1 Tesalonaika 2
2
Poluena mulivunoxu xavutalai'a Tatesalonaika so xaixai noxi'a no taine'i
1Xo tavivixe, ngingi menge ngelavu lexe texali texolu no taingengi la anu mi vitanisi uasi, muxalixu nene'axu laixe. 2La ngelavu lexe texolu ne Pilipai mala'o mine taxali noxinge uao la ane'i milosixe tu'umaxu mo tetavulenu navunavusou. Tetavulenu navusou ia texali noxinge la Mosixe mu'oxo pakia'ixe mo ta'ume uasi. Xilili mu'oki ia pumunexe so telanu vaikala laixe noxou Mosinge. 3Xe loxo tepela'inge la takalavoingengi uasi o talai no anu ili'ilixo nuni'u uasi o ta'oxonu lolongenge uasi. 4Xo Mosinge molu musosovosixe mo mu'osasixe so taxaxai la mupilixinu vaikala laixe noxixe so talanu. Laso maixene loxo talanu la taxavutalane'i tamitema uasi taxavutalanu Mosinge lexe u'osasixexusi, xo anu molu utilovosou oponexi. 5Utilovosou oponexi laso anu molu uvalanexe a loxo ngingi menge ngalavusou. Texali noxinge la taxilisingengi uasi xe mi vile noxinge so ta'isuxu uasi. 6Xe nexi 'o, nexi ta'aposeliou Kalaisiti, laso loxo tamasaxau la masi talemolu taninexe ne utotomu so ngalomunexesi. La uasi, xo oponexi lexe ngingi o tamitema se'i i'itinexi uasi. 7Xo loxo texolu no taingengi la tamalaninexe noxinge a loxo sema isusune'i tailie la imalanixa'a laixe. 8Nexi tesexelangengi misevile laso ta'osa so te'itingenge vaikala laixe noxou Mosinge. Ia vaikalasi uasi, mauli noxixe te'itingengi kalumo xo oponexi u'osasinge lapilai uasisi. 9Mo tavivixe, nexi texolu no taingengi so talanu vaikala laixe noxou Mosinge ne la sasaiexi mo ialuxu manina noxixe. Xo texaxai no aso xe olovoxo kalumo mo so talosinge tu'umaxu so ngasaxila'ixe no anu mimi so vasimexe uasi.
10Ioxe, noxinge mo no iou Mosinge la ngelavusou mi ma'ia te'oxonu noxinge talopala. Xo nexi temulinu masaxa noxou Mosinge mu'isalili mo ilixomexi noxinge mulapusi mo so mi vile so tamitema ito'omexexu uasi. 11Mo loxo ngelavu. Texolu no taingengi la tepelototosinge mo temamatolangengi mo tetatama noxinge a loxo itema u'oxo noxi'a ta'olu u'isalili. 12Tetatama noxinge lexe muamua'i noxinge la laixe mo ulovou ilixo noxou Mosinge. Xo anu molu mu'avalinge lexe no anu voxo so anu molu u'uli laxune'i tamitemaou la ngingi ngaxoxolu ne no anu iaxusi.
Tu'umaxu muxalisi'a Tatesalonaika ia mitulu paikia'asi
13Ioxe, laso utotomu nexi tavikala laixe noxou Mosinge aloxo 'ola. Ngingi ngelomusou Mosinge vaikalaou noxixe la ngeno'u loxo tamitema vaikalai'a uasi. Ngelamana no anu lexe anene vaikalaou Mosinge u'isalili ane. Xe ngelopalanu laso maixene vaikala anene muxaxaisinge. 14Xe tavivixe, ngingi ngexali loxo tatemanu pitapita noxou Mosinge ne Iutea. Ane'i e ixoxolu noxou Kalaisiti Iesua. Xo ane'i mitavulenu tu'umaxu no avo'a Taiutala. La ngingi axone kalumo xo navunavu ane ngetavulenu ne noxi'a tatemanu tualasingela. 15Xe noxou Tatananenge Iesua la ane'i Taiuta mivau. Xe mive'ave'a tapolopeti mo mipalenenexe so ikusaixe. Tamitema anene ixililiou masaxa noxou Mosinge mo imatapiane'i tamitema mukalusi. 16Ane'i itanutanunexe so talanu vaikala so pamauli noxi'a tamitema noale'ale uasi. Ane'i me'a isu'anu la'oluxu susu noxi'a la anu loxo uana'ana avile. Laso la'ia noxou Mosinge mumomomo mo mulalaxisi.
Opone'i mutulu lexe imaisi'a Tatesolanaikala
17Ioxe tavivixe, nexi taxolu nopaxa noxinge. Maxuveni uasi, ia oponexi utatamasinge mo ututulu lexe tamaisou iengila. Ia tanexingenge utotomu laso anu loxo texolu alai noxinge mukalu. 18Nexi tamasaxau tane'e noxinge mo eni Polu etovonu etovonu ia Uluaou mutanunexe to! 19Xo mi ane oponexi ututuluou so ta'osasou no iou Tatananenge Iesua no voxo loxo ulivu a ngingisi. No voxo ne nene'axu xaixai noxixe lailaixe so tamaxa'u noxou a ngingi to ne. 20Ngingi loxo palaisi na'a nexi laso oponexi uleleilangenge.
Currently Selected:
1 Tesalonaika 2: ATA
Highlight
Share
Compare
Copy
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
