1 Tioni 5
5
Mosinge ta'olu iua'ulixu xavi no anu lialia
1Ioxe, tamitema ane ilopala lexe Iesua anu ane Mosinge musosovosou lexe Kalaisiti, la ane'i Mosinge ta'olu ane. Xe aloxo 'o, loxo evile usexelaxu itema vile la anu usexelaxa'a ta'olu kalumo. 2Laso loxo nenge tasexelaxu Mosinge mo talomuxu voto noxou la anu upalasi lexe nenge tasexelaxa'a tavivinge Mosinge ta'olu. 3Xo vote'i so tasexelaxu Mosinge maninasou a so talomuxu voto noxou. Ia voto noxou ne anu uvenge tu'umaxu loxo tatavulenu uasi. 4Tamitema mukalusi ta'ei mixali Mosinge ta'olu la iua'ulixu xavi no anu lialia. Xo nenge telopala lexe Iesua anu Mosinge Olu la no anu vote'i anenesi teua'ulixu xavi no anu lialia. 5Ani, ena'eisi ane so uua'ulixu xavi no anu lialia? A itema e ulopala manina lexe Iesua anu Mosinge Olusi.
Mosinge mulanu vaikala so muvalaxu Olu
6Iesua Kalaisiti muxali no anu vote'i e so lexa mukelele no anu xe sialuxu e munixi loxo musoli. No anu lexasi uasi, muxali no anu lexa xe no anu sialu. La Ulenu Laixe e mosou vaikala manina a uvavalaxu mi ne lexe manina. 7Laso vaikala so uvalaxu mi ne tava'u tatalu aloxo 'o. 8Vaikalaou Ulenu Laixe upita no anu lexa xe no anu sialu so upela'ingexu mi vilesisi ne.
9Ioxe, mo nenge talavusou talomuxu vaikalai'a tamitema loxo ivalaxu mi vile. Io vaikalaou Mosinge uua'ulixu vaikalai'a tamitema avile laso loxo ulemolu vaikala so uvalaxu mi vile la talopalanu avile. La vaikala e mulemolu a so muvalaxu Olu. 10Laso itema ane ulopala noxou Mosinge Olu la vaikalaou Mosinge so muvalaxu Olu ne a uxolu nonano noxou. Ia itema ane ulopala noxou Mosinge uasi la anu loxo umoxo'u Mosinge lexe itema so kalavoi, xo vaikalaou e mulemolu so muvalaxu Olu, la itema ne ulopalanu to uasi. 11La ano'o vote'i so Mosinge mupala'anixu lexe vaikalaou ne maninasou. Anu mulosinge mauli kaluxu uasi la tava'u mauli kaluxu uasi ne a noxou Olusi. 12Itema ane Mosinge Olu uxolu noxou la mauli anene a uxolu noxou. Ia itema ane Mosinge Olu uxolu noxou uasi la mauli anene uxolu noxou uasisi.
Vote'i axova so talavu lexe mauli kaluxu uasi uxolu noxinge
13Eni ekaukavunu vaikala ano'o ulai noxinge ngingi ane ngalopala noxou Mosinge Olu, mo so ngingi ngalavu lexe mauli kaluxu uasi a muxolu noxinge ne. 14Xe loxo taxolu no iou la ta'ume uasi xo oponenge ulavu lexe loxo talingau mi vile ane ulovou masaxa noxou la anu ulomunenge. 15Nenge talavu lexe ulomunenge axone laso talavu kalumo lexe mi ma'ia tatali'isouxu la anu ukolinenge.
16Loxo vile noxinge umaisou vimou ususu ia no anu susu e so uolexu no anu soli uasi, la vote'i uxolu so ulingau pamaulisou noxou Mosinge. Eni avikalasou susu e uolexa'a tamitema no anu soli uasi, ia susu e so uolexa'a no anu soli la pelototo noxilo 'o so ngalingau su'ulisou vivinge no anu anene uasi. 17Manina, ili'ilixo mukilakalu mukalusi anu sususi ia susu mukalusi a so uolenenge no anu soli uasi.
18Mo loxo telavu, tamitema mukalusi ta'ei ixolu Mosinge ta'olu la ilavusou ixolu no anu susu uasi. Xo Mosinge Olu u'oxo latolosi'a tamitemaou la mosou susu olele ulaisi'a uasi. 19Xe nenge talavu lexe nenge tanoxou Mosinge ia lialia oli'a tatemanu mukalusi uxolu no laxu xaviou mosou susu ne.
20Mo telavu aloxo 'ola. Mosinge Olu mune'e mukalu kaio mulamananinenge so talavusou Mosinge maninasou. La nenge a taxolu nonano noxou Mosinge xe noxou Olu Iesua Kalaisiti. Anu ne Mosinge maninasou xe tava'u mauli kaluxu uasi.
21Ta'alixeli moso 'o, ngalaxa'ingengi mo ngakalipalangengi no anu momosi'a kalavoi.
Currently Selected:
1 Tioni 5: ATA
Highlight
Copy
Compare
Share
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
