1 Tesalonaika 5
5
Nenge taxolu tautitiou lailivuxu Tatananenge
1Ioxe tavivixe, tava'u so takaukavu mo tapela'ingexu voxovoxo mo tautau ie uasi. 2Xo ngingi menge ngelavu laixe lexe voxo noxou Tatananenge olele ukulukene'i tamitema a loxo itema so pakali ukulukene'i tamitema no olovoxo. 3No voxo anene la tamitema i'oxo lexe, “Ai nenge taxolu lalavulusi 'o, ta'umolu mi ma'ia?” Ixolu ivikala axone sila alaxu vilesisi mamulo uxalisi'a ane. Uxali alaxu vilesisi a loxo navunavu uxalisie sema mi ne ilie u'oxone so ivo'o. Mamulo uxalisi'a axone la vote'i so ipisikei i'ume uasisi. 4Ia ngingi tavivixe, ngingi tamitema so isivoxo uasi. Laso loxo voxo ne uxali la ngingi ngakulukemolu loxo itema ukulukemolu itema so pakali uasi. 5Ngingi tamitema so lamana xe asosi. Nenge tamitema so isivoxo xe olovoxo uasi. 6Laso nenge taai loxo tamitema mose'i uasi. Nenge taxolu ienge uka mo xavutala lamanasi. 7Xo ane'i loxo iai la iai no olovoxo to! Xe tamitema ane'i isipaki la isipaki no olovoxosi. 8Ia nenge tamitema so aso la taxolu xavutalamenge lamanasi xo anu loxo taxolu no oto. Taxolu no oto laso tasu'asinge no anu lopala ilou sexela so uutululunenge a loxo ta'ami ivaxanu lasioti aini so uutululunu lutune'i. Xe talopalanu taxomoaiou voxo so Tatananenge upamaulinenge no anu mamulo. Axone la anu loxo utanunenge no anu oto e taxolu no anu 'o a loxo ati aini utanuxu kisi'a ta'ami.
9Xo Mosinge musosovosinge so taxalisou nene'axu la'ia noxou uasi. Musosovosinge so taxalisou nene'axu pamauli ane texalisou noxou Tatananenge Iesua Kalaisiti. 10Anu musolisinge laso nenge ta'ei loxo imamaulisio o misoisoli mukalu la no voxo olele ne nenge'a Tatananenge taxolu tamaulisi. 11Laso ngingi vilevilesi ngamamatolangengi mo nga'oxonu pakia'inge ngato'o, a loxo ngalavusou nga'oxonu ne.
Pelototo kaluxusou
12Laso tavivixe, nexi talinga noxinge lexe opongengi u'osasi'a tamitema ane ixaxai no taingengi ne. Tamitema anene Tatananenge molu musosovosi'a so i'uli laxungengi mo ipelototosinge. 13Mo tangengiou xaixai noxi'a laso ngataxane'i laixe mo ngasexelaxa'a. Xe ngingi mukalusi ne ngaxolu opongengi vilesisi.
14Mo tavivixe, nexi tamasaxau ta'uvutinixinge aloxo 'o. Ta'ei noxinge ane loxo ipolo va'axu la ngalovonixi'a. Xe ane'i ane opone'i kalaua sevile la ngamamatolane'i. Xe ane'i loxo mamalaxa'a no anu lopala la nga'oxonu pakia'a. Xe noxi'a tavivinge mukalusi la opongengi tu'umaxu noxi'a palea uasi, nga'oxonu se'isisi noxi'a. 15Mo loxo vile noxinge ususunixine la nini nasusunoxu so nakolinu uasi. Xavingengiou ilixo laixe no taingengi xe noxi'a tamitema mukalusi.
16Ioxe, ngaxolu opongengi u'osasi. 17Mo opongengi utulu so ngavikala noxou Mosinge utotomu. 18Mo loxo mi ma'ia uxali la ngavikalasou laixe noxou Mosinge. Xo masaxa noxou noxinge tamitemaou Kalaisiti Iesua axone.
19Mo aloxo 'o. Loxo Ulenu upalasinoxu mi ma'ia noxinge la ngaxililiou mamu. 20Mo ngataxanu vaikala so pela'a mukalusi. 21Ia mimi mukalusi la ngatilovosou mo ngakamakulunu aneva laixesi. 22Xe mi ane masua la ngaxolu va'axu no anu.
23Xe nexi talinga noxou Mosinge e mosou xoluxolu lalavulusi aloxo 'o. Anu uxalixu xoluxolungenge malemalenga avile. Mo anu uutululunu ulengengi mo tangengi mo vasimenge so xoluxolu noxinge pumuxusi. Mo so no voxosou lailivuxu Tatananenge Iesua Kalaisiti la mi vile masua uxolu noxinge uasi. 24La mimi ano'o Mosinge uxalixu ane. Xo anu molu mu'avalinge mo mi ma'ia ulemolu la umulinu u'isalili.
25O tavivixe, ngapilixinexi noxou Mosinge so usu'ulinexi. 26Mo ngamaxa'u sexelasinge ngato'o no anu vote'isinge Mosinge ta'olu. 27Xe alinga pakia'u noxinge no anu ualasou Tatananenge lexe nga'itisou lapasi ano'o noxi'a tavivinge mukalusi.
28Iaiama noxou Tatananenge Iesua Kalaisiti a uxolu noxinge ne. Anu anesi.
Currently Selected:
1 Tesalonaika 5: ATA
Highlight
Share
Compare
Copy
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
