1 Tesalonaika 4

Mamu so ta'oxonu ili'iloxo nuni'u

1Ioxe tavivixe, mo aloxo 'ola. Nexi tepela'ingexu vote'i so muamua'ingenge ane ulovou masaxa noxou Mosinge. Mo a ngamulinu ne. Ia nexi tatama so tapelototosinge no anu ualasou Tatananenge Iesua lexe xavingengiou avile. 2Xo ngingi menge ngelavusou pelepeletoto ane tepilixinu noxinge no anu ualasou Tatananenge Iesua. 3Aloxo 'o. Masaxa noxou Mosinge lexe xoluxolungenge malemalengasi laso ngingi nga'apingenge no anu ilixo nuni'u olele. 4Ngingi vilevilesi ngalaxa'inu vasimenge laixe so ngapilixinu no anu ilixo malemalenga ane laixe no iou Mosinge mo no ie'i tamitema. 5Mamu so masamasaxa masua upalusinge no anu ili'ilixo nuni'u. Xo anene ilixo noxi'a tamitema so isivoxo e ilavusou Mosinge uasi. 6Mo loxo itema ususu axone la anu upakali noxou vimou no anu lopala ane. Xe loxo tepelototo pakia'u noxinge mala'o, lexe ngalaxa'i laixe xo Tatananenge molu ukoline'i tamitema so ilixo axone. 7Mosinge mu'avalinge so tamulinu ili'ilixo nuni'u axone uasi. Mu'avalingexu xoluxolu malemalengasi. 8Laso loxo itema uxililiou vaikala ano'o la uxililiou vaikalamexi tamitema uasi, uxililiou Mosinge. E mulosinge Ulenu Laixe a uxolu noxinge ne.

Pelototo lexe sexela noxi'a ngato'o uleme

9Ioxe, no anu ngiou so sexela no taingengi ngingi Mosinge ta'olu la eni vaikala so apela'ingexu uasi. Xo Mosinge molu mulosoingexu vote'i so ngasexelangenge ngato'o mukalu. 10Xo telavu lexe ngingi a nga'oxonu noxi'a tavivinge no anu lopala no xalexale tuatuala ne Masetonia polovinisi. Ngingi a nga'oxonu ia tavivixe, nexi tapelototosinge mo ta'avutinixinge lexe mi ne utetelai. 11Mo loxo tepelototosinge mala'o lexe opongengi ututulu so ngaxolu se'isisi mo ngingi menge nga'oxonu xaixai noxinge no avongesi. 12Mo so ngingi ngakamulinu mi vile so vasimenge uasi la tamitema no pa'upa'umenge imaisou xoluxolu noxinge lexe mulovosi.

Tatananenge ulivu une'e so uno'a tamitemaou

13Ioxe tavivixe, loxo noxi'a tanoxinge ane misoisoli la ngaxovulaulau noxi'a uasi. Xo ane'i tamitema loxo ixomaiou voxo olele uasi la tama noxi'a uxoxolu uxoxolu u'okisi. Ia ngingi la nga'oxo axone uasi. 14Xo nenge telopala mo telavu lexe Mosinge mutulusou Iesua no anu soli. Laso talopala lexe no anu xavi noxou anenesi la no voxosou lailivuxu Iesua la oli'a tanoxou e misoisoli.

15Nexi tapela'inge no anu vaikalaou Tatananenge aloxo 'o. No anu lailivuxu Tatananenge la nenge tamitemaou ta'ei taxolu tamamaulisio la ta'uli noxi'a ane'i ane misoisoli uasi. 16Xo aloxo 'o. No voxo anene la xoli toxoxu xe tila noxi'a ta'angelo talaixe uvikala xe piuka noxou Mosinge utama la Tatananenge molu no tualasou ulu'e. Ulu'e laso tanoxou Kalaisiti ane misoisoli la itulutulu tei. 17Ukalu laso ta'ei noxinge ane tamamaulisio la nenge'a takei tatelai so ta'alaxu no loxotolo. Laso ane, nenge nenge'a taxolu noxou Tatananenge kaluxusou uasi. 18Laso ngalemolu vaikala ano'o so ngamamatolangengi no anu ngato'o.

Currently Selected:

1 Tesalonaika 4: ATA

Highlight

Compare

Copy