Úkuecha 9

Sáulu jakak'usti

(Uk 22.6-16; 26.12-18)

1Sáulu Acheri jurhenkorherichani xáni kurhunheani útasï uantikukuekaxaptiteru. Ísï jimposï táta k'érini jinkuni nípti, 2ka arhispti eska karakatechani úkuapirinka enka k'umanchekua tánkorhentskua Damasku anapuechani pákuapirinka, ka ísï úni jupiani ka Jerusaleni k'uanhaskuantaani achetichani ka uarhitichani enkaksï jimpanhe xanharini chúxapani jápkia. 3Ka xanhari jimpo, Damasku niárani jámani, auantarhu anapu t'íntskua ma mátirku uirhipantaspti; 4ka Sáulu kuarhatsespti, ka uantakua ma kurhaspti enka arhimpka: “Sáulu, Sáulu, ¿Antirinisï jupikani úek'i?”

5Ka Sáulu arhispti: “¿Néskiri Tata?” Ka uantakua ma mókukuntaspti: “Ji Jesusiska ima enkari t'u jupikakuekani jaka.” 6[Jiák'ani Sáulu manaraparini xáni chéni uantaspti: “Acha, ¿Amperisï úek'i eska ji úaka?” Ka Acha arhispti:] “Jauara kókuani ka iretarhu inchaaku, jimari arhinhaaka ampe enkari úaka.”

7Ima enkaksï Sáulu jinkuni nirani jápka ískuksï pákareratixapti, jimpokaksï sési jimpo kurhaxapka ka nóksï nemani exesïrempti. 8Jiák'ani Sáulu jauaraspti, nák'iruka éskani jápka nónemani exespti. Jimpoksïsï jupit'apapti Damasku inchaatani, 9ka tanimu jurhiatekua jima jarhasti pátenharhitini ka nómpe ma uékaspti arhani.

10Ka Damasku irekaxapti jurhenkorheri ma enka Ananiasï arhinhempka, enka Acha tsánharhitapka ka arhini: “¡Ananiasï!” Ka ima arhispti: “Acha, ixu jarhaska.”

11Ka Acha arhispti: “Jauara ka ni ampukutarhu enka jurhimpitku arhinhak'a, ka Júdasïo kurhankorhe acheti Társu anapuni ma enka Sáulu arhinhak'a. Jimpoka ima uantamukukorhexaka, 12ka jánhaskaspti achetini ma enka Ananiasï arhinhempka, ka ima ínchaspti ka p'ats'ïkusti ka Sáulu éskantaspti.”

13Jiák'ani Ananiasï uantaspti: “Acha, uánekuechats'ïni ima achetiri ampe aiankusti, na enka xáni nósesi káaka Jerusaleni chéti ireta erakukatechani. 14Ka ixu jamperit'uksï k'éri tátecha sésekua íntskusti eska ima jupiapirinka iámentu imechani enkaksï chéti jakankurhikuani k'éri ampe arhik'a.”

15Ka Acha arhintaspti: “Ni jimpokani ji imani eraantaska eska ima iámentu no judiuechani ka imecheri irechechani ka Israeli uáp'echani aiankuantaani jámaaka, 16jimpokani ji exeraaka na enka jucheti jakankurhikua jimpo xáni nósesi nitamanchakorheaka.”

17Jiák'ani Ananiasï niraspti ka k'umachekuarhu inchaspti ka p'áts'ïkuparini arhispti:

–Erachi Sáulu, Acha Jesusi enkakini xanhari jimpo xarhacheka enkari jurhani jápka, axastirini t'únkeni jinkuni ka eskari éskantaaka ka eskari Espiritu Sántuni p'iuaka.

18Ka jimak'u éskuecharhu chésïni járhati uénharhiantaaspti ka éskantaspti. Jiák'ani jauaraspti ka itsï atats'ïkunhaspti. 19Ka enka t'irepkia, uíuinhaxént'aspti ka namuni jurhia Damasku pákaraspti imecha jinkuni enkaksï Jesusini jakak'uempka.

Sáulu Damasku arhits'ïkpesti

20Ka Sáulu uénaspti uantant'a'ni k'umanchekua tánkorhentskuecharhu eska Jesusi Diósï Uáp'eska. 21Ka ima enkaksï kurhach'empka ískuksï pakarerasïrempti ka uantasïremptiksï:

–¿Anti no ísï Jerusaleni imechani ataani káuempki enkaksï Jesusini jakak'uempka? ¿Anti nóts'ïni intesï jupikani uékeni enkats'ïni k'éri tátechani jinkuni pákuekani jápka?

22K'óru Sáulu sánhani arhixapti jarhamekua jinkuni judiuechani enkaksï Damasku irekani jápka arhiani, ka no jánhastant'a'axapti jimpoka xarhatasïrempka eska Jesusi Krístueska.

Sáulu Judiouechani uék'uasti

23Ka namuni jurhia jimpo, judiouechaksï tánkorhent'atini, pakatperaspti néna enkaksï Sáuluni uantikupirinka, 24ka Sáulu mítespti ampe enkaksï úskuni jápka. Chúrekua ka jurhiakua iretarhu inchaakukuarhuksï jarhasïrempti eront'ani uantikuekanksï, 25ka ima enkaksï Jesusini jakak'uempka chúrekuaksï tsïntsïkatarhu isï xúnti jimpo iretarhu késkuntaspti.

Sáulu Jerusaleni niárasti

26Enka Sáulu Jerusaleni niárapka, jurhenkorhericha jinkuni tánkorhentskuekaxapti ka iámentuechaksï chérhesïrempti jimpokaksï no úsïrempka jakak'uni eska imat'u Jesusini jakak'uxapka. 27Jiák'ani Bernabe, Jesusiri uantakua páricha jinkuni páspti, ka aiankuant'aspti eska Sáulu xanhari jimpo Achani exespka, ka eska Acha uantaxekuspka, ka aiankuant'aspti na enka Sáulu Damasku uantant'a'pka Jesusiri jakankurhikuani nósani chémuparini. 28Ka Sáulu Jerusaleni imecha jinkuni pákaraspti ka imecha jinkuni jámani jarhasïrempti. 29Ka méntku nósani chémuparini Táteri ampe uantant'a'sïrempti, ka judiouecha jinkuni enkaksï gríegu uantempka, uénasptiksï arhirhperani, k'óruksï ima uántikunisï uékani jápti. 30Enkaksï jakak'uti erachicha íni ampe mítepka, Sáulunksï Sesarea páspti ka jima uératinksï Társu axaspti.

31Imani jurhiatekuechani, Jesusiri tánkorhekua Judea ka Galilea ka Samaria ísï sési jakuaksï jatsispti, ka Achanksï janhanharhiparini irekaxapti ka Espiritu Sántueri jarhop'erata jimpo uánenhaxapti.

Na enkaksï Eneasïni ampakerantaka

32Enka Pédru iámentuechani p'urhempeani jamani jápka, p'urhempeasptit'u imani enkaksï Jesusini jakak'uempka enkaksï Lida irekapka. 33Ka jima exent'aspti achetini ma enka Eneasï arhinhempka, enka iúmu tanimu uéxurhini apontikupka, jimpoka no úsïrempka jauarani. 34Ka Pédru arhispti:

–Eneasï, Jesukristukini ampakerantaxati, jauara ka k'uírakuani irhikorhentsï.

Ka ima jauap'atsespti. 35Ka iámentuechaksï exespti enkaksï Lida ka Saroni irekapka, ka Acha Jesusinksï jakak'uspti.

Dórkasï tsítanhantasti

36Ka jiák'ani ísï Jópe irekaxapti uarhiti ma enka Tabita arhinhempka, imat'u Jesusini jakak'uxapti (“Enka Dórkasï” arhikuekak'a gríego jimpo). Ima uarhiti méntkisï sési ampe úrisïrempti ka kánekua jarhop'esïrempti, ka kómu jántichani ampe intsïmpeasïrempti. 37Ka imani jurhiatekua jimpo p'amenchaspti ka uarhispti. Enkaksï jikuarantapka, k'umanchekuarhu iótakuarhuksï péntaspti. 38Ka jimpoka Lida uératini Jópe no káni iauaneska, jurhenkorherichaksï mítetini eska Pédru jima jámaxapka, tsimani achetichanksï axaaspti eskaksï kómarhipirinka: “Ásï iónta ka ju sóntku juchantsïni jinkuni.”

39Jiák'ani Pédru imecha jinkuni niraspti. Enka niárapka iótakuarhuksï karhataspti, ka jimaksï iámentu uarhiti tsînticha ueparini uirhipantapaspti jupikatianksï sïritakuechani ka xukuparhakua enka Dórkasï úkuantauempka enka nótki uarhimpka. 40Jiák'ani Pédru iámentuechani petant'a'arini, tinkuixurhispti ka uantamukukorhespti, ka Dórkasïni erateparini arhispti: “¡Tabita, jauarantsï!”

Ka ima éskantaspti ka Pédruni exerini jauaraspti, 41ka Pédru jupik'uspti ka jauatani; jiák'ani ióarhiantaaspti jakak'utichani ka uarhiti tsîntichani ka Dórkasïni tsítant'a'tini exerantaaspti. 42I ampe Jópe iámu mítekorhespti, ka uánekuaksï Acha Jesusini jakak'uspti. 43Ka Pédru imani iretarhu pakaraspti sáni namuni jurhia, Simonio enka sïkuiri ampakerani ánchekorhempka.

Currently Selected:

Úkuecha 9: BI-PURHE

Highlight

Copy

Compare