Epesusi 3
3
Xaixai noxou Polu so ulanu vaikala laixe noxi'a tamitema noale'ale
1Ioxe, mo eni 'o exixao no tuatuala so e'oxonu xaixai noxou Kalaisiti Iesua so evotongengi ngingi tamitema noale'ale. Evotongengi axone xe Taiuta la'iaxa'ailo laso maixene akalavususou 'o. 2Masi ngelavu mukalu lexe Mosinge musosovosilo no anu xaixai vile. Xaixai anene so apala'anixu iaiama noxou noxinge mo so ngaxalisou iaiama ne kalumo. 3Mi ne Mosinge mulalaxinu oponu tatei lexe u'oxonu. Mulalaxinu ia mutalumeusi. Ia vaimomo 'o anu molu mupala'anixu noxilo a loxo ea'aloxu sevile mukalu 'oe. 4Laso loxo nga'itisou vaikala ano'o la ngalavu lexe vaikala so xaixai noxou Kalaisiti e mutalume ne, a mupela'iloxu 'o. 5Xo tatei la Mosinge upala'anixu mi ne noxi'a tatiatilasinge uasi. Ia vaimomo 'o Ulenu Laixe mupala'anixu lamana noxixe ta'aposeli xe tamitema so pela'a ane musosovosixe mu'isalili. 6Mi e mutalume tatei ne aloxo 'o. Ngingi tamitema noale'ale ne, ngelomusou vaikala laixe so Kalaisiti Iesua laso ngingi kalumo ngexalisou nene'axu vavalimasou. Mo axone la ngingi kalumo ngexali loxo pa'usou vasimolu. Mo ili'i la ngingi kalumo ngaxalisou mimi lailaixe e muvavalimasou lexe noxinge ta'olu.
7Anu ane. Mosinge muiaiama noxilo mo mulosilo xavi so aveluvelunu vaikala so mi anenesi. 8Ai, eni amitema vitanisi no taine'i tamitemaou Mosinge u'isalili a. Ia anu muiaiama noxilo so musosovosilo so avotone'i tamitema noale'ale. Avotone'i no anu vaiakala laixe e mu'asi'asi so Kalaisiti. 9Xo tatei Mosinge e mukoinu mimi mukalusi ne, mulalaxinu oponu so lexe u'oxonu mi vile ili'io. Mulalaxinu oponu axone ia mutalumeusi. Mutalumeu ia vaimomo 'o mulosilo xaixai so apala'anixu mi ne avile. 10Xe pita noxou Tatananenge muxali laso no anu vote'i anene la anu lavulavu noxou Mosinge upala'a avile. Mo so tatiatila noxi'a ta'angelo xe tami so xavi laixe no tualasou Mosinge ikuluke mo ivikala lexe, “Ai ngamaisou, lavulavu noxou Mosinge misevile.” 11Tatei anu mulalaxinu oponu lexe u'oxo axone la utalo uasi. A muxalixu nene'axu noxou Kalaisiti Iesua anu Tatananenge. 12Mo so nenge ane telopala noxou la ta'ume o tamama'u uasi, vote'i mukisisi so tavikala noxou Mosinge. 13Laso apelototosinge aloxo 'o. Loxo elemolu, esu'ulingengi la atavulenu tu'umaxusou 'o. Ia opongengi mamalaxu uasi, xo no anu su'uli e'oxonu noxinge la ngaxalisou nene'axu lailaixe.
Polu uvikalasou sexela noxou Kalaisiti
14Ioxe, eni axavutala no anu mimi ane Mosinge anu Maminge mu'oxonu axone la eni alavusou amama'u mo atangatuluou so alinga noxou. 15Mosinge anu Maminge xo anu tava'u laili mukalusi ane no tualasou xe no lialia 'o. 16Noxou ne, mimi iaxu so ulenenge mulolutu e mulolutusi. Laso eni alinga noxou so Ulenu u'isalilinoxu mimi ne no opongengi mo so ngano'u xavi so xoluxolu noxinge. 17Mo alinga noxou Mosinge lexe lopala noxinge pumuxu so Kalaisiti uxolu noxinge loxo no tasou u'isalili. Xe asolonu latilovo ne aloxo 'o. Tava'u tani ne, utulu no anu sexelasi. 18Xe no anu sexela ne, la alinga lexe Mosinge upalapalasinoxu noxinge tamitemaou Mosinge mu'isalili mukalusi. Mo so ngalavu sevile no anu tatila no anu xe veveni no anu xe teitexi no anu xe laxu no anu. 19Amasaxau lexe ngano'u lavulavu no anu sexela noxou Kalaisiti axone ia umomomo so ngaxali no anu teletelexu avile uasi. Xo mimi noxou Mosinge ne mulolutu e mulolutu laso anu ulosinge so ngaxolu no latanusi.
20Ai manina misevile, xaixai noxou no anu xoluxolu noxinge ne xavinusi. Xo nenge tamasaxau mo talingau mimi ane talavusousi. Ia mi ane loxo u'itimenge la takuluke no anu xo uua'ulixu masaxa noxinge avile. 21Avikala manina aloxo 'o. Laixe so nenge tatemanu pita noxou Kalaisiti Iesua ta'itinu ualasou Mosinge voxovoxo utotomu ulai utalo uasi.
Currently Selected:
Epesusi 3: ATA
Highlight
Share
Compare
Copy
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
