli noxou so singe. Mupilixinu mauli noxou mo musoli axone la Mosinge mu'osasou. Mu'osasou a loxo mi u'ela mo tuma'u lailaixe uxali noxou.

3Laso aloxo 'o. Mamu so ngaisungenge mo ngalailai noxinge ngato'o vitanisi so nga'oxonu ili'ilixo nuni'u. La ngingi tamitemaou Mosinge u'isalili, mamu so vaikalasou mimi axone uxolu no taingengi. 4Vaikala loxo nuni'u o ukilikalu o so ngamolo sukusou mi vile masua ne ngapilixinusi. Ngapilixinu mo utotomu ngaxavutalanu mimi ane Mosinge mu'oxonu noxinge mo ngavikala laixe noxou. 5Xo ili'i no voxo loxo Mosinge molu u'uli laxune'i tamitemaou la nenge taxalisou mimi lailaixe. Ia ngalavu manina lexe itema ane uisuisu mo ulailai vitanisi mo u'oxonu ilixo nuni'u, la uxolu so uxalisou mimi lailaixe ne uasi. Xo itema so isuisu axone la anu u'itinu ili'iloxo noxou lexe mosou a. Anu iou vilesisi loxo itema ane u'itinu ualasou mosou kalavoi.

6Laso ngalaxa'i laixe xo masi tamitema se'i ivikala aloxo 'o, “Ai nenge tamulinu masaxa noxingesi xo Mosinge la'iaxuinge uasi.” Vaikala axone kalavoisi, xo la'ia noxou Mosinge utuvu noxi'a tamitema ane ilomuanu vaikalaou. 7Laso ngavaitami noxi'a tamitema kaini axone uasi. 8Xo tei la ngingi tamitema so isivoxo ia vaimomo 'o ngaxolu noxou Tatananenge. Ngingi ta'olu, laso ngamuamua'i no anu lamanaxu. 9Ngamuamua'i no anu lamanaxu so ngaxalixu nene'axu aloxo 'o. Xoluxolu noxinge laixe mo malemalenga mo maninasi. 10Mo ngatovonu so ngaxalisou lavulavu no anu ilixo ma'ia Tatananenge u'osasousi. 11Nga'una noxi'a tamitema no anu ili'ilixo so isivoxo uasi, xo nene'axu vile laixe no anu uasi. Nga'oxo aloxo 'o. Ngapela'a tamitema ne lexe ilixo noxi'a sususi. 12Ia ili'ilixo noxi'a ane itatalumeu ne ngalemolemolu u'isalili uasi, xo anu mi so maila. 13Ia loxo lamanaxu Tatananenge utalosou ili'ilixo noxi'a la anu upala'asi mo ilavu lexe anu susu. Ilavu axone laso anu ane, lamanaxu ulapune'i. 14Lamanaxu Tatananenge ulapune'i laso maixene no anu Mosinge vaikalaou u'oxonu latilovo lexe, “Nini namitema ane neai nesoli, ne natulu. Natulu mo namauli, xo Kalaisiti lamanaxu utalosine.”

15Ioxe, laso ngalaxa'inu xoluxolungenge laixe. Ngaxolu loxo tamitema ane ixovulaulau uasi. Ngaxolu loxo tamitema ane lavulavui'a. 16Vaimomo 'o ilixo masumasua u'oki musuku mo voxosinge masi ataxusi. Laso ngapapunu voxo so xoluxolu noxinge uasi, opongengi utuluou ilixo laixesi. 17Mamu so nga'oxonu ili'ilixo vuluvulusi. Ngalavu laixe no anu masaxa noxou Tatananenge so singe. 18Mo mamu so ngaiexu lexa pakia'u mo so ngasipaki xo axone la uvila'isinge ane. Nga'italongengi so Ulenusi uana'ana noxinge mo upamuxangengisi. 19Laso loxo ngaxolu ngapita la ngalexenu lexe no anu Lavuku so Lexelexe mo lexe ane so u'itinu Mosinge ualasou mo lexe so ngamamatolangengi ngato'o no anu. Ngalexe axone so ngapala'anixu osa no opongengi noxou Tatananenge. 20Mo utotomu ngavikala laixe so mimi mukalusi ulai noxou Mosinge anu Maminge. Ngavikala no anu ualasou Tatananenge Iesua Kalaisiti.

Pelototosi'a tataula'i

21Ioxe, ngingi ngataxanu Kalaisiti laso ngalu'engeni mo ngalomungenge ngato'o. 22Xe ngingi tasema la ngalu'engengi mo ngalomuxa'a tamulumengi a loxo ngalomuxu Tatananenge ne. 23Xo tamulu ne ane'i i'uli laxungengi tasemai'a a loxo Kalaisiti u'uli laxunu pita noxou. U'uli laxunu xo anu molu mupamaulinu. Laso anu uxolu kisou mo pita ne anu vasimolu. 24La loxo Kalaisiti u'uli laxunu pita noxou la axone kalumo tamulu i'uli laxune'i tasemai'a no anu mimi mukalusi.

25La ngiou vile aloxo 'o. Ngingi tamulu, la ngasexelaxa'a tasemamengi aloxo Kalaisiti musexelaxu pita noxou. Musexelaxu la mu'italonu maulixu so pita noxou ne. 26Mo anu mukalipalanu lexe noxou mu'isalili. Mukalipalanu, ia tei la anu mu'uinenge nenge tatemanu no anu vaikalaou. 27Mu'uinenge no anu vaikalaou axone xo mulalaxinu iou pita ne lexe iaxusi. Umasaxau lexe nuni'u o susu vile no anu so evile uvikalasou masua uasisi. Mumasaxau lexe pita noxou ne malemalengasi. 28Laso anu ane, a loxo Kalaisiti musexelaxu pita noxou la nini namulu nasexelaxe semameni kalumo. Nasaxila'e so xoluxoluxe laixe a loxo nini mene nasaxila'ine. Ngilou ne vilesisi ane, laso loxo nasexelaxe la anu iou vilesisi loxo nasexelaxenesi. 29Xo manina, tamitema ilavusou imatapianu vasime'a? E uasi, ane'i ivu'ulinu mo iutululunu ane. I'oxo laixe no anu vasime'a a loxo Kalaisiti u'oxo no anu pita noxou. 30Anu uvu'ulinenge mo uutululunenge laixe xo nenge vasimolu pa'upa'usou. 31Xe no anu taula'i ne la anu Mosinge vaikalaou ulemolu lexe, “Laso anene taula'i tava'u axone. So loxo itema u'umesi'a nenu ilou momu xe oli'e sema ipita, la ane'i ilou ixali loxo vasime'a vilesisi.” 32Ai, latilovo ano'o ne u'asi'asi musuku xo etokalasou Kalaisiti ilou pita noxou. 33Laso telexu no anu vaikalaxeli aloxo 'o. Ngingi vilevilesi ne ngasexelaxa'a tasemamengi a loxo ngasexelangenge ne. Xe ngingi tasema la ngataxane'i tamulumengi.

Currently Selected:

Epesusi 5: ATA

Highlight

Compare

Copy