2 Tesalonaika 1
1
1Eni Polu xe Sailasi xe Timoti a. Nexi takaukavunu lapasi ano'o ulai noxinge tatemanu pita ne Tesalonaika. Ngingi ne ngaxolu noxou Mosinge anu Maminge xe noxou Tatananenge Iesua Kalaisiti. 2Laso eni amasaxau lexe ngingi ngaxolu no anu iaiama mo xoluxolu lalavulusi noxi'a.
Poluena mivikala laixe mo milingau su'ulisi'a Tatesalonaika
3Ioxe tavivixe, utotomu nexi tavikala laixesinge noxou Mosinge. Laixe so ta'oxo axone xo telavu lexe lopala noxinge a uleleme mo sexela noxinge ngato'o mulolutusi. 4Mo kalumo loxo nexi taxixao no anu pitapita noxou Mosinge no tuatuala la talavusou taa'alongenge so ta'itinu ili'ilixo noxinge. Taa'alongenge lexe ngatavulenu navunavusou tu'utu'umaxu ia ngasasalo uasi, ngetetelisou lopala noxinge pumuxusi. 5Xo anu umaxa'u lamana lexe loxo Mosinge utilovo la anu ulapusi, u'oxonu mi vile vuluvulusi uasi. Laso ngalavu lexe ngatavulenu navunavu vaimomo 'o so ulalaxingengi mo so no voxo loxo anu molu u'uli laxune'i tamitemaou la xoluxolungenge umomomo mukalu.
6Mo ilixo noxou Mosinge ulapu aloxo 'o. Tamitema ane a ilolosinge tu'umaxu ne anu ukoline'i kalumo no anu tu'umaxu. 7Xe ngingi ane ngatavulenu navunavu vaimomo 'o la anu uxexenu so papaxesinge nenge'a. Mi anene uxali no voxo loxo Tatananenge Iesua oli'a ta'angelou xavine'i ilu'e no tualasou so ipala'a no anu navu lamixu. 8Mo anu uveluvelunu lakolisou tu'umaxu noxi'a tamitema ane ilavusou Mosinge uasi mo ilomuanu vaikala laixe so Tatananenge Iesua. 9Lakolisou tu'umaxu ne aloxo 'o. Ane'i ixalisou mamulo kaluxusou uasi xo ixolu ikalipala avile noxou Tatananenge mo no anu xavinu iaxu. 10Ia loxo nenge tamitemaou mu'isalili la taxolu ta'itinu ualasou no anu voxo loxo une'e ne. Mo ngingi ngelomuxu vaikalamexi no taingengi laso ngingi kalumo ngaxolu so nenge'a talopala mukalusi tatoxu Tatananenge ne.
11Ioxe, loxo nexi tapilixingengi noxou Mosinge la utotomu talingausinge aloxo 'o kalumo. Lexe anu usu'ulingengi so xoluxolungenge ulovou ava noxou. Xe mi ma'ia laixe ngamasaxau so nga'oxonu la uxalixu nene'axu. Xe xaixai noxinge aneva la ngalopalanu mo so ulosinge xavi so nga'oxonu. 12Laso tamitema imaisou xoluxolungenge axone la i'itinu ualasou Tatananenge Iesua mo anu kalumo uvikalasinge laixe no anu. Xo mi ne uxali no anu iaiamasi, iaiama noxou Mosinge ilou Tatananenge Iesua Kalaisitisi.
Currently Selected:
2 Tesalonaika 1: ATA
Highlight
Share
Compare
Copy
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487