Epesusi 6

Pelototosi'a tamolomolo oli'a tamami'a taneni'a

1Ioxe, ngingi tamolomolo kalumo, ngingi ngalomuxa'a tamaminge taneninge xo anene masaxa noxou Tatananenge. Anene ilixo laixe so nga'oxonu. 2Xo lo noxou Mosinge se'i upita no anu vavalima mo anu ane tei aloxo 'o, “Ngataxane'i tamaminge taneninge.” 3Mo vavalimasou lo ne aloxo 'o, “Loxo nga'oxo axone la xoluxolungenge laixesi mo mauli noxinge maxuveni no lialia.”

4Xe ngingi tamami'a, la mamu so nga'avutinoxu la'ia no opone'i ta'ilinge. Nga'oxo aloxo 'o. Ngasaxila'a laixe mo ngapelototosi'a no anu vaikalaou Tatananenge. Loxo ilomungenge uasi la ngalovonixu ilixo noxi'a mo ngapamupamuxane'i.

Pelototosi'a tamitema so xaixai oli'a tatatilasi'a

5Ioxe, nini ena'ei na'oxonu xaixai noxou tilasine la nalomuxu laixe. Nalu'eneni mo namama'u noxou so loxo upalusine no anu xaixai aneva, la na'oxonu no anu oponeni manina. Na'oxonu no anu oponeni manina a loxo na'oxonu xaixai noxou Kalaisiti ne. 6Nakalavoi so naxaxai laixe no voxo loxo tilasine uxolusi uasi. Xo axone la naxaxai no iou so u'osasinesi ane. Na'oxo axone uasi, naxavutalaneni lexe nini namitema so xaixai noxou Kalaisiti. Mo so axone la oponeni uleilaxu masaxa noxou Mosinge so na'oxonu. 7Mo xaixai ma'ia so na'oxonu la oponeni u'osasousi. Xo na'oxonu xaixai noxou itema nesi uasi, na'oxonu xaixai noxou Tatananenge ane. 8Mo ngalavu lexe mi ma'ia laixe nenge ta'oxonu la Tatananenge molu ulosinge lakolisou. Anu u'oxo axone noxi'a ane'i ane i'oxonu xaixai noxou itema vile xe ane'i ane me'a ixaxai noxi'asi.

9Ioxe, ngiou vile aloxo 'o. Ngingi tatilasi'a tamitema so xaixai 'o, pelototo e elemolu ne singe kalumo. Ngingi opongengi lexa noxi'asi mo ngamolo umexa'a mamu. Xo ngalavu lexe ngingi xe ane'i la Tatanangengi a vilesisi, e uxolu no tualasou Mosinge. Mo anu utongonenge tamitema mukalusi no anu vote'i vilesisi.

Latilovosi'a Mosinge ta'olu lexe ilalaxi so i'oto loxo ta'ami

10Ioxe, eni vaikalaxeli kaluxusou aloxo 'o. Ngingi ngaxolu noxou Tatananenge laso ngatulu pakia'inge, mo xavi so xoluxolu noxinge ngano'u noxou. 11Atilovo no anu anene aloxo 'o. Ta'ami ilavusou ivaxanu mimi so uutululune'i no anu oto. Xe axone kalumo ngingi ngavaxanu mimi so oto ane Mosinge mulosinge. Mo so no anu kalavoi o lolo noxou Uluaou la uua'ulingenge uasi, ngatulu pakia'ingesi. 12Xo oto ano'o no anu vasimenge so taoto noxi'a tamitema uasi. Nenge taoto noxi'a tatiatila noxi'a ta'angelo tamasua mo ane'i ane xavine'i musuku. Ane'i tami masua ne ixolu teitexi mo ipamuxane'i tamitema no anu xoluxolu so isi'isivoxo vaimomo 'o. 13Oto ne axone. Laso ngatelonu mimi so oto mukalusi e Mosinge mulosinge. Mo so axone no voxo loxo tu'utu'umaxu uxalisinge la ngingi xavingengi so ngaxililiou. Ngaxililiou xo xe ukalui ne, la ngingi ngatulu pakia'ingesio.

14Mo asolonu aloxo 'o. Vote'i so ngatulu pumungenge aloxo 'o. Ta'ami isakinu laleti tatila so utanuxu talaxa'a, ia ngingi la ngasakinu vaikala manina no opongengi. Mo ane'i itelonu lasioti aini so lutune'i, ia ngingi la ngavaxanu ilixo malemalenga so u'utulungengi. 15Mo ane'i ta'ami ilavusou itanu lasu so isoa laixe no anu oto. Xe ngingi la ngatulu pakia'inge no anu vaikala laixe so Tatananenge xo anene vote'i so tamitema opone'i uai se'isi. 16Mo aloxo 'o kalumo. No anu oto la tauluai'a ta'ami ilavusou ileanu lalumiso ane navu u'ani no anu. Ane'i olele ileanu, ia ta'ami itetelisou xaliau so itanuxa'a no anu. Ioxe, loxo ngingi la Uluaou utovonu so uto'omenge no anu mimi ialuialuxu kalumo. Laso ngingi masi ngatetelisou lopala noxinge pakia'u loxo xaliau, mo so lalumiso noxou ulapau vitanisi mo usita. 17Mo ta'ami ilavusou imulaxu ati aini so utalumeu kisi'a. Xe ngingi, la xavutala so pamauli e Mosinge mu'oxonu noxinge uxolu pakia'u no alaiengi so uutulungengi. Xe Ulenu Laixe ulosinge mo usu'ulingengi no anu vaikalaou Mosinge. Anu iou vilesisi loxo laviso so oto noxi'a ta'ami. 18Xe mimi mukalusi e elemolu 'o ne ngapitanu no anu vaikalamengi ane ngalemolu noxou Mosinge. Ulenu usu'ulingengi so ngavikala mo ngalingau su'ulisinge noxou. Mo ngalaxa'i laixe, ngatalo uasi. Utotomu ngalingau su'uli noxou Mosinge si'a tamitemaou mu'isalili. 19Mo ngapilixileli noxou Mosinge kalumo so loxo alulusou vaikala laixe so Tatananenge e mutalume tatei, la upalasisi. Mo kalumo loxo alanu la a'ume uasi. 20Xo Mosinge musosovosilo no anu xaixai so alanu vaikalaou. Elanu, laso tamitema misakileli no anu seni mo axolu akalavusu 'o. Ia mamu so a'ume, laso ngalingau mamatolasilo so alanu aloxo Mosinge umasaxau.

Vaikala kaluxusou

21Ioxe, eni emasaxau lexe ngalavusou xoluxolu noxilo 'o. Laso vivinge Tikikusi a ulai noxinge so ua'aloxo. Anu itema so kalakalaxuou xaixai noxou Tatananenge uasi. 22Laso maixene apalusou ulai noxinge so ngalavusou xoluxolu noxixe 'o. Mo so axone la umamatolanu opongengi.

23Tavivilo, eni avikala noxi'a Mosinge anu Maminge ilou Tatananenge Iesua Kalaisiti so i'oxonu opongengi uai se'isisi. Mo so pakia'inge no anu lopala noxinge mo ngasexelangenge ngato'o. 24Ngingi ne ngasexelaxu Tatananenge Iesua Kalaisiti mo sexala noxinge umomomo so tasiaxu vitanisi uasi. Laso maixene ngaxamulinu iaiama noxou Mosingesi. Anu anesi.

Currently Selected:

Epesusi 6: ATA

Highlight

Compare

Copy