Úkuecha 8

1Ka Sáulu exexapti néna enkaksï uántikuni jápka.

Sáulu jakak'utichani antaguani káasti

Imani jurhiatekuaksï Jerusaleni anapu jakak'utichanksï antaguani káaspti, ka iámentuksï Judea ka Samaria ísï etsakorhespti, k'óruksï Jesusiri uantakua páricha no sïpakorhespti. 2Máruksï acheti p'amok'up'iticha Estebanunksï pántaspti jatsintani, ka kánekuaksï uekuxapti. 3Ka Sáulu kánekua nósesi káasïrempti jakak'utichani; inchapusïrempti ka achetichani ka uarhitichani antsikuasïrempti petaani ka ónhaatarkorheasïrempti.

II. SAMARIA KA JUDEA ARHITS'ÏPERANASTI

(8.4—9.43)

Ampakiti aiankperakua Samaria arhits'ïkperanhasti

4Ka ima enkaksï etsakurhitini jámani jápka iápuru ísïksï ampakiti aiankperakuani uantant'a'paxapti. 5Felipe Samaria kétsemaspti ka Krístueri ampe jima arhits'ïkpespti. 6Ka iámentuechaksï mák'u k'éri kurhasïrempti ampe enka Felipe uantempka, ka xésptiksï míntechani enka ima úempka, 7uánekua enkaksï nósesi jarhati espirituecha incharhiatini jápka, nósesi járhatichaksï uinhachaparini uérheantasïrempti, ka uánekuaksï chkéch'uecha ka renhet'echaksï ampakentaspti. 8Ka imani iretarhu kánekua tsípenhaxapti.

9Ka imani iretarhu irekaxapti acheti ma enka Simoni arhinhempka, ima sïkuap'erakua ampe úsïrempti, ka Samaria ióni tantoch'pesptia k'éri ampe eratakorheparini. 10Imanksï k'ératicha ka sapirhaticha kánekua kurhach'asïrempti ka uantasïremptiksï: “I uinhapekua Diósï k'ériristi.”

11Ka jinkuntkuksï jarhasïrempti exeni ampe enka ima úpirinka, jimpoka sïkuap'erata ampe jinkuni ióni tántoch'aatixapkia. 12Ka enkaksï Felipeni jakak'ukupka enka ampakiti aiankperakuani uantantempka Diósïri irechekueri ka Jesukristueri jakankurhikuani, acheticha ka uarhitichaksï itsï atats'ïsïrempti. 13Ka Simonit'u jakak'uspti, ka itsï atats'ïspti ka méntku Felipe jinkuni jámani jarhasïrempti; ka xérini míntechani enka Felipe úempka ísku pakarerasïrempti. 14Ka Jesusiri uantakua páricha enkaksï Jerusaleni jápka, enkaksï kurhach'pepka eskaksï Samaria ísï anapuecha jiókorhespka Diósïri aiankperakuani, Pédruni ka Juánunksï axakuaspti. 15Ka enkaksï ima niárapka, kómarhip'ekuasptiksï eskaksï Espiritu Sántuni p'ipirinka. 16Jimpokaksï ima Espiritu Sántuni nótki p'iraxapka, jinik'uksïsï Jesusiri jakankurhikua jimpo itsï atats'ïtini jáptia. 17Ka p'áts'ïkuasïrempti ka imaksï Espiritu Sántuni p'irasïrempti.

18Ka Simoni exerini eska Espiritu Sántu p'inhaxapka enkaksï Jesusiri uantakua páricha p'áts'ïkuauempka, tumina aiakuaspti, 19arhiaparini:

–Íntskuts'ïni jíntentu inteni uinhapekua, eska néuek'ini enkani ji p'áts'ïkuaka, eska imat'u Espiritu Sántuni p'iuaka.

20Jiák'ani Pédru arhispti:

–¡Kéntikuchets'ïni chéti tumina jinkuni! Jimpokari eratseska eska Diósïri intsïmperakua tumina jimpo p'inhasïnka. 21T'úri no sésekua jatsiska juchantsïni jinkunini, jimpokari Diósïni jánhekusïnka. 22Móantsï ampe enkari nósesi p'ikuarhenhek'a, ka Diósïni kómarhikorhe, nántikari ampe púamenhant'aaka inteni enkari nósesi p'ikuarhenhek'a, 23jimpokakini nósesi ampek'u exechexaka enkakini káts'ik'utini jaka.

24Ka Simoni uantaspti:

–Achantsïni cha kómarhiche je, eskani nómpe ma ísï úkorhenchaaka eskats'ïni na arhini jaka.

25Ka enkaksï ima Acheri uantakuani uantant'a'pkia, Jerusalenksï kuanhatsentaspti, ka uápuru iretecharhu enkaksï Samaria ísï jaka ampakiti aiankperakuani uantant'a'spti.

Felipe ka Etiopia anapu ma

26Tátsekua Acheri ánjeli ma Felipeni arhispti: “Jauara ka kétsemani isï ni, imani xanhari jimpo enka Jerusaleni uératini Gása kétsemak'a, enka jimesï nitamak'a enka nónema irekaka.” 27Ka Felipe niraspti. Ka jimesï isï níntaxapti Etiopia anapu ma, enka nana irecha Etiopia anapueri tumina patsaripka, enka Jerusaleni nípka Diósïni k'éri ampe arhini. 28Ima Diósïri uantari Isaiasïri karakatani arhipantaxapti. 29Ka Espiritu Felipeni arhispti: “Antanku inteni enka inte jatapantani jaka.” 30Ka enka Felipe antankuni jápka, kurhach'aspti eska Diósïri uantari Isaiasïri karakatani arhipantaxapka ka arhispti:

–¿Jánhaskaxakiri ampe enkari arhintani jaka?

31Ka ima arhispti:

–¿Nénat'uni jánhaskaa, enkarini nónema sáni jánhastak'a?

Ka kómarhispti Felipeni eska ima jinkuni jatapirinka. 32Ka ima arhintaxapti jima enka arhik'a:

“Karichini pánhasti uántikunhani,

ísï eska karichi ma enka no mintsirak'a

enka kuinanhani janhak'a,

ísïmentu no mintsiraspti.

33Ka enka xáni nósesi kánhani jápka,

nónema kuáp'entaspti:

¿Ne ua sïrukua jémperi

ampe uantant'a'ni?

Jimpoka parhakpeni tsípekua euanhantaska.”

34Ka Etiopia anapu Felipeni arhispti:

–Kómuarhixakakini, arhirini: ¿Diósïri uantari ixu néri ampesï arhik'i; imasï arhikorheni jaki o máteru nemerisï uantak'i?

35Jiák'ani Felipe ménteru uéntaspti jima arhintani, ka Jesusiri ampakiti aiankperakuani aiankunt'aspti. 36Ka itsïarhu máksï jamaspti, ka nana irecheri tumina patsari k'éri, arhispti:

–Ixu itsï jatasti, ¿Ampe jimpo ji no ua itsï atats'ïni?

37[Ka Felipe uantaspti:

–Enkari mintsita jinkuni jakak'uk'a, úakari.

Ka ima arhintaspti:

–Jakak'usïnka eska Jesukristu Diósï Uáp'eska.]

38Anhaxustarkorhespti imani enka jatapantani jápka, ka tsimarhenksï itsïrhu kémespti ka Felipe itsï atats'ïkuspti. 39Enkaksï uémentani jápka Acheri Espiritu Felipeni kéntitaspti, ka jántspiri Felipeni nóretu exesptia ka kánekua tsípepantaspti. 40Ka Felipe Asoto iretarhu xarhantaspti, ka ampakiti aiankperakuani arhits'ïkpepaspti iámentu iretecharhu enka jamperi Sesarea niárerapka.

Currently Selected:

Úkuecha 8: BI-PURHE

Highlight

Copy

Compare