Epesusi 2

Mosinge mupitanenge noxou Kalaisiti so nenge'a taxolu avile

1Ioxe, tatei la ngexolu nge'oxonu sususi mo ngepolo va'axu no anu masaxa noxou Mosinge. Laso ngexolu loxo ngesoli mukalu. 2Mo no voxo anene la opongengi mututuluou ili'ilixo masumasua so lialia 'osi. La ngemulinu masaxa noxou tatila noxi'a tami so xavi masua ane ixixao teitexi no latanu lialia. Tatila noxi'a ne, anu angelo masua ane uxaxai no opone'i tamitema so xilili. 3Tei la nenge mukalusi te'oxonu axone. Mo temulinu masamasaxa no anu susu tava'u no vasimenge. Xe mi ma'ia masua texavutalanu la te'oxonusi. Xoluxolu noxinge axonesi, laso maixene nenge tamitema mukalusi texolu no laxu la'ia noxou Mosinge.

4Ioxe, xoluxolu noxinge axone, ia iaiama noxou Mosinge mulolutu e mulolutu. Xo anu musexelanengesi mo sexela noxou singe mupala'a aloxo 'o. 5No voxo texolu no anu susu mo texolu loxo tesolisio la Mosinge mupitanenge noxou Kalaisiti so nenge'a tamauli. Mi ne no anu iaiama noxousi. 6Anu mupitanenge noxou la mutulusinge mo mutalupexasinge nenge'a Kalaisiti Iesua no tualasou lailaixe. 7Anu mu'oxo axone so no anu voxovoxo mo tautau ie ili'i la upalapalasinoxu iaiama noxou toxoxa'a to e mu'oxonu noxinge. Iaiama e mu'oxonu noxinge noxou Kalaisiti Iesuasi. 8Xo ngingi ngelopala noxou laso Mosinge muiaiama noxinge so mupamaulingengi. Mi ne ngingi menge ngaxalixu uasi. Mosinge molu mu'itimengi. 9Anene lakolisou xaixai vile nge'oxonu uasi. Laso tava'u so itema vile u'itinu no anu uasi. 10Xo xoluxolu noxinge 'o ne Mosinge molu muxalixu noxou Kalaisiti Iesua. Muxalixu so tamuamua'i no anu ili'ilixo laixe e mulalaxinu tatei so lexe tamulinu.

Kalaisiti mupitane'i tamitema noale'ale oli'a Taiuta mixali laili vilesisi.

11Ioxe, ngingi ngelavu lexe ane'i laili Taiuta ilavusou i'oxonu sosovo no anu vasime'a. Mixotosou vasime'a axone so isosovo lexe ane'i tamitemaou Mosinge. I'oxo axone la ilu'engengi laili noale'ale lexe, “Iie, ngingi tamitema ne sosovo noxou Mosinge uxolu noxinge to uasi.” 12Xo ngaxavutalanu xoluxolu noxinge tei ne. Tei la ngexolu va'axu noxou Kalaisiti. Mo ngexolu loxo Ta'isilaeli uasi, ngexolu laili vilemo xo vavalima e Mosinge mu'oxonu noxi'a la usu'asinge uasi. Ngingi ne mi vile laixe so ngalopalanu ngaxomaiou uasi xo ngexixao no lialia vitanisi, ngelavusou Mosinge uasi.

13Tei la ngexolu va'axu axone, ia vaimomo 'o sialuxu Kalaisiti Iesua muno'inge mupitangengi noxou Mosinge. 14Tei la xilili muxolu no taingengi ngingi laili noale'ale xe Taiuta. Xilili ne muxali loxo vimelu laso mukalipalangengi. Ia Kalaisiti mumamulonu vimelu ne xe mupitangengi ngoli'a so opongengi uai se'isisi. 15Xo aloxo 'o. Mi e muxalixu xilili ne a lo ane Mosinge mulosou Mosisi tatei. Xo lo ne muvikala lexe ane'i tamitema noale'ale tamitemaou Mosinge uasi, ane'i Taiutasi. Ia lo ne usu'asingela uasi xo soli noxou Iesua mukalusou avile. Soli noxou mukalusou laso laili tamei mupita noxou mo oponenge vilesisi mo uai se'isisi. 16Xo anu musoli no ovu valautu la anu loxo ngingi so laili noale'ale xe ane'i so laili Taiuta ngoli'a ngesoli ne kalumo. Anu loxo ngepita no anu vasimolu Kalaisiti laso Mosinge u'osasinge noxou. Xe no anu xilili tei ne, anu kalumo loxo musoli no ovu valautu. 17Mo no voxo loxo anu mune'e muxixao no lialia la anu muvotosou vote'i so xoluxolu lalavulusi. Muvotosou noxinge tamitema noale'ale xe noxi'a tamitema Taiuta e ala'alai 'osi. 18Vaimomo 'o nenge'a taxolu noxou Kalaisiti mo Ulenu a uxoxolu noxinge. Uxoxolu noxinge laso maixene nenge vote'isinge mukisisi so talai noxou Mosinge.

Nenge tamitemaou Mosinge ne tasou Mosingesi

19Ioxe, vaimomo 'o ngaxolu loxo taasila o tamitema ane ilili vitanisi uasi. Ngingi ne no anu laili noxou Mosinge mu'isalili. Xe atilovo aloxo 'o. Ngingi ne ngingi pa'usou no anu tasou Mosinge. 20Xe nexi ta'aposeli mo tamitema so pela'a ne loxo lavolavo'o so tani tava'u. Xe Kalaisiti Iesua anu anusi a lavo'o so tani kisou. 21Laso tani loloni ne pakia'u xo uteteli noxou Tatananenge. Mo anu upamupamuxanu tani pa'upa'usou so uai laixe xo usosovosou lexe tasou Mosinge u'isalili. 22Xe ngingi la Ulenu a uxoxolu noxinge kalumo. Laso maixene anu mupitangengi mo a upamupamuxangengi no anu tasou Mosinge ne.

Currently Selected:

Epesusi 2: ATA

Highlight

Compare

Copy