1 Tesalonaika 1
1
1Eni Polu xe Sailasi xe Timoti a. Nexi takaukavunu lapasi ano'o ulai noxinge tatemanu pita ne Tesalonaika. Ngingi ne ngaxolu noxou Mosinge anu Maminge xe noxou Tatananenge Iesua Kalaisiti laso eni amasaxau lexe ngingi ngaxamulinu iaiama mo xoluxolu lalavulusi noxi'a.
Poluena mivikala laixe noxou Mosinge so lopala noxi'a Tatesalonaika
2Ioxe, nexi tavikalasinge laixe noxou Mosinge utotomu mo loxo tavikala axone la tamoxomoxo'inge mukalusi noxou. 3Tavivikala noxou Mosinge anu Maminge la talemolu osa xo talavusou xoluxolu noxinge aloxo 'o. Ngelopalanu Mosinge laso muxalixu ili'ilixo laixe, xe ngasexelangenge ngato'o laso sasaienge no anu xaixai so su'uli xe ngalopalanu ngaxomaiou lailivu noxou Tatananenge Iesua Kalaisiti laso ngaxolu pumungenge. 4Xo tavivixe, nexi telavu lexe Mosinge usexelangenge mo musosovosinge lexe ngingi tanoxou mu'isalili.
5Xo vaikala laixe tene'enu noxinge ne, vaikala vitanisi uasi. Telanu vaikala ne la no anu xavi, xo Ulenu Laixe mu'isalilinoxu. Mu'isalilinoxu laso mupalasi noxinge lexe maninasou ane. Xe xoluxolu noxixe no taingengi la mupala'a no iengi kalumo. Taxolu noxinge la tava'u vilela uasi, a so tasu'ulingengisi. 6Ioxe, texolu xe ngekasou vaikalaou lexe manina sila ngetavulenu tu'utu'umaxusou tavu'alo ne. Ngetavulenu tu'umaxusou ia Ulenu Laixe mu'avutinoxu osa no opongengi. Laso ngingi ngeuanenexe noxi'a Tatananenge. 7Ngeuanenexe laso maixene no anu xoluxolungenge la ngexali loxo pikisa laixe so talopala ne Masetonia xe Akaia polovinisi iuanengenge kalumo. 8Xo ngelanu vaikalaou Tatananenge la tatila, mo loxo lauxu muxali nopaxapaxa. La ne Masetonia xe Akaia polovinisisi uasi. Xo loxo nexi talai no tuala ne'ei la taa'aloxu lopala noxinge noxou Mosinge la uasi xo a'alosou muiaveiave no tuatuala mukalusi. 9Laso loxo taxali ne'ei la ane'i me'a ia'alo. Ia'alo so voxo tei texali noxinge lexe nge'osasou vaikalamexi. La ngexiunu tumalingeou ilixo so nge'itinu momosinge kalavoi mo vaimomo 'o a ngaxolu ngamulinu masaxa noxou Mosinge maninasou e umamauli. 10Mo ngaxolu ngaxomaiou lailivu noxou Olu. Olu Iesua e musoli ka Mosinge mutulusou mupamaulinu mo a uxoxolu no tualasou. Ngaxomaiou lailivu noxou xo anu so u'umenenge no anu la'ia noxou Mosinge e upala'a ili'io.
Currently Selected:
1 Tesalonaika 1: ATA
Highlight
Share
Compare
Copy
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
