Kolosi 4

1Ioxe, laso noxinge tavosi la nga'oxonu ilixo ane ulapusi mo lamanasi noxi'a tasilevimengi, xo ngalavu lexe ngingi kalumo Vosimengi a uxolu no tualasou Mosinge.

Kaluxusou pelototo

2Xe nga'italongengi avile no anu vote'i so ngavivikala noxou Mosinge. Mo loxo ngaxolu ngavikala noxou la xavutalamengi lamanasi xe opongengi u'osasi. 3La ngapilixinexi noxou Mosinge kalumo mo so anu ukisinu vote'isixe la talanu vaikalasou Kalaisiti. Vaikala ne mutalume tatei la vaimomo 'o a mupala'a 'o. Ia leviani ixililiou laso maixene akalavususou 'o. 4Mo ngalinga noxou Mosinge so apala'anixu vaikala ne lamana no anu vote'i e molu umasaxausi.

5Xe anu laixe so lavulavu ilou tilovo noxinge u'asi'asi no anu vote'i so ngapamuxangengi no ie'i tamitema ane ilamana uao. Mo loxo tianisi uxali so ngalapune'i no anu Mosinge vaikalaou la ngapapunu uasi. 6No anu vaikalamengi mukalusi la no anu iaiamasi xe ngalemolu mi ane tu'axu no opone'i. Laso loxo tamitema vilevilesi ivikalasinge axova la ngalavusou vote'i ane laixe so ngakoline'i.

Polu mupalusi'a Tikikusi ilou Onesimusi milai ne Kolosi

7Ioxe, loxo Tikikusi uxali noxinge la ua'alomengi laixe no anu mi ma'ia muxalisilo 'o. Tikikusi ne anu ulavusou uva'isu no anu mi ma'ia tatavulenu 'o, xo anu itema so xaixai laixe noxou Tatananenge mo anu vivinge ane tasexelaxu. 8Tava'u so apalusou une'e noxinge a so ngalavu lexe nexi taxolu axova, xe so u'oxo pakia'inge. 9La ilou Onesimusi e vile noxinge 'o. Anu ne, vivinge ane tasexelaxu mo xaixai ma'ia tapilixinu la u'oxonu laixesi. Ane'i ilou ixali, laso ia'alomengi laixe no anu mimi mukalusi muxali lai 'o.

Polu mulemolu aso mulai noxi'a talopala ne Kolosi

10Ioxe, Alisitakusi e noxou taxolu takalavusu 'o muvikala aso noxinge. Xe Maki e Vanavasi vimou tavuna anu kalumo ukalanu aso noxinge. Loxo une'e noxinge la nga'osasou so nga'unanu noxinge aloxo elemolu no anu vaikala ekalanu noxinge mukalu. 11Xe vivinge Iesua e ilemolu lexe Iasitusi anu kalumo muvikala aso noxinge. No taine'i laili Taiuta la tamitema tatalu ano'osi a iva'isu no anu xaixai so ta'unane'i tamitema ixolu no laxu Mosinge. La ane'i ilavusou isu'ulileli laixe manina.

12Epavilasi e anu vile noxinge ne anu kalumo mukalanu aso noxinge. Anu itema so xaixai noxou Kalaisiti Iesua mo utotomu xavinu so upilipilixingengi noxou Mosinge. La ulinga noxou lexe ngatulu pumungenge avile no anu lopala mo ngalavu manina no anu masaxa noxou Mosinge. 13Xe eni avikala lamana noxinge lexe anu sasaiou so su'ulisinge ngoli'a tamitemaou Mosinge no anu pita no taoni ne Laotisea xe ne Ielapolisi. 14Xe Luku e tokota ane tasexelaxu manina ilou Temasi ivikala aso noxinge.

15Eni amasaxau lexe ngalemolu aso noxilo noxi'a tavivinge ne Laotisea xe ulai noxie Nimiva oli'a tatemanu pita e ilavusou ipita no tasie. 16Loxo nga'itisou lapasi ano'o ukalu la ngakalanu ulai no anu pita ne Laotisea so ane'i i'itisou kalumo. Xe lapasi ane ekalanu mulai noxi'a la ngingi kalumo nga'itisou. 17Xe ngapelototosou Alikipusi lexe, “Xaixai ane nexalisou noxou Tatananenge la nalaxa'inu laixe mo so namomoxu.”

18Eni Polu melo akaukavunu aso noxinge no avolo 'o. Ngingi tangengixo xo eni axolu no lakalavusu 'osio. Eni amasaxau lexe ngaxamulinu iaiama noxou Mosinge. Anu anesi.

Currently Selected:

Kolosi 4: ATA

Highlight

Compare

Copy